فوتو: parlam.kz
دەپۋتاتتىڭ ايتۋىنشا, بۇگىندە سينتەتيكالىق ەسىرتكى كەز كەلگەن ادامعا قول جەتىمدى بولىپ وتىر. زاڭسىز زاتتى الۋ ءۇشىن بار بولعانى ينتەرنەت پەن گادجەت بولۋى قاجەت.
قازىرگى تاڭدا قازاقستاندا ناشاقورلاردىڭ ەسەبىندە 18 مىڭنان استام ادام تىركەلگەن. بىراق رەسمي تۇردە تىركەلمەگەن ازاماتتاردىڭ سانى بۇدان دا كوپ.
«ەلىمىزدە 2023 جىلى 1 ملن گراممنان استام ەسىرتكى تاركىلەنسە, بۇل كورسەتكىش 2024 جىلدىڭ 8 ايىندا 900 مىڭ گراممعا جەتكەن. ەسىرتكىنى ساتۋعا بايلانىستى 3 145 ادام قىلمىس جاساپ ونىڭ 2 560 سوتتالىپ كەتكەن. بۇل قارقىنمەن 10 جىلدا 1 اۋىلدىڭ تۇرعىندارىنا تەڭ ادام سوتتالىپ كەتپەك. قازىردىڭ وزىندە 37 مىڭنان استام سوتتالعانداردىڭ 8%-ى ەسىرتكى قىلمىسىنا قاتىستى جازاسىن وتەپ وتىر. ەسىرتكى قىلمىسىنىڭ جەتەگىنە ەرگەن ازاماتتاردىڭ جاس مولشەرىنىڭ 16-17 جاسقا تومەندەۋى مەن ايەل قىلمىسكەرلەردىڭ سانىنىڭ ءوسۋى ءتىپتى الاڭداتادى», دەدى رۋسلان بەردەنوۆ.
ماجىلىسمەن اتاپ وتكەندەي, ەلىمىزدە ناشاقورلىق جانە ەسىرتكى بيزنەسىنە قارسى كۇرەس جۇرگىزىلىپ جاتسا دا, وڭ ناتيجە جوق.
«وسى تۇستا حالىقتى بىرنەشە ساۋال تولعاندىرادى. ەڭ الدىمەن, ەلىمىزدىڭ ايماقتارىندا جاسىرىن ەسىرتكى لاباراتوريالارى قارقىندى جۇمىس ىستەيتىنى جانە ولاردى ءتۇرلى ورگاندار مەن شەندىلەر قورعايتىنى تۋرالى پىكىر قالىپتاسقان. وسى باعىتتا تەكسەرۋ جۇمىستارىن ۇيىمداستىرۋ قاجەت. ەسىرتكىنىڭ ەلگە اكەلىنۋ كوزدەرىنىڭ ءبىرى - شەكارا بولعاندىقتان, شەكارا قىزمەتى قاجەتتى ماتەريالدىق-تەحنيكالىق قۇرالدارمەن قانشالىقتى ساپالى جابدىقتالعان؟ ەسىرتكى ساتۋ ىسىندە قولدانىلاتىن شەتەلدىك مەسسەندجەرلەردە ەسىرتكى ساتۋدى ۇيىمداستىرۋشىلار تۋرالى قانشا ۇسىنىس جولدانىپ, قانشاسى قولداندى؟ ونىڭ قانشاسى قاراۋسىز قالدى؟ ولارمەن ىنتىماقتاستىق قاي دەڭگەيدە؟ ەسىرتكىنىڭ جاڭا تۇرلەرىن انىقتايتىن زاماناۋي سوت ساراپتاماسى ورگاندارىنىڭ ماتەريالدىق-تەحنيكالىق جابدىقتالۋى جانە ساراپتاما مەرزىمىن قىسقارتۋ جۇمىسى قانشالىقتى تولىق اتقارىلىپ جاتىر؟ ءبىز ەسىرتكىمەن كۇرەستى قارجى ساۋاتى تومەن, ءبىلىمى جوق, الەۋمەتتىك جاعدايى ناشار «زاكلادچيكتەرمەن» عانا شەكتەلىپ وتىرمىز با؟ قوعام جاس بالالارعا ەسىرتكى ساتۋعا يتەرمەلەپ وتىرعان قىلمىستىق توپتاردىڭ ۇستالعانى تۋرالى نەگە ەستىمەيدى؟», دەپ سۇرادى دەپۋتات.
رۋسلان بەردەنوۆ ناشاقورلىققا جانە ەسىرتكى بيزنەسىنە قارسى كۇرەسكە باعىتتالعان بەس جىلدىق كەشەندى جوسپاردا ىشكى ىستەر, ادىلەت, دەنساۋلىق ساقتاۋ, عىلىم جانە جوعارى ءبىلىم, وقۋ-اعارتۋ, تسيفرلىق دامۋ مينيسترلىكتەرى, شەكارا قىزمەتى مەن ۇلتتىق قاۋىپسىزدىك كوميتەتىنە ناقتى شارالاردى بەكىتىپ, الدىن الۋ, سەبەپتەرىن انىقتاۋ جانە سالدارىمەن كۇرەسۋگە قاتىستى تولىقتىرۋلاردى بىرلەسىپ ەنگىزۋدى ۇسىندى.
