باعىتى اقپاراتتىق سايتتاردان بولەك مۋتيمەديالىق دەرەكتەر بازاسىنىڭ تانىستىرىلىمى استانادا ءوتىپ, تاقىرىپقا ساي فوتوكورمە اشىلدى. سايتتىڭ اتاۋىمەن ۇيىمداستىرىلعان كورمەدە جوبانىڭ دەرەكقورىنا ەنگەن اڭ-قۇستاردىڭ جاقىننان الىنعان فوتوسۋرەتتەرى تىزىلگەن. كورمەنىڭ اشىلۋ سالتاناتىنا وسى جوبانى ۇيلەستىرۋ ءۇشىن ەل-جەر ارالاپ, تاۋ-تاس كەزگەن كاسىپقوي فوتوگرافتار دا قاتىستى. ەندى ساپالى سۋرەتتەر توپتاستىرىلعان كورمەنى قالا تۇرعىندارى مەن قوناقتارى «سارىارقا» ويىن-ساۋىق ورتالىعىنىڭ 2-قاباتىندا 25 قىركۇيەككە دەيىن تاماشالاي الادى.
جوبا اۆتورلارىنىڭ ايتۋىنشا, سايت زوولوگيا باعىتىندا تالاپتانىپ جۇرگەن جاستاردىڭ عىلىمعا قىزىعۋشىلىعىن وياتىپ قويماي, ەلىمىزدىڭ بيولوگيالىق الۋان تۇرگە باي فاۋناسىن ساقتاۋدىڭ ماڭىزىن جۇرتشىلىققا ناسيحاتتايتىن تاپتىرماس قۇرال بولۋعا ءتيىس. جوبانى «EcoForming» ەكولوگيا جانە ءبىلىم بەرۋ قورى «شەۆرون» كومپانياسىنىڭ دەمەۋشىلىگىمەن, قازاقستاننىڭ زوولوگيا ينستيتۋتى جانە «National Geographic Qazaqstan» جۋرنالىنىڭ قولداۋىمەن ىسكە اسىرادى.
اۆتورلار وسى سايت ارقىلى ەلىمىزدە مەكەن ەتەتىن جانۋارلار دۇنيەسىن تابيعاتقا جاناشىر قاۋىمعا جاقىنىراق تانىتىپ, اڭدار مەن قۇستاردىڭ بىرەگەي فوتولارىن ۇسىنادى. سايتتا ءاربىر تىرشىلىك يەسىنىڭ ءتۇر-سيپاتى مەن ەرەكشەلىكتەرىن تانىتاتىن جوعارى ساپالى پورترەتتىك فوتولاردان بولەك, ەنتسيكلوپەديالىق شاعىن اقپاراتتار ۇسىنىلادى. فوتوگالەرەيا جوبا بارىسىندا ءالى سان ءتۇرلى جاڭا فوتوسۋرەتتەرمەن تولىعادى.
«EcoForming» قورىنىڭ وكىلى قانات اباشەۆتىڭ ايتۋىنشا, «قازاقستاننىڭ تۇمسا تابيعاتى» ۆەب-سايتى كەلەشەكتە ستۋدەنتتەر مەن وقۋشىلارعا عانا ەمەس, ەلىمىزدىڭ فاۋناسىن زەرتتەۋگە قىزىعاتىندار ءۇشىن دە كورنەكتى ءارى باعالى دەرەكقور قىزمەتىن اتقارادى.
– ءيا, بۇل سايت ۇزاقمەرزىمدى جوبا. سايتقا ەلىمىزدىڭ ءار ايماعىندا كەزدەسەتىن جانۋارلاردىڭ تابيعاتتا تۇسىرىلگەن ساپالى پورترەتتىك فوتوسۋرەتى شاعىن اقپاراتتارمەن قوسىپ جاريالانىپ وتىرادى. جوباعا كاسىبي شەبەر فوتوگرافتار قاتىستى. ولاردىڭ ەڭبەكتەرىن كورىپ ءتانتى بولاسىڭ, سۇيسىنەسىڭ. سايت اۋەلدەگى ماقساتتان اينىماي, دامي بەرەدى دەگەن ۇمىتتەمىز, – دەيدى ق.اباشەۆ.
دەرەكتەر بازاسى ەندى اشىلىپ, العاشقى فوتوسۋرەتتەر جۋىردا عانا جاريالانعانىمەن, جوبانىڭ جۇمىسى ودان ەرتەرەك باستالىپ كەتكەن. الدىمەن كاسىبي فوتوگرافتار ەلدەگى ەڭ ءىرى سانالاتىن الماتى مەن قاراعاندى قالاسىنداعى حايۋاناتتار باعىنا بارعان. وندا كاسىبي ماماندار جويىلۋدىڭ الدىندا تۇرعان, وتە سيرەك كەزدەسەتىن اڭداردى تۇسىرگەن. فوتوگرافتار مۇنىمەن توقتاماي, اقمولا وبلىسىنداعى «قورعالجىن» قورىعىنداعى قۇستاردى اپتا بويى باقىلاعان. كەيىن الاكول, زايسان, ىلە-بالقاش رەزەرۆاتتارىنا, «التىنەمەل» ۇلتتىق تابيعي پاركىنە بارىپ, اڭ-قۇستاردىڭ بەينەسىن مەيلىنشە جاقىننان الۋعا تىرىسقان. ءسويتىپ, فوتوگرافتار 150-دەن استام اڭ مەن قۇستىڭ ساپالى سۋرەتىن سايلاعان. وسىنىڭ ىشىندە شامامەن 70-كە جۋىق فوتوسۋرەت جاڭادان اشىلعان سايتقا جاريالانعان.
– سايت قازاق, ورىس, اعىلشىن تىلىندە وقىرماندارعا قولجەتىمدى. قۇرىلىمى سۇتقورەكتىلەر, قۇستار, باۋىرىمەن جورعالاۋشىلار, قوسمەكەندىلەر, بالىقتار, جاندىكتەر دەپ, 6 ساناتقا بولىنگەن. ياعني مۇندا ەلىمىزدە كەزدەسەتىن ءاربىر اڭ-قۇس, جاندىكتەر بيولوگيالىق تۇرگە قاراي بولەك-بولەك توپتاستىرىلعان. مىسالى, سايتتا سۇرقورەكتىلەردى اشاتىن بولساڭىز, مونيتورعا سۇتقورەكتىلەردىڭ ءتۇر-ءتۇرى شىعا كەلەدى. ولاردىڭ ءتۇرىن, قايدا مەكەندەيتىنىن, سانىن ءبارى-ءبارىن ەنتسيكلوپەديالىق اقپاراتتان وقىپ قانىعا الاسىزدار. بۇل – وقىرمانداردىڭ بەلگىلى ءبىر جانۋار ءتۇرىن لەزدە تابۋىنا جاردەمدەسەدى. ەل اۋماعىندا ۇيا باساتىنى بار, جىل قۇستارى, وتپەلى قۇستار – ءبارىن قوسقاندا 500-دەن اسا قۇستىڭ ءتۇرى كەزدەسەدى ەكەن. ال وعان دالانىڭ اڭدارىن قوسساق, تاعى بىرازعا بارىپ قالادى. ءبىز سول اڭ-قۇستى تۇگەندەپ, ساپالى فوتوسۋرەتتەرىن جاريالاۋعا كىرىستىك. ءالى الدا اتقاراتىن جۇمىس كوپ. كوپشىلىككە قولجەتىمدى سايت وقۋشىلارعا, ستۋدەنتتەرگە جانە جالپى تابيعات جاناشىلارىنا پايدالى بولادى دەگەن ۇمىتتەمىز, – دەيدى بەلگىلى جۋرناليست, «National Geographic Qazaqstan» جۋرنالىنىڭ جاۋاپتى رەداكتورى ايبىن شاعالاق.
ەسكەرەتىن جايت, سايتقا تەك ەلدىڭ ايماعىندا كەزدەسەتىن اڭ-قۇستاردىڭ ساپالى فوتوسى مەن دەرەكتەرى جاريالاندى. جوبا ۇيلەستىرۋشىلەرى الدا سايتتى تاعى كوپتەگەن فوتوسۋرەتپەن كومكەرىپ, دامىتىپ, جوعارى ساپالى بەينەجازبالارمەن تولىقتىرامىز دەپ وتىر. ەلىمىزدە العاش رەت اشىلعان باعىتى, ماقسات-مۇراتى بولەك سايت قولداۋشىلار مەن قولدانۋشىلار ءۇشىن تابىستى بولسىن دەپ تىلەيمىز.
