التىنكول – قورعاس وتكەلى قازاقستاننىڭ رەيتينگىن كوتەردى

قازاقستان مەن قىتاي شەكاراسىنداعى جاڭا التىنكول – قورعاس تەمىرجول وتكەلىنىڭ اشىلۋى قازاقستاننىڭ «DoingBusiness» الەمدىك بانكى («بيزنەستى جۇرگىزۋدىڭ جەڭىلدىگى») رەيتينگىندەگى 2015 جىلعى جاعدايىنا وڭ اسەر ەتتى. بۇل جونىندە الماتىدا وتكەن ەۋرازيا بيزنەس-فورۋمىندا ءاب «DoingBusiness» توبىنىڭ («بيزنەستى جۇرگىزۋ-2015»)  بايانداماشىسى يرينا بەلوتسەركوۆسكايا حابارلادى. – «بيزنەستى جۇرگىزۋ-2015» بايانداماسىندا ءبىز 2013 جىلدىڭ ماۋسىمى مەن 2014 جىلدىڭ ماۋسىمى ىشىندە 20 فۋتتىق كونتەينەرلەردىڭ قىتاي – الماتى ارالىعىنداعى ترانزيتتىك ۋاقىتىن قىسقارتقان «حالىقارالىق ساۋدا» كورسەتكىشىندەگى رەفورمانى اتاپ وتتىك. بۇعان جاڭا قورعاس وتكىزۋ نۇكتەسىنىڭ اشىلۋى ارقاسىندا قول جەتىپ وتىر. قازاقستان «حالىقارالىق ساۋدا» كورسەتكىشىندە 186-ورىننان 185-ورىنعا كوتەرىلدى, – دەدى ول ەسەپ بەرۋ بارىسىندا. الەمدىك بانكتىڭ وكىلى «حالىقارالىق ساۋدا» كورسەتكىشىن انىقتاعاندا ساراپشىلار ەكسپورت پەن يمپورت ۇدەرىسىنە اسەر ەتەتىن  ءارتۇرلى قۇرامدى بولىكتەردى, ونىڭ ىشىندە قۇجاتتاردى دايىنداۋدى, كەدەندىك رەسىمدەۋدى, تاسىمالداۋدى جانە پورتتاعى وپەراتسيالاردى  (جۇك تەڭىزبەن دە تاسىمالدانۋى مۇمكىن) نازارعا الادى دەدى. – قازاقستان جاعدايىندا الماتىدان قىتايدىڭ ليانيۋنگان,چينداو پورتتارىنا دەيىنگى مارشرۋت قاراستىرىلدى.  ورتالىق ازيا بويىنشا سۇرالعان رەسپوندەنتتەر جاڭا التىنكول – قورعاس تەمىرجول وتكەلىنىڭ اشىلۋىن وڭ باعالاپ, وسىعان بايلانىستى ەكسپورت پەن يمپورتتىڭ وسكەنىن اتاپ ءوتتى. بۇل وتكەل كونتەينەرلەردى وزىنە تارتۋ ارقىلى دوستىق – الاشاڭقاي مارشرۋتىن جەڭىلدەتىپ قانا قويماي جۇك تاسىمالداۋ ۋاقىتىن دا قىسقارتىپ وتىر. ناقتىراق ايتقاندا ەكسپورت بويىنشا دا, يمپورت بويىن­شا دا تاسىمالداۋ ۋاقىتى ەكى كۇنگە ازايدى, – دەدى بەلوتسەركوۆسكايا. قورعاستى الەمدىك بانك توبى حالىقارالىق ترانزيت ءۇشىن ورتالىق ازياداعى  ماڭىزدى جوبا دەپ ەسەپتەيدى. «ەگەمەن-اقپارات».