سۋرەتتى تۇسىرگەن – ەرلان ومار, «EQ»
كوشپەلىلەر ويىندارىندا قۇسبەگىلىكتەن ەكى كۇنگە جالعاسقان دودادا ۇلتتىق قۇراما سپورتشىلارى 2 التىن, 1 كۇمىس, 3 قولا مەدالدى ەنشىلەدى. قۇسبەگىلەر سايىسىندا جۇلدە العان ۇزدىكتەرگە فەدەراتسيا دەمەۋشىسى, كاسىپكەر تالعات ساقان قۇسبەگىلەر سەرىكبەك كۇنتۋعان مەن ەرزات بايقاداموۆقا اۆتوكولىك سىيلادى.
«بۇركىت سالۋ» ساناتىندا ءبىرىنشى ورىندى ۇلتتىق قۇراما مۇشەسى سەرىكبەك كۇنتۋعان يەلەندى. ونىڭ «العىر» اتتى قۇسى فينالدا 12 قۇستىڭ ىشىنەن ۇزدىك شىقتى. ەكى جاتتىعۋ بويىنشا وتكەن تارتىستا ەكىنشى ورىنعا «زاڭعار» دەگەن قۇسىمەن ەرزات بايقاداموۆ كوتەرىلسە, قولا مەدال «نارىن» اتتى بۇركىتىن توپقا قوسقان ارمان قوشقاروۆقا بۇيىردى.
«قارشىعا سالۋ» ساناتى بويىنشا ءبىرىنشى ورىندى «نايزاتۇياق» قۇسىمەن استانالىق قۇدايبەرگەن راۋيل ۇلى جەڭىپ السا, ەكىنشى ورىندى قىرعىزستان سپورتشىسى ادىلبەك قۇدايبەرديەۆ يەلەندى. ول «قارامونشاق» قۇسىمەن ونەر كورسەتتى. بۇل سايىستا جۇلدەنى تاعى ءبىر وتانداسىمىز باعدات كەۋەنوۆ «سومبالاق» قارشىعاسىمەن جەڭىپ الدى.
ۇلتتىق قۇرامانىڭ جىگىتتەرى «يتەلگى سالۋ» ساناتىندا دا جۇلدەسىز قالمادى. بۇل سىندا التىن, كۇمىس مەدال قىرعىزستان سپورتشىلارىنىڭ ەنشىسىندە قالسا, قولا مەدال ۇلتتىق قۇراما مۇشەسى باقداۋلەت باباجانعا بۇيىردى.
ءدۇبىرلى دودادا قۇسبەگىلىكتەن ەل قورجىنىنا مەدال سالعان ۇلتتىق قۇراما مۇشەلەرى دەمەۋشىلەردىڭ قولداۋىمەن كۇسبەگىلىك فەدەراتسياسى اتىنان ارنايى سىيلىقتارعا يە بولدى. ءۇشىنشى ورىن العان ارمان قوشقاروۆ, باعدات كەۋەنوۆ جانە باقداۋلەت باباجان 300 مىڭ تەڭگەدەن السا, ەكىنشى ورىندى جەڭىپ العان ەرزات بايقاداموۆقا 500 مىڭ تەڭگە سىياقى بۇيىردى. قارشىعا سالۋ ساناتى بويىنشا ءبىرىنشى بولعان قۇدايبەرگەن راۋيل ۇلى 1 ملن تەڭگە سىياقى الدى. سونداي-اق قۇسبەگىلىكتەن جۇلدەلى بولعان سپورتشىلارعا دەمەۋشىلەردىڭ ەسەبىنەن باسقا دا سىي-سياپات كورسەتىلدى.
