ەلىمىزدەگى تۇڭعىش ءارى ەڭ ۇزىن تۋننەل رەتىندە اتالىپ وتىرعان, جول بويىنداعى جوتانى تەسىپ جاسالعان نىسان قۇرىلىسى 10 جىلعا جۋىق ۋاقىتقا سوزىلعان ەدى. قۇرىلىس جۇمىستارىنىڭ ۇزاققا سوزىلۋى پاندەميا كەزىندە كەرەكتى قۇرىلىس زاتتارىن اكەلۋ, تاپسىرىس بەرۋدە قيىندىق تۋىنداعانىمەن بايلانىستىرىلىپ وتىر. تۇلكىباس اۋدانى شاقپاق بابا اۋىلىنىڭ ماڭىندا ورنالاسقان حالىقارالىق ماڭىزى بار اۆتوجول تۋننەلىنىڭ اشىلۋ سالتاناتىنا كولىك ۆيتسە-ءمينيسترى ءساتجان ابلاليەۆ, تۇركىستان وبلىسى اكىمىنىڭ ءبىرىنشى ورىنباسارى زۇلپىحار جولداسوۆ, جامبىل وبلىسى اكىمىنىڭ ورىنباسارى قاناتبەك مادىبەك, سالا ماماندارى مەن ەكى وبلىستىڭ اقساقالدارى قاتىستى. تۇرعىنداردى قۋانىشىمەن قۇتتىقتاعان ۆيتسە-مينيستر سالادا اتقارىلىپ جاتقان جۇمىستاردى ايتىپ ءوتتى. «بۇگىن اشىلعاننان كەيىن نەگىزگى كولىك اعىنى شاقپاق بابا ەلدى مەكەنىنىڭ اينالما جولىنا باعىتتالدى. بۇل ەلدى مەكەننىڭ ىشىندەگى جول قاۋىپسىزدىگىن ارتتىرۋعا سەپتىگىن تيگىزبەك. سونىمەن قاتار نىسان قىستا جۇرگىزۋشىلەردىڭ شاقپاق بابا اسۋىندا قار قۇرساۋىندا قالىپ قويماۋىنا مۇمكىندىك بەرەدى. بۇل جەردە تۋننەل سالىنباعان جاعدايدا جولدىڭ ەڭىستىگى 45 مەترگە دەيىن جوعارى شىعۋ كەرەك ەدى. بۇل وسىنداعى قوزعالىس جىلدامدىعىن ساعاتىنا 20-30 شاقىرىمعا دەيىن تومەندەتەدى. سودان كەيىن 45 ويىق جاساۋدى ويلاعانبىز. بىراق ونى بوران بولعان كەزدە باسىپ قالۋى مۇمكىن ەدى. ەندى سول كەدەرگىلەر, تاۋەكەلدەر بولمايدى», دەدى ۆيتسە-مينيستر ءساتجان ابلاليەۆ. ال تۇركىستان وبلىسى اكىمىنىڭ ءبىرىنشى ورىنباسارى زۇلپىحار جولداسوۆ نىساندى پايدالانۋعا بەرۋ ارقىلى جول قوزعالىسىنىڭ قاۋىپسىزدىگى قامتاماسىز ەتىلەتىنىن جانە وڭىردەگى جولاۋشىلار اعىنى مەن جۇك اينالىمى ارتىپ, ءتۋريزمنىڭ دامۋىنا اسەرىن تيگىزەتىنىن اتاپ ءوتتى.
اۆتوجول تۋننەلى الدىمەن ءتۇرلى سىناقتان وتكەن. ارنايى جاتتىعۋلار شەڭبەرىندە تۋننەلدىڭ قاۋىپسىزدىك جۇيەلەرى, سونىڭ ىشىندە جەلدەتۋ جانە ءورت ءسوندىرۋ جۇمىستارى سىنالعان. سونداي-اق توتەنشە جاعداي كەزىندە كولىك قۇرالدارىن جەدەل سۇيرەۋ جانە جول-پايدالانۋ تەحنيكاسىنىڭ قوزعالىسىن ۇيىمداستىرۋ بويىنشا ءىس-ارەكەتتەر پىسىقتالىپتى. قاۋىپسىزدىكتى قامتاماسىز ەتۋ ماقساتىندا تۋننەلدىڭ ەكى جاعىندا جارىقتاندىرۋ, جەلدەتۋ, دابىل بەرۋ جانە باعدارشامداردى رەتتەۋ ۇدەرىستەرىن باسقاراتىن ديسپەتچەرلىك پۋنكتتەر قاراستىرىلعان. سونىمەن قاتار ناقتى ۋاقىت رەجىمىندە باقىلاۋعا مۇمكىندىك بەرەتىن بەينەباقىلاۋ جانە ورتتەن قورعاۋ جۇيەلەرى ورناتىلعان. تۋننەلدىڭ جانىندا جۇرگىزۋشىلەر مەن جولاۋشىلار ءۇشىن جول جوندەۋ پۋنكتى, جانارماي قۇيۋ بەكەتى, تىكۇشاق الاڭدارى جانە ساۋدا ايماقتارى قاراستىرىلعان. تۋننەلدى سىرتتان باسقارۋعا بولادى. قانداي دا ءبىر توتەنشە جاعداي بولعاندا ساناۋلى سەكۋندتا نىساندى جاۋىپ, كومەك كورسەتۋگە مۇمكىندىك بار. «كولىك كوپ جۇرەتىن بولعاندىقتان, ولاردان بولىنەتىن ۋلى گازدار, تابيعي گازدار جينالماس ءۇشىن ۇلكەن جەلدەتكىشتەر ىسكە قوسىلادى. مۇنى قولمەن دە قوسۋعا بولادى, ءوزى اۆتوماتتى تۇردە تۇندە اۋانى تازالاپ تۇرادى. تۋننەل ىشىندە سەزگىش قۇرالدار بار. ولار گازدىڭ ءيىسىن سەزسە, بىردەن سىرتقا شىعارادى. ىشتە ءتۇتىن جينالماۋ كەرەك. ويتكەنى ءورت قاۋپى بار», دەيدى وپەراتور باۋىرجان وسپان. جاڭا تۋننەل ەكى وبلىستىڭ عانا ەمەس, كورشىلەس ەلدەردىڭ كولىك-لوگيستيكالىق جۇيەسىنە وڭ اسەرىن تيگىزەدى دەپ جوسپارلانعان.
سالتاناتتى جيىن بارىسىندا كولىك ۆيتسە-ءمينيسترى ءساتجان ابلاليەۆ وسى سالانىڭ دامۋىنا ەلەۋلى ۇلەس قوسىپ, ايانباي ەڭبەك ەتىپ جۇرگەن ءبىر توپ ازاماتقا توسبەلگى تاعىپ, العىسحاتتارمەن ماراپاتتادى.
ايتا كەتەيىك, تۇركىستان وبلىسىندا بيىل اۆتوموبيل جولدارى سالاسىن دامىتۋعا رەسپۋبليكالىق جانە وبلىستىق بيۋدجەتتەن 41,4 ملرد تەڭگە ءبولىنىپ, قۇرىلىس-جوندەۋ جۇمىستارىمەن جالپى 1061,3 شاقىرىمدى قۇرايتىن جولدار مەن كوشەلەر قامتىلدى. جىل قورىتىندىسىمەن 559,6 شاقىرىم جول پايدالانۋعا بەرىلمەك.
تۇركىستان وبلىسى
