قايتارىمسىز گرانتتىڭ سومماسى – 400 اەك (1 476 800 تەڭگە) شاماسىندا. بيىل مال شارۋاشىلىعىنا – 2 331, وسىمدىك شارۋاشىلىعىنا – 101, قۇرال-سايمان, ەڭبەك قۇرالدارىن ساتىپ الۋعا – 2 425, تەحنولوگيالىق جابدىقتاردى ساتىپ الۋعا – 3 941, ورىن جايدى جالعا الۋعا – 143 قايتارىمسىز گرانت بەرىلگەن. گرانت العانداردىڭ تىزىمىندە كوپبالالى وتباسىلاردىڭ مۇشەلەرىنە – 5 646, مۇگەدەكتىگى بار ادامدارعا – 1 446, مۇگەدەكتىگى بار بالالاردى تاربيەلەپ وتىرعان اتا-انالارعا – 1 045, اتاۋلى الەۋمەتتىك كومەك الۋشىلارعا – 253, اسىراۋشىسىنان ايىرىلۋ بويىنشا تولەم الۋشىلارعا – 365, قونىس اۋدارۋشىلارعا – 151 جانە قانداستارعا – 35 گرانت بەرىلدى.
بيىل گرانتتار الۋعا وتىنىشتەردى قابىلداۋ 2 لەك بويىنشا ءوتتى. ۇمىتكەرلەردەن باس-اياعى 30 مىڭنان استام ءوتىنىش تۇسسە, ونىڭ ىشىندە كوپبالالى وتباسىلاردان – 19,4 مىڭ, مۇگەدەكتىگى بار ادامداردان – 4,7 مىڭ, مۇگەدەكتىگى بار بالاعا كۇتىم جاسايتىن ادامداردان – 3,5 مىڭ, اتاۋلى الەۋمەتتىك كومەك الۋشىلاردان – 758 ءوتىنىش قابىلداعان. سونداي-اق اسىراۋشىسىنان ايىرىلعان ازاماتتار قاتارىنان – 1,1 مىڭ ادام, 289 قونىس اۋدارۋشى جانە 169 قانداس ءوتىنىش بەرگەن.
وتىنىمدەردىڭ ەڭ كوبى تۇركىستان (5,4 مىڭ), قىزىلوردا (3,3 مىڭ), جامبىل (3 مىڭ) وبلىستارى مەن شىمكەنت قالاسىنىڭ (2,4 مىڭ), ال ەڭ از سانى ۇلىتاۋ (221) جانە قوستاناي (490) وبلىستارىنىڭ ۇمىتكەرلەرىنەن تۇسكەن. ەسكە سالار بولساق, گرانتتاردى ەڭبەك موبيلدىلىگى ورتالىقتارى ۇمىتكەرلەردىڭ وتىنىشتەرىن قاراۋ جونىندەگى اۋداندىق, قالالىق كوميسسيانىڭ شەشىمى نەگىزىندە بەرەدى. ول ءۇشىن ۇمىتكەرلەر وزدەرىنىڭ بيزنەس-جوبالارىن كوميسسيا وتىرىستارىندا تانىستىرادى. كوميسسيا وتىرىسىنىڭ وتكىزىلەتىن ورنى, كۇنى مەن ۋاقىتى تۋرالى حابارلاما Business.enbek.kz پورتالىندا گرانت الۋعا ءوتىنىش بەرۋشىنىڭ جەكە كابينەتىندە جاريالانادى. بۇل رەتتە كوميسسيانىڭ ءاربىر مۇشەسى بيزنەس-جوسپاردى باعالايدى. ول باعالاۋ پاراعىن ارنايى كريتەريلەر بويىنشا تولتىرادى. ياعني كوميسسيا بيزنەس-يدەيانىڭ باسەكەگە قابىلەتتىگىن, قايدا وتكىزەتىنىن, بيزنەس-جوبانىڭ قارجىلىق ومىرشەڭدىگىن, كاسىپكەرلىك داعدىلاردىڭ دەڭگەيىن جانە جاڭا جۇمىس ورىندارىن قۇرۋعا قابىلەتىن قارايدى. وسىلايشا, گرانت بەرۋ تۋرالى شەشىمدى كوميسسيا ۇمىتكەرلەردىڭ بيزنەس-جوبالارىن باعالاۋدىڭ ناقتى كريتەريلەرى نەگىزىندە قابىلدايدى.
كوميسسيانىڭ شەشىمى تۋرالى اقپارات ۇمىتكەردىڭ Business.enbek.kz پورتالىنداعى جەكە كابينەتىنە جىبەرىلەدى. كوميسسيا وڭ شەشىم قابىلداعان جاعدايدا ۇمىتكەر سالىق ورگاندارىندا ءوز قىزمەتىن تىركەيدى, بانكتىك دەرەكتەمەلەردى ۇسىنادى, شارتقا قول قويادى جانە ودان ءارى توقسان سايىن بولىنگەن قاراجاتتىڭ پايدالانىلۋى تۋرالى ەسەپتەردى ۇسىنادى. ءبىر جاقسىسى, مۇنىڭ بارلىعىن ۇمىتكەرلەر ەڭبەك موبيلدىلىگى ورتالىقتارىنا بارماي-اق, ەلەكتروندىق فورماتتا ۇيلەستىرە الادى.
تاعى ءبىر ماڭىزدى دەرەكتەرگە زەر سالساق, جىل باسىنان بەرى ەلىمىزدە جۇمىسپەن قامتۋعا جاردەمدەسۋ شارالارىنا 448,7 مىڭ ازامات قاتىسىپتى. 338,4 مىڭ ادام جۇمىسپەن قامتىلسا, ونىڭ 175,9 مىڭى تۇراقتى جۇمىسقا ورنالاسقان. سۋبسيديالاناتىن جۇمىس ورىندارىنا 162,4 مىڭ ادام قابىلدانعان. ونىڭ ىشىندە الەۋمەتتىك جۇمىس ورىندارىندا – 14,2 مىڭ ادام, جاستار پراكتيكاسىندا – 21 مىڭ ادام, قوعامدىق جۇمىستاردا – 101,4 مىڭ ادام, «العاشقى جۇمىس ورنى» جوباسى اياسىندا – 7,9 مىڭ ادام, «ۇرپاقتار كەلىسىمشارتى» جوباسى اياسىندا – 326 ادام, «كۇمىس جاس» جوباسى اياسىندا – 17,6 مىڭ ادام جۇمىسپەن قامتىلىپتى. ەڭبەك نارىعىندا سۇرانىسقا يە داعدىلار بويىنشا ونلاين وقىتۋمەن 43,8 مىڭ جۇمىسسىز قامتىلسا, ونىڭ 39,7 مىڭى وقۋدى ءساتتى اياقتادى. «باستاۋ بيزنەس» جوباسى بويىنشا كاسىپكەرلىك نەگىزدەرىنە وقىتۋمەن 50,6 مىڭ ادام قامتىلسا, 33,5 مىڭ ادام وقۋدى اياقتاپ, قولىنا سەرتيفيكاتىن العان.
