مۇنداي كادەسىي كىتاپتاردىڭ قاتارىندا الىشەر ناۋايدىڭ «فارحاد-شىرىن» داستانى, انتون چەحوۆتىڭ اڭگىمەلەر جيناعى دا بار.
مۇراجايداعى ەڭ قۇندى جادىگەردىڭ ءبىرى – ابايدىڭ 1945 جىلى ماسكەۋدە مۇحتار اۋەزوۆتىڭ العىسوزىمەن ورىس تىلىندە جارىق كورگەن تاڭدامالى شىعارمالار جيناعى. بۇل كىتاپقا ۇلى اقىننىڭ قىرىق شاقتى ولەڭى مەن «ماسعۇت», «ەسكەندىر», ء«ازىم اڭگىمەسى» پوەمالارى, قارا سوزدەرى مەن دانا سوزدەرى ەنگەن.
مۋزەيدىڭ ءبىر بۇرىشىن الەم ادەبيەتى جاۋحارلارىنىڭ تۇپنۇسقاسىنان دالمە-ءدال كوشىرىلگەن رەپرينتتى باسىلىمدار, اعىلشىن, نەمىس, فرانتسۋز, تاتار تىلىندەگى كىتاپتار, كونە ەنتسيكلوپەديالىق سوزدىكتەر تولىقتىرىپ تۇر. ال ولكەتانۋعا ارنالعان بولىمگە توبىل-تورعاي وڭىرىندە تۋعان بەلگىلى قالامگەرلەردىڭ شىعارمالارى قويىلعان. مۋزەيدە ءار كەزدەرى قوستانايعا ات باسىن تىرەگەن كورنەكتى جازۋشىلاردىڭ قولتاڭباسى قالعان كىتاپتار دا بارشىلىق.
«قاتەلەسپەسەم, 1994 جىلى قوستانايعا شىڭعىس ايتماتوۆ كەلدى. وسى جەردە ۇلكەن كەزدەسۋ ءوتتى. شىعارماشىلىق كەشتەن كەيىن ۇلى جازۋشى بىزگە ءوزىنىڭ «بوراندى بەكەت», «جانپيدا» روماندارى ەنگەن جيناعىن تارتۋ ەتىپ, كىتاپتىڭ ىشكى مۇقاباسىنا قولتاڭبا جازىپ بەردى. كورنەكتى اقىن ءماريام حاكىمجانوۆانىڭ قولتاڭباسى بار كىتاپ تا مۋزەيدىڭ قۇندى جادىگەرلەرىنىڭ قاتارىندا تۇر. ال مىنا ەنتسيكلوپەديالىق سوزدىك 1890 جىلى باسىلىپ شىققان. مىناۋ – 1805 جىلى شىققان ورىس ءتىلى وقۋلىعى. ۇلى كلاسسيكتەردىڭ كوزى تىرىسىندە جارىق كورگەن كىتاپتار دا بار. مىسالى, ۆيكتور گيۋگونىڭ «پاريج قۇداي-اناسىنىڭ عيباداتحاناسى» اتتى مىنا كىتابى جازۋشىنىڭ كوزى تىرىسىندە باسىلىپ شىققان. بۇل كىتاپتار, كەم دەگەندە, وسىدان ەكى عاسىر بۇرىن جارىققا شىققان. كونە كىتاپتارعا رەستاۆراتسيا جاساۋ وتە قىمباتقا تۇسەدى. بىزدە ونداي مۇمكىندىك جوق. سوندىقتان مۋزەي جادىگەرلەرىن قولمەن ۇستاۋعا رۇقسات ەتپەيمىز», دەيدى وبلىستىق كىتاپحانا ىشىندەگى ولكەتانۋ ادەبيەتى ءبولىمىنىڭ مامانى سۆەتلانا قابيەۆا.
قوستاناي وبلىسى
