وبلىستىق پوليتسيا دەپارتامەنتى باستىعىنىڭ ءبىرىنشى ورىنباسارى قۇرمەت ماجىكەنوۆتىڭ ايتۋىنشا, پوليتسيا قىزمەتكەرلەرى ءوڭىر اۋماعىندا جاسوسپىرىمدەردىڭ قاۋىپسىزدىگىن قامتاماسىز ەتۋ, اكىمشىلىك قۇقىق بۇزۋشىلىقتىڭ الدىن الۋ ماقساتىندا كوپتەگەن ءىس-شارا وتكىزگەن. ناتيجەسىندە, وڭىردەگى قىلمىس سانى ءبىرشاما ازايعان.
دەپارتامەنت باسشىسىنىڭ ءبىرىنشى ورىنباسارى كەلتىرگەن دەرەك ستاتيستيكالىق تۇرعىدا كوڭىل كونشىتكەنىمەن, كەيبىر مالىمەت ويلاندىرماي قويمايدى. ماسەلەن, كامەلەت جاسىنا تولماعان بالانى تاربيەلەۋ, ولاردىڭ قۇقىقتارى مەن مۇددەلەرىن قورعاۋ جونىندەگى مىندەتتەمەنى ورىنداماعان جۇزدەگەن اتا-انا جاۋاپكەرشىلىككە تارتىلىپتى.
«بالا تاربيەسىنە نەمقۇرايدى قارايتىن 160 وتباسى انىقتالىپ وتىر. سونداي-اق قۇقىق بۇزۋشىلىققا جول بەرگەن 382 ءجاسوسپىرىم پوليتسيانىڭ ەسەبىنە الىندى. دەۆيانتتىق تاربيەدەگى مىنەز-قۇلقىنا بايلانىستى 18 ءجاسوسپىرىم ارنايى رەجىمدەگى مەكتەپكە ورنالاستىرىلدى. سونداي-اق 50 ازامات اتا-انا قۇقىعىنان ايىرىلدى نەمەسە شەتتەتىلدى. بۇدان بولەك, 225 ءجاسوسپىرىم بەيىمدەۋ ورتالىعىنا جونەلتىلدى», دەيدى ق. ماجىكەنوۆ.
وڭىردە جاسوسپىرىمدەردىڭ قىلمىسى ءبىرشاما ازايعانىنا قاراماستان, كەيبىر ستاتيستيكالىق كورسەتكىشتىڭ ارتقانىن اڭعارۋ قيىن ەمەس. ماسەلەن, پوليتسيانىڭ ەسەبىنە الىنعان جاسوسپىرىمدەردىڭ سانى وتكەن جىلدىڭ مەجەلى مەرزىمىندە 343 بولسا, وسى جىلى 382-گە جەتكەن. ال بالا تاربيەسىنە نەمقۇرايدى قارايتىن وتباسىلاردىڭ سانى وتكەن جىلى 155-كە جەتسە, بيىل 160-تى قۇراپ وتىر. سونداي-اق بەيىمدەۋ ورتالىعىنا ورنالاستىرىلعان جاسوسپىرىمدەردىڭ سانى 3-كە ارتقان. وسى كورسەتكىشتەر كىمدى دە بولسىن ويلاندىرماي قويمايدى.
«جالپى العاندا, كامەلەت جاسىنا تولماعان بالانى تاربيەلەۋ, ولاردىڭ قۇقىقتارى مەن مۇددەلەرىن قورعاۋ جونىندەگى مىندەتتەمەنى ورىنداماعانى ءۇشىن اكىمشىلىك كودەكستىڭ 127-بابىمەن 617 اتا-انا جاۋاپكەرشىلىككە تارتىلدى. سونداي-اق تۇنگى ۋاقىتتا كوشەدە ۇلكەندەردىڭ قاراۋىنسىز جۇرگەن 5468 ءجاسوسپىرىم انىقتالدى. وسىعان بايلانىستى اكىمشىلىك كودەكستىڭ 442-بابىنا سايكەس اتا-انالاردىڭ جاۋاپكەرشىلىگى قارالدى. ساعات تۇنگى 22.00-دەن كەيىن ويىن-ساۋىق ورىندارىندا بالالاردىڭ زاڭدى وكىلىنسىز بولۋىنا جول بەرگەن 156 مەكەمە يەلەرى زاڭ اياسىندا جاۋاپكەرشىلىككە تارتىلدى», دەيدى ق.ماجىكەنوۆ.
قالاي دەسەك تە, جاسوسپىرىمدەردىڭ ماسەلەسى قوعامدى تولعاندىرماي قويمايتىنى انىق. ولاردىڭ قاۋىپسىزدىگىن قامتاماسىز ەتۋگە جەرگىلىكتى اتقارۋشى بيلىك پەن قۇقىق قورعاۋ ورگاندارى مىندەتتى بولعانىمەن, اتا-انالار دا جاۋاپكەرشىلىك جۇگىن سەزىنگەنى ءجون. ولاي بولماعان جاعدايدا ماسەلە ۋشىعا بەرەتىن سەكىلدى.
جامبىل وبلىسى
