«ENAEE» – ەۋروپانىڭ, وڭتۇستىك جانە سولتۇستىك امەريكا مەن ورتالىق جانە وڭتۇستىك-شىعىس ازيانىڭ جيىرمادان استام اگەنتتىگىن قامتيتىن جەتەكشى ەۋروپالىق ينجەنەرلىك ءبىلىم بەرۋ اككرەديتتەۋ جەلىسى. «ENAEE Authorized Agency Award 2024» بايقاۋىندا ينجەنەرلىك ءبىلىم ساپاسىن قامتاماسىز ەتۋگە جانە ينجەنەرلەردى دايارلاۋعا ۇلەس قوسقان كوماندا جەڭىمپاز دەپ تانىلدى.
ورتالىق ازيا ءبىلىم جۇيەسىن اككرەديتتەۋ قاۋىمداستىعىنىڭ پرەزيدەنتى, پروفەسسور ءابدىمۇتالىپ ءابجاپپاروۆتىڭ ايتۋىنشا, ەشقانداي بالاماسى جوق «ENAEE» بايقاۋى بيىل العاش رەت ءوتىپ وتىر.
ورتالىق ازيانىڭ ءبىلىم جۇيەسىن اككرەديتتەۋ قاۋىمداستىعى ەۋروپالىق وداقتىڭ «ورتالىق ازياداعى ينجەنەرلىك ءبىلىم ساپاسى» جوباسى اياسىندا قۇرىلعان ەدى. بۇل جوباعا ەلىمىزدەن بولەك, وزبەكستان, قىرعىزستان, تاجىكستان, سونداي-اق يتاليا, بەلگيا, گەرمانيا, پورتۋگاليا جانە ۇلىبريتانيادان كەلگەن سەرىكتەستەر قاتىستى. باسىنان باستاپ ءبىزدىڭ ماقساتىمىز ورتالىق ازيا جوعارى وقۋ ورىندارىنىڭ ەۋروپالىق سەرىكتەستەرمەن تىعىز قارىم-قاتىناسى مەن اككرەديتتەۋ ستاندارتتارىن «ENAEE» حالىقارالىق تالاپتارىمەن سايكەستەندىرۋ بولدى. ءبىز ءبىلىمىمىزدى ەڭ جوعارى حالىقارالىق ستاندارتتارعا ساي ۇستاۋعا تىرىسامىز. قازىر «ENAEE» قۇرامىنا اقش-تىڭ دا اككرەديتتەۋ اگەنتتىگى «ABET» كىرەدى. بۇل – ءبىزدىڭ تالاپتارىمىز بەن شارتتارىمىزدىڭ تەك ەۋروپالىق ەمەس, حالىقارالىق ينجەنەرلىك اليانستىڭ ستاندارتتارىنا سايكەس كەلەتىنىن كورسەتەدى», دەدى ءا.ءابجاپپاروۆ.
بۇل جوعارى ماراپات ورتالىق ازيا ءبىلىم جۇيەسىن اككرەديتتەۋ قاۋىمداستىعىنىڭ ەۋروپالىق جوعارى ءبىلىم كەڭىستىگىندەگى جەتەكشى ورنى مەن بەدەلىن كورسەتەدى. بىلتىر جەلتوقساندا «KAZSEE» قازاقستانداعى زاماناۋي ءبىلىم قاۋىمداستىعى الماتى كەلىسىمى شەڭبەرىندە ءبىلىم بەرۋدى اككرەديتتەۋ جونىندەگى ورتالىق ازيا قاۋىمداستىعى بولىپ قايتا قۇرىلعان ەدى. ونىڭ قىزمەتى ورتالىق ازيانى ەۋروپالىق وداقپەن ىقپالداستىرۋعا باعىتتالعان.
ورتالىق ازيا ءبىلىم جۇيەسىن اككرەديتتەۋ قاۋىمداستىعى جوعارى وقۋ ورىندارىنىڭ تۇلەكتەرىنە حالىقارالىق ەڭبەك نارىعىنداعى سۇرانىستى قامتاماسىز ەتە وتىرىپ, قازاقستان مەن ورتالىق ازياداعى ءبىلىمنىڭ ەڭ جوعارى حالىقارالىق ستاندارتتارعا سايكەس كەلۋىنە ۇمتىلادى.
