سۋرەتتى تۇسىرگەن – اقادىل رىسماحان
مەملەكەت باسشىسىنىڭ تاپسىرماسىنا سايكەس وڭىردە «جايلى مەكتەپ» ۇلتتىق جوباسى بويىنشا بىرنەشە ءبىلىم ۇياسىن سالۋ جوسپارلانعان. العاشقىسىنىڭ قۇرىلىسى مەجەلى مەرزىمدە اياقتالدى.
بايزاق اۋدانىنا قاراستى سارىكەمەر اۋىلىنىڭ وقۋشىلارى جاڭا وقۋ جىلىن جاڭا مەكتەپتە باستاپ وتىر. ءبىلىم ورداسىنىڭ اشىلۋ سالتاناتىنا ءوڭىر باسشىسى ەربول قاراشوكەەۆ, وقۋ-اعارتۋ سالاسىنىڭ ارداگەرلەرى, اتا-انالار قاتىستى.
«پرەزيدەنت قاسىم-جومارت توقاەۆتىڭ باستاماسىمەن ەلىمىزدە ءبىلىم, عىلىم سالاسىن وركەندەتۋگە باسىمدىق بەرىلىپ وتىرعانى انىق. ءبىزدىڭ وڭىردە دە ءبىلىم بەرۋ سالاسىن دامىتۋ, ينجەنەرلىك-كوممۋنيكاتسيالىق ينفراقۇرىلىممەن قامتاماسىز ەتۋ – نەگىزگى باعىت. جاسوسپىرىمدەردىڭ ساپالى ءبىلىم الۋىنا قولدان كەلگەنشە قولداۋ كورسەتىپ وتىرمىز.
سارىكەمەر اۋىلىندا «جايلى مەكتەپ» ۇلتتىق جوباسى اياسىندا بوي كوتەرگەن جاڭا ءبىلىم ورداسى – بالالارعا جاسالعان قامقورلىقتىڭ ءبىر كورىنىسى. وقۋ ورداسىندا جاسوسپىرىمدەردىڭ قاۋىپسىز ءارى جايلى ورتادا ساپالى ءبىلىم الۋى ءۇشىن بارلىق جاعداي قاراستىرىلعان. ءبىر سوزبەن ايتقاندا, بالالاردىڭ اۋىز تولتىرىپ ايتارلىقتاي جەتىستىكتەرگە جەتۋىنە جاعداي جاسالعان», دەيدى ءوڭىر باسشىسى ە. قاراشوكەەۆ.
جەرگىلىكتى تۇرعىندار اراسىنان ءسوز العان ارداگەر ۇستاز اسقار بەكباۋوۆ ءبىلىم سالاسىنداعى وڭ وزگەرىستەر تۋرالى پىكىرىمەن ءبولىستى. اۋىلدىق جەرلەردە زاماناۋي ۇلگىدە مەكتەپ سالىنعانىنا ريزاشىلىعىن بىلدىرگەن ول «جايلى مەكتەپ» ۇلتتىق جوباسى اياسىندا بوي كوتەرىپ جاتقان ءبىلىم وردالارىنىڭ ەرەكشەلىكتەرىنە توقتالدى. سونداي-اق بالالاردىڭ ساپالى ءبىلىم الۋىنا بارىنشا قولداۋ ءبىلدىرىپ وتىرعان مەملەكەت باسشىسىنا, جەرگىلىكتى اتقارۋشى بيلىك وكىلدەرىنە العىس ايتتى.
ۇلتتىق جوبا اياسىندا سالىنعان جاڭا مەكتەپ 600 وقۋشىعا ارنالعان. ءبىلىم الۋشىلارعا بارلىق جاعداي قاراستىرىلعان ءبىلىم ورداسى زاماناۋي كابينەتتەرمەن, سوڭعى ۇلگىدەگى تەحنيكالارمەن تولىقتاي جابدىقتالعان. عيماراتتا 35 وقۋ بولمەسى, 2 سپورت زال, 2 كومپيۋتەر كابينەتى, ءماجىلىس زالى, كىتاپحانا جانە اسحانا, ۇلدار مەن قىزدارعا ارنالعان ارنايى شەبەرحانا بار. سونداي-اق بالالاردىڭ وقۋلىقتارى مەن جەكە زاتتارىن ساقتاۋعا ارنالعان شكافتار قويىلعان. مەكتەپ تولىعىمەن بەينەباقىلاۋ كامەراسىمەن قامتىلعان. سونىمەن قاتار ءبىلىم ۇياسىنا ارنايى جەدەلساتى ورناتىلعان.
سارىكەمەردەگى ۇلتتىق جوبا اياسىندا سالىنعان مەكتەپتەن بولەك, تاعى بەس ءبىلىم ۇياسى پايدالانۋعا بەرىلدى. «اراي» جانە «كازارما» تۇرعىن الابىنىڭ حالقى بىرنەشە جىل بويى كوتەرگەن وزەكتى ماسەلە وڭىنان شەشىلىپ, مەكتەپ وقۋشىلارى جاڭا ءبىلىم ورداسىنىڭ تابالدىرىعىن اتتادى. ولاردىڭ جۇزىنەن شاتتىقتىڭ لەبى ەسىپ تۇردى.
كەرەك دەرەككە سەنسەك, «اراي» تۇرعىن الابىندا اشىلعان سۋ جاڭا مەكتەپ 600 وقۋشىعا ارنالعان بولسا, «كازارما» تۇرعىن الابىنداعى وقۋ ورداسى جاڭا وقۋ جىلىندا 180 ءبىلىم الۋشىنى قابىلدادى. سونداي-اق مەركى مەن قورداي اۋداندارىندا 150 ورىندىق, سارىسۋ اۋدانىندا 50 ورىندىق جاڭا ءبىلىم ۇياسى پايدالانۋعا بەرىلدى.
جەرگىلىكتى اتقارۋشى بيلىك كەلتىرگەن دەرەككە جۇگىنسەك, جاڭا مەكتەپتەر ءبىلىم الۋشىلارعا قاجەتتى بارلىق قاجەتتى قۇرال-جابدىقتارمەن قامتىلعان. ونداعى زەرتحانالار مەن كومپيۋتەرلىك سىنىپتار زاماناۋي تەحنولوگيالارمەن جابدىقتالعان.
جالپى العاندا, ءوڭىر بويىنشا 2024–2025 جىلدارى 41 ءبىلىم نىسانىنىڭ قۇرىلىس جۇمىسى جۇرگىزىلەدى. جىل سوڭىنا دەيىن 18 ءبىلىم ورداسىنىڭ قۇرىلىسىن اياقتاۋ كوزدەلگەن. ال مەملەكەت باسشىسىنىڭ تاپسىرماسىنا سايكەس «جايلى مەكتەپ» ۇلتتىق جوباسى اياسىندا 12 مەكتەپ بوي كوتەرەدى. ونىڭ 6-ۋى وسى جىلى پايدالانۋعا بەرىلمەك. سونداي-اق وبلىس بويىنشا 10 ءبىلىم نىسانىندا كۇردەلى جوندەۋ جۇمىستارى جۇرگىزىلىپ جاتىر. ال 96 ءبىلىم ورداسىندا اعىمداعى جوندەۋ جۇمىستارى اياقتالعان.
جامبىل وبلىسى بويىنشا 507 ورتا ءبىلىم بەرۋ ۇيىمى بار. بارلىق ءبىلىم ۇياسىندا 248 مىڭنان استام وقۋشى ءبىلىم نارىمەن سۋسىنداپ جاتىر. ال جاڭا وقۋ جىلىندا 21 مىڭعا جۋىق جەتكىنشەك 1- سىنىپقا قابىلداندى.
وڭىردە جاڭادان اشىلعان ءبىلىم وردالارىنىڭ ارقاسىندا بىرنەشە توزىعى جەتكەن مەكتەپتىڭ ماسەلەسى وڭىنان شەشىلدى. وسى جىلدىڭ سوڭىندا, كەلەسى جىلى تاعى بىرنەشە جاڭا مەكتەپ بوي كوتەرەتىنىن ەسكەرسەك, جامبىلدىقتار «جىرلاپ» كەلگەن ونداعان ءبىلىم ورداسىنىڭ وزەكتى ماسەلەسى ۋاقتىلى شەشىمىن تاباتىنى داۋسىز.
جامبىل وبلىسى
