بيىل استانا مەديتسينا ۋنيۆەرسيتەتىنە 1500 استام ستۋدەنت وقۋعا ءتۇسىپتى. مۇنىڭ ىشىندە ەلدىڭ ءار ايماعىنان كەلگەن تۇلەكتەرمەن قوسا, شەت ەلدەن كەلگەن ازاماتتار بار. بۇگىندە ۋنيۆەرسيتەت بازاسىندا 2 بلوكتان تۇراتىن 1418 ورىنعا شاقتالعان ستۋدەنتتەر ءۇيى بار. وندا جاتىن ورىنعا سۇرانىس 3,6 مىڭعا جەتسە, بيىل ۋنيۆەرسيتەت باسشىلىعى 4 مىڭعا جۋىق ستۋدەنتتى جاتىن ورىنمەن قامتاماسىز ەتۋگە بەكىنىپتى. ەسەسىنە, قازىر جاتاقحانادا تاپشىلىعى تۇرماق, قوسىمشا 400 ورىن رەزەرۆتە تۇر. ۋنيۆەرسيتەت باسشىلىعى بۇل ناتيجەگە 10 جەكەلەگەن جاتاقحانا يەسىمەن جۇرگىزگەن كەشەندى جۇمىستىڭ ناتيجەسىندە قول جەتكىزگەن.
بيىل استانا مەديتسينا ۋنيۆەرسيتەتىنە تيەسىلى 30 مىڭ شارشى مەتر اۋماق جوندەۋدەن وتكەن. مۇنداي ءىرى كولەمدە جاڭعىرتۋ بۇرىن-سوڭدى بولماعان. ايتالىق, سارىارقاداعى وقۋ كورپۋسى كۇردەلى جوندەۋدەن ءوتىپ, وندا جاڭارعان اكت زالى, كىتاپحانا جانە سoworking ورتالىعى جاستاردىڭ يگىلىگىنە بەرىلگەن. وسىعان قوسا ستۋدەنتتەر ءۇيىنىڭ 2 بلوگىندا دا جوندەۋ جۇمىستارى اياقتالۋعا تاياعان. بيىل وقۋ جىلى بارىسىندا 1 بلوكتا جۇرگىزىلىپ جاتقان جاڭعىرتۋ جۇمىستارى اياقتالۋى ءتيىس ەكەن.
جاتاقحانانىڭ اشىلۋ سالتاناتىنا استانا مەديتسينا ۋنيۆەرسيتەتىنىڭ پرورەكتورى دياس سايدانگازين دە قاتىسىپ, ستۋدەنتتەردى ايتۋلى وقيعامەن قۇتتىقتادى.
«استانا مەديتسينا ۋنيۆەرسيتەتى دەنساۋلىق ساقتاۋ سالاسىنا قاجەتتى كادرلاردى دايارلايتىن ۇزدىك مەديتسينالىق ۇستاحانالاردىڭ ءبىرى. جىل سايىن وقۋ ورداسىن ءتامامداپ شىعاتىن مىڭداعان مامان وتاندىق مەديتسينالىق ۇيىمدارعا جۇمىسقا ورنالاسىپ, ۇلت ساۋلىعىنا ۇلەس قوسىپ كەلەدى. ۋنيۆەرسيتەت قۇرىلعان تۇستان وسى كۇنگە دەيىن دەنساۋلىق ساقتاۋ جۇيەسىنە 30 مىڭنان اسا جوعارى بىلىكتى مامان دايارلاپ شىعاردى. سىزدەر دە وقۋدا وزات بولىپ, سول بىلىكتى مامانداردىڭ قاتارىن تولىقتىراسىزدار دەگەن ۇمىتتەمىن», دەدى د. سايدانگازين ءسوزىن تۇيىندەپ. 
