تۇركىستاندا وتكەن ءداستۇرلى تامىز كەڭەسىندە وبلىس اكىمى دارحان ساتىبالدى وسىنداي دەرەكتەر كەلتىردى. جەمقورلىق فاكتىلەرىنە بايلانىستى وڭىردە بۋحگالتەرلىك جۇيەنى وزگەرتۋ قولعا الىنعان. ء«بىز مەكتەپتەردى تەكسەرىپ شىقتىق. 1 383 ارتىق شتات جاساپ, قارجى الىپ وتىرعانى انىقتالدى. ولاردى كەزەڭ-كەزەڭىمەن قىسقارتۋ جۇمىسى ءجۇرىپ جاتىر. مۇنى قوعام بولىپ بىرلەسىپ شەشۋىمىز قاجەت», دەدى وبلىس اكىمى. جىل باسىنان بەرى 7 مىڭنان اسا بالا بالاباقشادا جالعان تىركەلىپ تۇرعانى بەلگىلى بولعان. بۇل بويىنشا دا ءتيىستى تەرگەۋ جۇمىستارى ءجۇرىپ جاتىر. سونداي-اق وبلىس اكىمى: «بالانى بۇزۋعا, تۇزەۋگە سەبەپ بولاتىن ءبىر شارت – بالدىرعان كەزدەن باستاپ كورگەن تاربيەسى مەن ونەگەسى. تاۋەلسىزدىگىمىزدىڭ تۇعىرلى بولىپ, ەلىمىزدىڭ بولاشاعىنىڭ جارقىن بولۋى ءبىزدىڭ بۇگىنگى ادال ەڭبەگىمىزگە بايلانىستى. بارشاڭىزدى بىرلىكتە كۇش قوسىپ, بالا وقىتۋدان كەش قالماۋعا شاقىرامىن», دەدى. ءوڭىر باسشىسىنىڭ ايتۋىنا قاراعاندا, جەمقورلىققا بارعان جانداردان تاركىلەنگەن قاراجاتقا 20 مەكتەپ سالۋ قولعا الىنعان. ونىڭ 12-ءسى بيىل پايدالانۋعا بەرىلمەك. ودان بولەك 300-دەن اسا ءبىلىم ۇيىمىندا جوندەۋ جۇمىسى جۇرگىزىلىپ, 63 «جايلى مەكتەپ» سالۋ كوزدەلگەن. ونىڭ 29-ىن بيىل پايدالانۋعا بەرۋ جوسپارلانىپ وتىر. وبلىستاعى ورتا ءبىلىم ۇيىمدارىنىڭ جەلىسى 1060-قا ارتتى. وقۋشىلاردىڭ بولجامدى كونتينگەنتى – 530 000, ونىڭ ىشىندە 1-سىنىپقا قابىلداناتىن بالالار سانى – 52 593. ءوڭىردىڭ ءبىلىم سالاسىندا 65 762 پەداگوگ قىزمەت ەتەدى. جاڭا وقۋ جىلىندا مەملەكەتتىك 910 مەكتەپتەگى 220 920 وقۋشى ءبىر رەتتىك ىستىق تاماقپەن قامتاماسىز ەتىلەدى. تۇركىستان وبلىسىنداعى ءبىلىم بەرۋ ۇيىمدارىنا جاڭا وقۋ جىلى قارساڭىندا 62 مەكتەپكە 265 ارنايى ءپان كابينەتى الىنادى. جاڭا وقۋ جىلىندا 17 081 وقۋشى تاسىمالدانادى.
تامىز كەڭەسىندە 10 ۇستازعا وقۋ-اعارتۋ مينيسترلىگىنىڭ «ى.التىنسارين» توسبەلگىسى تابىستالىپ, وبلىس اكىمىنىڭ اتىنان 10 پەداگوگ ماراپاتتالدى. سونداي-اق «يننوۆاتسيالىق جوبالار» كورمەسى ۇيىمداستىرىلدى. ءىس-شارا بارىسىندا ءار اۋداندىق ءبىلىم ءبولىم باسشىلارى جوبا جاساۋشىلاردىڭ جاڭا جۇمىستارىن قورعادى. ياعني 17 اۋدان 17 ءتۇرلى يننوۆاتسيالىق جوبالارىن تانىستىردى. جوبالاردىڭ باسىم بولىگى مەكتەپكە دەيىنگى ءبىلىم بەرۋ ۇيىمدارىنىڭ جۇمىسىن جەتىلدىرىپ, مەملەكەتتىك قىزمەت كورسەتۋدى تسيفرلاندىرۋدى كوزدەيدى. مامانداردىڭ مالىمدەۋىنشە, وڭىردەگى ءبىلىم بەرۋ ۇيىمدارىندا «ە-اسحانا», «ە-كىتاپحانا», «BilimLand» , «Face ID» سىندى اۆتوماتتاندىرىلعان جۇيەلەر قاناتقاقتى جوبا رەتىندە تەكسەرۋدەن ءوتىپ, وڭ ناتيجە بەرگەن. سونىمەن قاتار «الاقان» جوباسى, «Tolem», «Matatalab» روبوتى, «IoT board», «Codrone» روبوتتەحنيكالىق قۇرالدارى كورسەتىلىپ, ءتۇرلى باسىلىمدار مەن لوگيكالىق «Intellectum» سىندى جاڭا تەحنولوگيالار ۇسىنىلدى.
تۇركىستان وبلىسى
