مەن كوكشەتاۋ قالاسىنداعى №6 سايلاۋ ۋچاسكەسىندەگى سايلاۋ بارىسىنا «نۇر وتان» پارتياسىنان بايقاۋشى بولىپ قاتىستىم. ساعات تۋرا 7.00-دە كوميسسيا توراعاسى, №1 ورتا مەكتەپتىڭ ديرەكتورى يرينا گولوۆچەنكو جىلى شىرايمەن قارسى الىپ, «قازاقستان رەسپۋبليكاسىنداعى سايلاۋ بارىسىن باقىلاۋ جونىندەگى رەسپۋبليكالىق قوعامدىق كوميسسيانىڭ» مۇشەسى ۆيكتور گەي جانە پرەزيدەنتتىككە ۇمىتكەر ءا.قۇسايىنوۆ شتابىنىڭ مۇشەسى سەرىك ەسماعامبەتوۆ ۇشەۋمىزدى ارنايى ورىنعا ورنالاستىردى.
قازاقستان رەسپۋبليكاسىنىڭ ءانۇرانى ورىندالىپ, جۇرتشىلىقتىڭ كوزىنشە بيۋللەتەندەر ساقتالعان سەيفتىڭ اشىلۋىنا, ءمولدىر داۋىس بەرۋ جاشىگىنىڭ مورلەنۋى راسىمىنە قاتىسىپ, وسىنداعى بەس داۋىس بەرۋ كابيناسىن بايقاپ شىقتىق. كوميسسيا مۇشەلەرى تۇرعىنداردى ءتىزىم بويىنشا تولقۇجاتتارىمەن تەكسەرىپ, بيۋللەتەن العاندىعى جونىندە ارنايى جۋرنالعا قولدارىن قويدىرىپ وتىردى. كەلۋشىلەر تاراپىنان قانداي دا ءبىر تۇسىنىسپەۋشىلىك, ارتىق سۇراقتار قويۋ بايقالعان جوق. داۋىس بەرۋ ۇيىمشىلدىق جاعدايىندا وتكىزىلە باستادى.
ۋچاسكەلىك كوميسسيا تاراپىنان كونستيتۋتسيالىق زاڭنامانىڭ قاتاڭ ساقتالعانىن ايتۋ ءلازىم. بۇل داۋىس بەرۋدىڭ ءوز دارەجەسىندە وتۋىنە ىقپال ەتتى. بەلسەندىلىك تە جوعارى بولدى. ساعات 16.00-دەگى مالىمەت بويىنشا داۋىس بەرۋشىلەردىڭ 87 پايىزى وزدەرىنىڭ ازاماتتىق پارىزىن وتەپ ۇلگەردى. سونداي-اق, سايلاۋ ۋچاسكەسىندە بۋفەتتىڭ جۇمىس ىستەۋى, مەكتەپ پەن قالا ونەرپازدارىنىڭ كونتسەرتتىك باعدارلاماسىنىڭ قويىلۋى مەرەكەلىك كوڭىل-كۇيدى وسىرە ءتۇستى.
بورانباي بەگالين,
كوكشەتاۋ قالالىق ءماسليحاتىنىڭ حاتشىسى, قوعامدىق بايقاۋشى.
ەشقانداي زاڭ بۇزۋشىلىق تىركەلگەن جوق
ەڭ الدىمەن تاۋەلسىز ەلدىڭ پرەزيدەنتتىك سايلاۋىن وتكىزۋدىڭ ءوزى ۇلكەن باقىت دەگەن ويدامىن. ويتكەنى, الەمدە ەگەمەندىگىن اڭساپ, ءوز الدىنا جەكە ەل بولىپ, مەملەكەت باسشىسىن وزدەرى سايلاۋدى ارمانداپ جۇرگەن قانشاما حالىق بار. ال ءبىزدىڭ جۇرت ازاتتىعىن الىپ, ءوز باسشىسىن ءوزى سايلاي الاتىن كۇنگە وسىدان شيرەك عاسىر ۋاقىت بۇرىن قول جەتكىزدى. بۇل تۇسىنگەن ادامعا زور مارتەبە. وسىنداي ساياسي دودا كەزىندە قىزىلوردا وبلىسى شيەلى اۋدانىنداعى №294 سايلاۋ ۋچاسكەسىندە بايقاۋشى بولدىم. تاڭعى ساعات 7.00-دە ۋچاسكە سايلاۋشىلاردى قابىلداۋعا دايىن تۇردى. مەملەكەتتىك ءانۇران ورىندالعاننان كەيىن العاشقى سايلاۋشىلار داۋىس بەرە باستادى. بارلىق جۇمىس «سايلاۋ تۋرالى» زاڭنىڭ اياسىندا ءوتتى. وعان ەلىمىزدە تىركەلگەن ساياسي پارتيالار مەن ۇكىمەتتىك ەمەس ۇيىمداردىڭ وكىلدەرى سايلاۋ بارىسىن ءجىتى باقىلادى. ونىڭ سىرتىندا حالىقارالىق جانە تمد شەڭبەرىنەن كەلگەن بايقاۋشىلار دا سايلاۋ پروتسەسىن نازاردا ۇستادى. ەڭ باستىسى, حالىقتىڭ سايلاۋعا دەگەن ىنتاسى زور بولدى. جۇرت ەلدىڭ ەڭ ۇلكەن ساياسي ناۋقانىندا اسا ۇلكەن بەلسەندىلىك تانىتىپ, سايلاۋعا ءبىر كىسىدەي اتسالىستى. داۋىس بەرۋ كەزىندە ەشقانداي ارىز-شاعىم تۇسكەن جوق. بىردە-ءبىر زاڭسىزدىق, سايلاۋشىلاردىڭ قۇقى بۇزىلعان فاكتىلەر تىركەلمەدى. سايلاۋ وتە جوعارى دەڭگەيدە ءوتتى دەپ سەنىمدى تۇردە ايتا الامىن. داستان ەرنازاروۆ, № 294 سايلاۋ ۋچاسكەسىنىڭ بايقاۋشىسى. قىزىلوردا وبلىسى.دەموكراتيالىق قادامدى تەرەڭدەتۋدىڭ كورىنىسى
شىنى كەرەك, مۇنداي اسا ماڭىزدى ساياسي شاراعا بايقاۋشى رەتىندە ءبىرىنشى رەت قاتىسقاندىقتان, قوبالجىعانىم راس. بىراق الدىن الا تياناقتى ازىرلىكتەردىڭ جۇرگىزىلۋى كوڭىلدەگى كۇدىكتى سەيىلتىپ, سەنىمىمدى قاتايتتى. «سايلاۋعا باقىلاۋ جاساۋ جونىندەگى رەسپۋبليكالىق قوعامدىق كوميسسيا» وبلىستىق فيليالىنىڭ توراعاسى سەرگەي حۋدياكوۆ ارقايسىمىزبەن جەكە سويلەسىپ, ناقتى باعىت-باعدارلار بەردى. سەمينار-ترەنينگتەردىڭ پايداسى مول بولدى. تەوريالىق ءبىلىمىمىزدى نىعايتتىق, تاجىريبەمىزدى بايىتتىق. سايلاۋالدى ماسەلەلەرگە جان-جاقتى قانىقتىق. قولىمىزعا ادىستەمەلىك ماتەريالدار, كومەكشى قۇرالدار بەرىلىپ, زاڭنامالىق نورمالاردىڭ قاتاڭ ساقتالۋىنا باسا نازار اۋدارىلدى. قازىر وي ەلەگىنەن وتكىزىپ وتىرسام, «كوز – قورقاق, قول – باتىر» دەگەندەي, ءبارى دە ادامنىڭ جەكە جىگەرىنە, قوعامدىق بەلسەندىلىگىنە كوپ بايلانىستى ەكەن. ماعان تاڭداۋ تۇسكەندە, بىردەن كەلىسىمىمدى بەردىم. ويتكەنى, ءبىز, جاستار, قولىمىزدان ءىس كەلەتىنىن, كەز كەلگەن ساياسي شارالاردى زاڭدى تۇردە جۇزەگە اسىرا الاتىنىمىزدى دالەلدەي بىلدىك. جەكە ادامنىڭ ۇستانعان ماقساتى دا, كاسىبي بىلىكتىلىگى وسىنداي ناقتى جاعدايلارمەن ولشەنسە كەرەك. وسى تۇرعىدان العاندا, قوعامدىق باقىلاۋشى ءمارتەبەسىن يەلەنگەنىمە ەش وكىنبەيمىن. مەنىڭ كۇنى بويعى ميسسيام № 635 سايلاۋ ۋچاسكەسىندە جالعاسىپ, باسقا دا قوعامدىق ۇيىم وكىلدەرىمەن بىرلەسە وتىرىپ, ولقىلىقتاردىڭ ورىن الماۋىن قاداعالادىق. بارلىق ۇدەرىستەر زاڭعا سايكەس اتقارىلىپ, سايلاۋشىلار تاراپىنان بىردە-ءبىر رەنىش ايتىلعان جوق. حالىقارالىق بايقاۋشىلار دا بولىپ, جالپىعا ورتاق دەموكراتيالىق تالاپتاردىڭ ساقتالعانىن جەتكىزدى. قازاقستانداعى سايلاۋ رەسەيمەن قاتار وزگە دە ەلدەردى قىزىقتىرىپ وتىرعانىن جاسىرمادى. ءبىزدىڭ وي-پىكىرلەرىمىز دە وسىعان سايادى. ءبىر جاعىنان, ساياسي ناۋقاندى ۇيىم- داستىرۋشىلاردىڭ تىنىم- سىز تىرلىگى, ەكىنشى جاعىنان, جۇمىستاردىڭ جۇيەلىلىگى, اقپاراتتاندىرۋ قىزمەتتەرىنىڭ جەدەلدىگى, سونداي-اق, ەلەكتوراتتىڭ جوعارى بەلسەندىلىگى ءتانتى ەتتى. وسىلايشا, بايقاۋشىلارعا قويىلعان بيىك تالاپتاردىڭ ارقاسىندا وزىمىزگە جۇكتەلگەن ءمىندەتتەردى بارىنشا جاۋاپكەرشىلىكپەن اتقارۋعا كۇش سالدىق. سايلاۋ ۋچاسكەسى اشىلعان كەزدەن باستاپ, جابىلعان كەزگە دەيىن سايلاۋ ۇدەرىستەرىن ۇزبەي قاداعالاپ, ساياسي ناۋقاننىڭ اشىق تا ءمولدىر وتۋىنە ءبىرىنشى كەزەكتە باسىمدىق بەرىلدى. سايلاۋدىڭ ءوز دارەجەسىندە ۇيىمداستىرىلۋىنا ۇلەس قوسقانىمىزدى دەموكراتيالىق قادامدى تەرەڭدەتۋدىڭ ءبىرى كورىنىسى رەتىندە باعالايمىن. اسەل ساپارعالي, قوعامدىق بايقاۋشى. پەتروپاۆل.قوعامدىق كوميسسيا مۇشەلەرى كوپ بولدى
بۇل جولعى سايلاۋدىڭ ەرەكشەلىگى – رەسپۋبليكالىق قوعامدىق كوميسسيا مۇشەلەرىنىڭ كوپتەپ تارتىلۋى. ماسەلەن, ەلىمىزدەگى 9741 سايلاۋ ۋچاسكەسىنىڭ بارلىعىنا دەرلىك كوميسسيا ءمۇشەلەرى بايقاۋشى بولىپ, ناۋقاننىڭ اشىق ءارى بارلىق تالاپتارعا ساي ءوتۋىن قاداعالادى. كوميسسيا قۇرامىندا قوعام قايراتكەرلەرى, ساياساتكەرلەر, عالىمدار مەن ساراپشىلار, بيزنەسمەندەر, دارىگەرلەر بار. كوميسسيا مۇشەلەرى سۇلتانماحمۇت تورايعىروۆ اتىنداعى مەملەكەتتىك ۋنيۆەرسيتەتتەگى №86 سايلاۋ ۋچاسكەسىندە جۇمىس جاسادى. پاۆلودارلىقتاردىڭ جوعارى بەلسەندىلىگى بايقالدى. ەكىنشىدەن, 2011 جىلعى سايلاۋمەن سالىستىرساق, ازاماتتىق پوزيتسياسىن بىلدىرەمىن دەۋشىلەر قاتارى اناعۇرلىم ارتقانى ايقىن سەزىلەدى. №6 سايلاۋ ۋچاسكەسىنە تاڭەرتەڭ سايلاۋعا العاش رەت كەلگەن 22 جاس ءوز داۋىستارىن بەردى. جالپى, پاۆلودارلىقتار سايلاۋعا كوتەرىڭكى كوڭىل-كۇيمەن قاتىستى. يلدار قاليەۆ, پرەزيدەنتتىك سايلاۋ بارىسىن بايقاۋ جونىندەگى رەسپۋبليكالىق قوعامدىق كوميسسيانىڭ وبلىستىق فيليالىنىڭ توراعاسى. پاۆلودار.ۇلكەن ۇيىمشىلدىق تانىتتى
ۆيتالي حمەلەۆسكي, قوعامدىق بايقاۋشى: – مەن وبلىستاعى ەتنومادەني بىرلەستىكتەر اتىنان سايلاۋدىڭ ءوتۋ بارىسىنا بايقاۋشى بولىپ قاتىستىم. ءوزىم ءبىراز جىلدان بەرى پولياكتاردىڭ وبلىستىق «پولونيا» قوعامىنا جەتەكشىلىك ەتىپ كەلەمىن. بۇعان دەيىن دە بايقالىپ جۇرگەندەي ايماعىمىزداعى 100-دەن استام ۇلتتار مەن ۇلىستار اراسىنداعى دوستىق پەن تاتۋلىق وسى سايلاۋ كەزىندە تاعى ءبىر ايعاق بولدى. ورتاق ماقسات پەن تىلەك جۇرەك توعىستىرعان سان ەتنوس وكىلدەرى داۋىس بەرۋگە ۇلكەن ۇيىمشىلدىق تانىتتى. ويتكەنى, ءبارى ەلدىڭ جارقىن كەلەشەگىنىڭ كەپىلى بىرلىكتە ەكەنىن بىلەدى. سونىڭ جالعاسىپ, بەرىگە تۇسۋىنە سەنەدى. ءبىزدى بيىلعى سايلاۋدىڭ وتە جوعارى دەڭگەيدە ۇيىمداس-تىرىلۋى ءسۇيسىندىردى. داۋىس بەرۋشىلەردىڭ ءوز تاڭداۋىن ەشتەڭەگە الاڭداماي, سالماقتى بايىپپەن جاساۋىنا بارلىق جاعداي قاراستىرىلعانىن سايلاۋ ۋچاسكەلەرى بارىنەن بايقادىق. حالىقارالىق بايقاۋشىلارمەن قاتار, جەرگىلىكتى بايقاۋشىلار دا كورسەتىلگەن سەنىمنەن شىعۋعا ءمۇمكىندىك الدى. كولىكپەن دە, تەلەفون بايلانىسىمەن دە قامتاماسىز ەتۋ, قاجەتتى اقپاراتقا شەك قويىلماۋ ءمىندەتىمىزدى تياناقتى اتقارۋعا جاعداي تۋعىزدى. ەلىمىز دامۋدىڭ جاڭا كەزەڭىنە قادام باستى. نىق بولارىنا سەنەمىز. قاراعاندى.
