سۋرەتتى تۇسىرگەن – ەرلان ومار, «EQ»
ماڭىزى جوعارى V دۇنيەجۇزىلىك كوشپەلىلەر ويىنى ءىس-شاراسىنىڭ ەلىمىزدە ءوتۋى تۋرالى العاشقىلاردىڭ ءبىرى بولىپ ۆەتنامنىڭ «Communist Party Of Vietnam» ەلەكتروندىق گازەتى اقپارات جاريالادى. كەيىنىرەك ەۋروپانىڭ «Commonspace.eu» سايتى قازاقستاننىڭ كوشپەلىلەر ويىنىن وتكىزەتىنىن, بۇل باعىتتا جەتكەن جەتىستىكتەرىمىزدى حابارلادى. قىتايدا «Young Pioneer Tours» اتتى قوعامدىق ۇيىم بار. ۇيىمنىڭ اقپاراتتىق رەسۋرسى ءدۇبىرلى دودانىڭ اڭداتپاسى, الەم ەلدەرى ءىس-شارادان نە الاتىنى تۋرالى, نەلىكتەن بۇل ويىندارعا قاتىسۋ كەرەك ەكەنىن تالداپ, ساراپتامالىق ماتەريال ۇسىنسا, ۇلىبريتانيانىڭ كەيبىر باسىلىمدارى ويىنعا قاتىستى sold-out (ساتىلىم بولجامى) زەرتتەۋ جۇرگىزگەن. بريتاندىق تانىمال «Wanderlust» رەيتينگتىك جۋرنالى ەلىمىزدەگى ويىندى تاماشالاۋعا ءتيىس ءىس-شارالار تىزىمىنە قوسقاننان بەرى ايتۋلى دودالار بيلەتتەرىنىڭ ساتىلىمى ۇلعايعان.
شەتەلدىك سايتتاردا («Responsible Travel», «YellowWood Adventures», «Wild Frontiers» ت.ب.) دۇنيەجۇزىلىك كوشپەلىلەر ويىندارىن تاماشالاۋعا كەلۋشىلەر ءۇشىن ساياحات قۇنى 2 399-2 999 فۋنت ستەرلينگ ارالىعىندا ەكەنىن جازعان. «Wild Frontiers» تۋريستىك اگەنتتىنىڭ بلوگىندە كوشپەلىلەر ويىندارى مەن ەلىمىزدىڭ كورىكتى جەرلەرىنە جوعارى باعا بەرىلگەن بىرنەشە پىكىر جاريالاندى. حەيلي كليتەر «The unique nomadic sports you’ll see at the world nomads games» اتتى ماقالاسىندا: «الەم قازىر جازعى وليمپيا ويىندارىنا قىزۋ دايىندالىپ جاتىر, الايدا بيىل ءبىزدىڭ بويىمىزداعى قانىمىزدى ويناتاتىن ناعىز سپورتتىق وقيعا – V دۇنيەجۇزىلىك كوشپەلىلەر ويىنى» دەپ جازىپ, ەتنوسپورت ويىندارىن تاماشالاۋعا شاقىردى.
ساياسي عىلىمدار دوكتورى ستيۋارت ميۋررەي «Georgetown Journal of International Affairs» اتتى سۇحباتىندا اتالعان جارىستىڭ مەملەكەتتەر دوستاستىعىن نىعايتىپ, ديپلوماتيالىق قارىم-قاتىناستى جاقسارتۋدىڭ جارقىن ۇلگىسى ەكەنىن تىلگە تيەك ەتكەن. استانانىڭ كوشپەلىلەر ويىندارىن وتكىزۋ ەلدەگى ءتۋريزمدى ورىستەتىپ, وزىندىك ءيميدجدى قالىپتاستىرۋعا وڭ اسەر ەتەتىنىن ايتادى.
راشيد كەمەلبەك,
ل.گۋميلەۆ اتىنداعى ەۇۋ-دىڭ 4-كۋرس ستۋدەنتى
