اسىلتۇقىمدى قوي ءوسىرۋشى شوپاندار مەن ءىرى شارۋا قوجالىقتارى قاتىسقان شارانىڭ اشىلۋىندا قالا اكىمى گۇلجان قۇرمانبەكوۆا كورمەنىڭ ماڭىزدىلىعىنا توقتالدى. يگى ءىستى ۇيىمداستىرۋشىلار مەن مال باسىن اسىلداندىرۋ باعىتىندا ەڭبەك ەتىپ جاتقان شارۋالارعا ساتتىلىك تىلەپ, ريزاشىلىعىن ءبىلدىردى. كوپشىلىك قۇيرىقتى قىلشىق ءجۇندى, قيسارى جانە اراشان قوي تۇقىمدارىن كوردى كورمەدەن. قيسارى قويلارىنىڭ القىمى كەڭ, ارقاسى تەگىس, سيراعى جۋان بولسا, ءدوڭ تۇمسىقتارى, قىلشىق ءجۇنى بولەكشە رەڭ بەرەدى. كورمە-سايىستىڭ ەرەجەسى بويىنشا قازىلار القاسى قوشقارلاردىڭ سالماعى مەن بويىنا جانە سىرتقى بىتىمىنە قاراي باعالادى. سونىمەن توقتى قوشقار بويىنشا بەرىك سۇلتاننىڭ سالماعى 144 كيلولىق ء«مۇسىن» قوشقارى دارا شىقتى. بويى 105,5 سانتيمەتر ارىستىق اقىلبەك ءالجاننىڭ «گەكتار» اتتى قوشقارى بيىكتىك بويىنشا چەمپيون اتاندى. ال باقبەرگەن ءالجانوۆتىڭ «كۋبا» اتتى قوشقارى سىرتقى ءبىتىمى بويىنشا ۇزدىك بولدى. شىمكەنتتەن كەلگەن باقتيار بالاجاننىڭ «تۇران» اتتى ساقا قوشقارى 195 كيلو باسىپ, جەڭىمپاز دەپ تانىلدى. قازىلار القاسىنىڭ شەشىمىمەن سالماعى, بويى جانە تۇرقى ەسكەرىلىپ, ۇزدىك قوشقار يەلەرىنە العىسحاتتار مەن ارنايى چەمپيوندىق بەلبەۋ جانە كۋبوكتەر تابىستالدى.
تۇلپار باپتاپ بايگەگە قوساتىن اتبەگىلەر تۋرالى ءار قازاق بىلەدى. قۇسبەگىلەردىڭ بۇركىت, سۇڭقار, قارشىعا سىندى جىرتقىش قۇستاردى قولعا ۇيرەتىپ, اڭعا سالاتىنى دا ءمالىم. ال ەندى تۇقىمى سيرەك كەزدەسەتىن قوشقار باپتايتىنداردى قالاي اتايمىز؟ ۇيىمداستىرۋشىلار مەن ءىس-شارانى جۇرگىزۋشىلەر اسىل تۇقىمدى قوشقاردى باپتاپ, كورمەگە اكەلگەندەردى قويبەگى دەپ اتاپ جاتتى. قوي باعاتىنداردى قويشى نەمەسە شوپان دەيتىن, ال قويبەگى دەۋ قانشالىقتى دۇرىس؟
تۇركىستان وبلىسى
