راسىندا اتالعان دەرتكە شالدىققانداردىڭ باسىم بولىگى ەگدە جاستاعى ادامدار بولعانىنا قاراماستان, ءىشىنارا بۇل دەرتكە دۋشار بولعان جاستار دا كەزدەسىپ جاتادى. ولاردىڭ قاتارىندا دەر كەزىندە ەمشارا قابىلداماعاندىقتان مۇگەدەك بولىپ قالعاندار دا بار. بۇكىل الەمنىڭ باس اۋرۋىنا اينالعان دەرتپەن كۇرەسۋ ماقساتىندا جامبىل وبلىسىندا رەۆماتولوگيا ورتالىعى اشىلدى.
جاڭادان اشىلعان ورتالىق تاراز قالاسىنداعى وبلىستىق كوپبەيىندى اۋرۋحانانىڭ بازاسىندا ورنالاسقان. مەديتسينالىق مەكەمە قىزمەتكەلەرى رەۆماتيكالىق دەرتكە شالدىققان ازاماتتاردى تاۋلىك بويى ەمدەۋگە دايىن كورىنەدى. ول ءۇشىن بارلىق مۇمكىندىك قاراستىرىلعان. بىلىكتى ماماندار جەتكىلىكتى.
«بۇل ورتالىقتا ءوڭىر تۇرعىندارىنىڭ ءومىر ءسۇرۋ ساپاسىن جاقسارتۋعا مۇمكىندىك بەرەتىن نەگىزگى ءدارى-دارمەكتەردى ۋاقتىلى تاعايىنداۋ ءۇشىن ەمدەلۋشىلەردىڭ ديناميكالىق مونيتورينگى ۇيىمداستىرىلادى. مۇندا ماماندار فيزيوتەراپيا جانە جاتتىعۋ تەراپياسىنىڭ ادىستەرىن قولدانىپ, ناۋقاستارعا مۇگەدەكتىكتىڭ الدىن الۋ بويىنشا كومەك كورسەتەدى. تاۋلىك بويى جۇمىس ىستەيتىن جانە كۇندىزگى ستاتسيونارلاردان بولەك, ەمدەلۋشىلەرگە تەكسەرىلۋ, كەڭەس الۋ جانە ەمدەۋ مۇمكىندىگىن بەرەتىن امبۋلاتوريالىق قىزمەت كەڭەيە تۇسەدى. ءبىر سوزبەن ايتقاندا, ورتالىقتا جۇمىس ىستەۋگە قاجەتتى مۇمكىندىكتىڭ ءبارى قاراستىرىلعان», دەيدى وبلىستىق دەنساۋلىق ساقتاۋ باسقارماسىنىڭ باسشىسى جانار وسپانوۆا.
باسقارما باسشىسىنىڭ ايتۋىنشا, ورتالىقتا ينجەنەرلىك بيولوگيالىق تەراپيا كابينەتى, بۋىنىشىلىك مانيپۋلياتسيالار كابينەتى, كاپيللياروسكوپيا, دەنسيتومەتريا كابينەتتەرى ورنالاسقان. ءتورت دارىگەر دەر كەزىندە مەديتسينالىق كومەك كورسەتەدى. سونداي-اق ءوڭىر تۇرعىندارى تەگىن مەديتسينالىق كومەكتىڭ كەپىلدىك بەرىلگەن كولەمى جانە مىندەتتى الەۋمەتتىك ساقتاندىرۋ شەڭبەرىندە ەمحانا جولداماسى بويىنشا تەكسەرۋ جانە ەمدەۋدەن تەگىن وتە الادى.
ج.وسپانوۆا كەلتىرگەن دەرەككە سەنسەك, وبلىس بويىنشا رەۆماتولوگيالىق دياگنوزبەن 4 825 ناۋقاس ديسپانسەرلىك ەسەپتە تۇر ەكەن. ونىڭ ىشىندە قۇرىلىمىندا نەگىزگى بولىگى بويىنشا وستەوارتروز – 1 656, سەرونەگاتيۆتى رەۆماتويدتى ارتريت – 1 142, سەروپوزيتيۆتى رەۆماتويدتى ارتريت – 985, جۇيەلى قىزىل جەگى اۋرۋىمەن جانە باسقا رەاكتيۆتى ارتروپاتيا دەرتىمەن 142 ەمدەلۋشى تىركەلگەن.
تاراز
