وسىنداي وزگەگە ۇلگى بولارلىق ەلدى مەكەننىڭ ءبىرى – زاپوروجە اۋىلى. اۋىلدىق وكرۋگ قۇرامىنا 1 765 تۇرعىنى بار زاپوروجە اۋىلى مەن 620 تۇرعىن تۇراتىن لوزوۆوە ەلدى مەكەنى كىرەدى. رەسپۋبليكالىق «تازا قازاقستان» اكتسياسىنىڭ ءمان-مازمۇنىنا جەتە نازار اۋدارىپ, وڭ باستامانى ءبىراۋىزدان قولداعان ەلدى مەكەن تۇرعىندارى كوگەرىپ كوكتەم شىققاننان-اق اۋىل ءىشىن قىستان قالعان قوقىستان تازارتۋعا جۇمىلا كىرىستى.
– ەڭ الدىمەن تۇرعىندارمەن بىرنەشە مارتە جۇزدەسىپ, تازالىقتىڭ ءوزىمىز ءۇشىن كەرەك ەكەنىن ۇعىندىردىق. ءبىر جاقسىسى, بارلىعى جەتە ءتۇسىنىپ, قولدادى. ەل بولىپ كىرىسكەن سوڭ كەز كەلگەن شارۋانى ەڭسەرىپ كەتەتىنىمىز بەلگىلى ەدى, – دەيدى زاپوروجە اۋىلدىق وكرۋگتىڭ اكىمى دۋمان حاۋسىلوۆ.
وكرۋگ اكىمدىگى قىزمەتكەرلەرى, ەل اعالارى جاقسى ىسكە ۇيىتقى بولىپ, جالپى جۇرتتى جۇمىلدىرا بىلگەن. ناتيجەسىندە, اۋىلدىڭ ماقتانىشى ىسپەتتى ستاديوننىڭ ماڭى, پارك ايماعى, كوشەلەر مۇنتازداي ەتىپ تازارتىلعان. بەرەكەلى اۋىلدىڭ ءسانىن كەلتىرىپ تۇرعان اعاشتاردىڭ ءدىڭى اكتەلگەن. جاياۋ جۇرگىنشىلەر جولدارى تازارتىلىپ, جول جيەگىندەگى شاقپا تاستار اعارتىلعان. ايالدامالار دا ادەمى كەيىپكە ەنگىزىلگەن. ورتاق شارۋاعا ەلدى مەكەندەردىڭ ەڭبەكتەگەن بالاسىنان ەڭكەيگەن كارىسىنە دەيىن ايانباي اتسالىستى دەسەك, ارتىق ايتقاندىق ەمەس. الدىمەن اۋىلدىڭ كىرەبەرىسىنەن باستالعان اباتتاندىرۋ جۇمىسى قالتارىستاعى كىشكەنتاي كوشەلەرگە دەيىن قامتىلعان. وسىناۋ جۇمىسقا 300-دەن اسا ادام اتسالىسىپ, 12 تەحنيكا پايدالانىلعان. ناتيجەسىندە, 50 تونناعا جۋىق قوقىس شىعارىلعان. 350 اعاش كوشەتى وتىرعىزىلىپ, ەل ىشىندە كورگەن جاننىڭ كوزقۋانىشىنا اينالعان گۇلزارلار باپتالعان. قازىر ۇقىپتى قولدىڭ تابى انىق بايقالاتىن اۋىل ءىشى ناق ءبىر قوناق كۇتكەن ءۇيدىڭ اۋلاسىنداي جارقىراي جايناپ تۇر.
ارينە, ون ساۋساقتىڭ بىردەي ەمەستىگى بەلگىلى. ءاربىر ءۇيدىڭ ماڭايى ەل قاتارلى تازارتىلۋعا ءتيىس. بۇل جۇمىسقا ءمان بەرمەگەن 20 وتباسىنا ەسكەرتۋ جاسالىپتى. ايتسە دە, كوگالداندىرۋ قاعيداسىن بۇزعاندارعا ايىپپۇل سالىنباعان ەكەن.
– ءبىزدىڭ اۋىلدا جۇمىس قايناپ جاتىر. ءبىر جاقسىسى, جاستار دا تۇراقتاپ قالدى. ولاردىڭ بوس ۋاقىتىندا كوڭىل كوتەرەتىن مادەني, سپورت وشاقتارى قالتقىسىز جۇمىس ىستەپ تۇر. ال اۋىل اقساقالدارى بولسا كەشكىلىك پاركتە جينالىپ, سىندارلى سۇحبات قۇرادى. ەلىمىزدىڭ كەشەگى ءومىرى, باياندى بولاشاعى تۋرالى پاراساتتى پىكىرلەر ايتىلادى. حالىققا جۇمىس بار. بىرنەشە دۇكەن جۇمىس ىستەيدى. ءتىپتى وسىنداعى شارۋا قوجالىقتارى جۇمىس قولىنا ءزارۋ. وسىنداي بوساعاسىنا بەرەكە بىتكەن ەلدە تۇرعان سوڭ ءوزىمىزدىڭ كىندىك قانىمىز تامعان جەردى ايالاپ, كۇتىپ ۇستاۋ – پەرزەنتتىك پارىز. ءبىزدىڭ ەلدىڭ ادامدارى وسىنى جاقسى ءتۇسىنىپ, كەز كەلگەن جۇمىسقا بىرلەسە كىرىسىپ كەتىپ, قولعابىسىن تيگىزىپ جاتىر. سايىپ كەلگەندە زاپوروجە اۋلىنىڭ تۇرعىندارى ماڭايىنىڭ جايناپ تۇرعان تازالىعىمەن, كوزتارتارلىق ءسان-سالتاناتىمەن ماقتانا الادى, – دەيدى اۋىل تۇرعىنى قوجابەرگەن توعجان ۇلى.
كورىكتى مەكەندى كۇتىپ ۇستاۋ ءبىر ساتتىك ناۋقاندىق جۇمىس ەمەس, جىلدىڭ قاي مەزگىلى بولسىن, اۋىل تۇرعىندارىنىڭ كەز كەلگەنى وسىنداي جيناقىلىقتى كوكسەيدى. ەندەشە, حالىقتىڭ قالاۋى ءوز اۋلىنىڭ اجارى دەپ ايتساق, سىنىقسۇيەم ارتىقتىعى بولماس.
اقمولا وبلىسى,
جاقسى اۋدانى
