مۇنان بىلايعى جەردە كورۋ قابىلەتى تولىق نەمەسە ءىشىنارا جويىلعان جاندار باسپا ونىمدەرى نەمەسە كىتاپتاردى قازاق تىلىندە وقىپ نەمەسە كومپيۋتەردە جۇمىس ىستەي الاتىن بولادى. اقپاراتتىق تەحنولوگيالاردىڭ دامۋى كۇن سايىن يگى جاڭالىقتاردى جاساۋدا. سونىڭ ءبىرى – قازىردىڭ وزىندە قازاقشا «سويلەيتىن» زاماناۋي سويلەۋ تەحنولوگيالارى مەن قۇرىلعىلارى.
قازاقستان ءباسپاسوز-كلۋبىندا وتكەن قازاق ءتىلى ءۇشىن سينتەزدەلگەن سويلەۋ داۋىستارىنىڭ تۇساۋكەسەرىنە كەلگەن باق وكىلدەرى مەن مۇددەلى جاندار جاڭالىقپەن تىكەلەي تانىسىپ, مۇمكىندىكتەرىن كوردى.
قازىرگى زاماندا ءبىلىم الۋدا, ياكي جۇمىسقا ورنالاسۋ بارىسىندا مۇمكىندىگى شەكتەۋلى جانداردى دا قوعامعا بەيىمدەۋ وتە كوكەيكەستى بولىپ وتىرعانى بەلگىلى. وسى تۇرعىدان العاندا كوزى ناشار كورەتىن, كومپيۋتەرلىك تەحنولوگيالاردى پايدالانۋشىلار كەز كەلگەن اقپاراتقا دەگەن قولجەتىمدىلىككە سينتەزدەلگەن سويلەۋ ارقىلى يە بولا الادى. ياعني, قولدانۋشىنىڭ كومپيۋتەردەگى بارلىق ارەكەتتەرىن داۋىستاپ وتىراتىن ارنايى باعدارلامالار بار. بەرتىنگە دەيىن كوزى كورمەيتىن جانە ناشار كورەتىن قازاقستاندىقتار ءۇشىن اقپاراتقا دەگەن قولجەتىمدىلىك ايتارلىقتاي شەكتەۋلى بولىپ كەلدى. ولار ءبىلىم الاتىن جانە قۇقىقتىق ماتىندەردى تەك ورىس نەمەسە اعىلشىن تىلدەرىندە عانا وقي الاتىن, ال قازاق ءتىلى ءۇشىن سويلەۋ سينتەزاتورلارى مۇلدەم جوق بولاتىن. سونىمەن, 2014 جىلى «اقىل-ويى جانە دەنە ءبىتىمى دامۋىنىڭ بۇزىلۋلارى بار بالالار مەن جاسوسپىرىمدەردى الەۋمەتتىك بەيىمدەۋ جانە كاسىبي ەڭبەكپەن وڭالتۋ ورتالىعى» جشس مەن «ەليتا گرۋپپ» اتتى رەسەي كومپانياسى قازاق تىلىنە ارنالعان سينتەزدەلگەن داۋىستاردى جاساقتاۋعا كىرىسكەن بولاتىن. ديكتورلار ستۋديادا قازاق تىلىندەگى 1500-دەن اسا سويلەمدەردى جازىپ شىققان. سينتەزاتوردى جاساۋشىلار ارنايى باعدارلامالار كومەگىمەن الىنعان قوردى تالداپ, جاڭا داۋىستاردى جاساۋ ءۇشىن قاجەتتى جۇمىستار اتقاردى. جاساقتامانىڭ بارلىق كەزەڭدەرىندە قازاق تىلىندە سويلەتىندەرمەن, ياعني ءتىلدى تاسىمالداۋشىلارمەن جانە قازاقستان فيلولوگتارىنان كەڭەس الىپ, اقىلداسىپ وتىرعانىن ايتۋ ءلازىم. وسى ارادا قازاقشا سينتەزاتوردى جاساۋشىلار «ءتىل تۋرالى» زاڭدا ايتىلعان «ۇكiمەت, وزگە دە مەملەكەتتىك, جەرگiلiكتi وكiلدi جانە اتقارۋشى ورگاندار: قازاقستان رەسپۋبليكاسىندا مەملەكەتتىك تiلدi بارىنشا دامىتۋعا, ونىڭ حالىقارالىق بەدەلiن نىعايتۋعا; قازاقستان رەسپۋبليكاسىنىڭ بارشا ازاماتتارىنىڭ مەملەكەتتىك تiلدi ەركiن جانە تەگiن مەڭگەرۋiنە قاجەتتi بارلىق ۇيىمداستىرۋشىلىق, ماتەريالدىق-تەحنيكالىق جاعدايلاردى جاساۋعا مiندەتتi», دەگەن قاعيدانى ۇستانعانىن اتاپ وتكەن ءجون. جاڭا تەحنولوگيانىڭ ارقاسىندا كورۋ قابىلەتىنىڭ اقاۋى بار ەل ازاماتتارى وزدەرىنىڭ مەملەكەتتىك ءتىلدى مەڭگەرۋ جانە قولدانۋعا دەگەن قۇقىعىن جۇزەگە اسىرا الادى. قازاقشا سويلەۋ سينتەزاتورلارىنىڭ پايدا بولۋى ولارعا كومپيۋتەردە جۇمىس اتقارىپ, باسپا ماتىندەرىن وقىپ, قازاق تىلىندە ءبىلىم الۋ ءمۇمكىندىگىن بەرەدى. سونىمەن قاتار, بۇل جۇمىسقا ورنالاسۋ مۇمكىندىكتەرىنىڭ كوكجيەگىن كەڭەيتپەك. تانىستىرىلىم بارىسىندا جۋرناليستەرگە باسپا مالىمەتتەرىن قازاقشا وقي الاتىن, قازاق تىلىندەگى كەز كەلگەن ەلەكتروندى ماتىندەردى وقۋعا جول اشاتىن كومپيۋتەر مەن كورۋ قابىلەتىنىڭ اقاۋى بار ادامدارعا اقپاراتتىق قورلاردى تاڭداۋدا اناعۇرلىم تاۋەلسىز بولۋعا مۇمكىندىك بەرەتىن باسقا دا تەحنولوگيالار كورسەتىلدى.
ايناش ەسالي, «ەگەمەن قازاقستان».
الماتى.
