تاياۋدا ۆەنادا قازاقستاننىڭ اۆسترياداعى ەلشىلىگى وسى ەل ونەركاسىپشىلەر بىرلەستىگىنىڭ قولداۋىمەن «Discovering business opportunities in Kazakhstan» اتتى قازاقستان-اۆستريا بيزنەس-فورۋمىن وتكىزدى. قازاقستان ينۆەستيتسيالارى اراسىنداعى سالىنعان جانە قازاق-اۆستريا ەكونوميكالىق ىنتىماقتاستىعىنىڭ جارقىن ۇلگىسى رەتىندە ريتتس-كارلتون قوناق ءۇيى فورۋم وتكىزۋ ورنى رەتىندە تاڭدالدى.
بيزنەس-فورۋم جۇمىسىنا 100-گە جۋىق اۆستريالىق كومپانيا, ۇكىمەت جانە بيزنەس-بىرلەستىكتەرى وكىلدەرى قاتىستى. قۇرمەتتى قوناقتار ىشىنەن اۆستريا پارلامەنتىنىڭ دەپۋتاتتار توبىن باسقارعان ۇلتتىق كەڭەستىڭ ەكىنشى پرەزيدەنتى كارل-حاينتس كوپف, كولىك, يننوۆاتسيالار مەن تەحنولوگيالار ۆيتسە-ءمينيسترى اندرەاس رايحارد جانە باسقا دا جوعارى لاۋازىمدىلار قاتىستى.
فورۋمنىڭ نەگىزگى بايانداۋشىسى رەتىندە ءسوز سويلەگەن ينۆەستيتسيالار جانە دامۋ ۆيتسە-ءمينيسترى ەرلان ساعاديەۆ فورۋم قاتىسۋشىلارىن «100 ناقتى قادام» اتتى ۇلتتىق جوسپار, 2015-2018 جىلدارعا ارنالعان يندۋستريالىق-يننوۆاتسيالىق دامۋ مەملەكەتتىك باعدارلاماسى, 2015-2017 جىلدارعا ارنالعان «نۇرلى جول» باعدارلاماسى, ينۆەستورلاردى قولداۋ شارالارى جانە ءوندىرىستى لوكاليزاتسيالاۋ اياسىنداعى ىنتىماقتاستىق مۇمكىندىكتەرى تۋرالى اقپاراتتاندىردى.
بيزنەس-فورۋم شەڭبەرىندە وتكەن پانەلدىك پىكىرسايىس بارىسىندا قازاقستان پارلامەنتى ءماجىلىسىنىڭ دەپۋتاتى – قازاقستان ماشينا جاساۋشىلار وداعىنىڭ باسقارما توراعاسى م.پىشەمباەۆ, اۆستريانىڭ ەكونوميكا پالاتاسىنىڭ ۆيتسە-پرەزيدەنتى ر.شەنتس جانە «كازنەكسينۆەست» اق توراعاسىنىڭ ورىنباسارى ا. ەرعازيەۆا ينتەراكتيۆتى فورماتتا قازاقستاندا بيزنەس جاساۋ مۇمكىندىكتەرى جانە ينۆەستيتسيالىق احۋال جايلى ايتىپ بەردى.
ۆيتسە-مينيستر ە. ساعاديەۆ اۆستريانىڭ ەكونوميكا ۆيتسە-ءمينيسترى ب. گيرلينگەرمەن كەزدەسىپ, تاراپتار ەكى-جاقتى ارەكەتتەسۋدى ودان ءارى كۇشەيتۋگە جانە نىعايتۋعا مۇددەلىلىگىن راستادى.
فورۋم شەڭبەرىندە «كازنەكسينۆەست» اق پەن «KapschTrafficCom» ترانسۇلتتىق كومپانياسى اراسىندا ىنتىماقتاستىق تۋرالى مەموراندۋمعا قول قويىلدى. بۇل كومپانيا قازاقستاندا جول سالاسىن دامىتۋعا قاتىسۋدى جوسپارلايدى. ودان باسقا ونەركاسىپشىلەر بىرلەستىگىنىڭ وفيسىندە ۆيتسە-مينيستر ە. ساعاديەۆ بىرقاتار جەتەكشى اۆستريالىق كومپانيا باسشىلارىمەن كەزدەسۋلەرى ءوتتى.
جالپى, وسى فورۋم بارىسىندا اۆستريالىق كومپانيالار قازاقستانمەن ىنتىماقتاسۋعا ۇلكەن قىزىعۋشىلىعىن كورسەتتى. الەۋەتتى ينۆەستورلاردان باسقا, فورۋم اۆستريالىق كومپانيالاردىڭ ەلىمىزبەن ونەركاسىپتىك كووپەراتسياعا مۇددەلىلىگىن ايقىندادى.
«ەگەمەن-اقپارات».
سۋرەت: inform.kz
