كەشە الدا كەلە جاتقان مەديتسينا قىزمەتكەرلەرى كۇنى مەرەكەسىنە وراي «قازاقستان رەسپۋبليكاسى پرەزيدەنتى ءىس باسقارماسى مەديتسينالىق ورتالىعىنىڭ اۋرۋحاناسى» رمك-ءنىڭ وڭ جاعالاۋداعى ەمدەۋ-دياگنوستيكالىق ورتالىعىندا «اشىق ەسىك كۇنى» اكتسياسى ءوتتى.
بۇل جونىندە رمك باس ءدارىگەرىنىڭ ورىنباسارى جوعارى ساناتتاعى دارىگەر ر.بايقوشقاروۆا اتالمىش ورتالىقتاعى سونى جاڭالىقتارىمەن بولىسكەن ەدى. اتاپ ايتار بولساق, ەمدەۋ-دياگنوستيكالىق ورتالىعى (ەدو) اتالمىش اۋرۋحانا بازاسىندا دا اشىلدى. مۇنداعى تاجىريبەلى ماماندار قازىرگى زامانعا مەديتسينالىق قۇرال-جابدىقتار كومەگىمەن دياگنوستيكا جاساپ, زاماناۋي مەديتسينانىڭ بارلىق باعىتتارى بويىنشا كونسۋلتاتسيا بەرەدى. ەدو حيرۋرگيالىق جانە تەراپيالىق ماماندىقتار بويىنشا جوعارى دەڭگەيدەگى زەرتحانالىق, اسپاپتىق جانە كلينيكالىق دياگنوستيكانى, ناۋقاستاردىڭ كەشەندى ەمى مەن ءتيىمدى مەديتسينالىق وڭالتۋىن قامتيتىن اقىلى ستاتسيونارلىق قىزمەتتەر كورسەتەدى. ەدو جانىندا 14 ەمدەۋ-دياگنوستيكالىق ءبولىمشە: وڭالتۋ, ستوماتولوگيا, فۋنكتسيونالدىق دياگنوستيكا, ساۋلەلىك دياگنوستيكا, كلينيكالىق-دياگنوستيكالىق زەرتحانا, ستاتسيونار, ءبىر اۋىسىمدا 24 باعدار بويىنشا 200 قابىلداۋدى جۇزەگە اسىراتىن ەمحانا جۇمىس ىستەيدى. باسقا ەمدەۋ مەكەمەلەرىمەن سالىستىرعاندا ورتالىقتىڭ ايرىقشا ەرەكشەلىگى – ءبىر جەردە امبۋلاتوريالىق-ەمحانالىق كومەك كورسەتۋدەن باستاپ, تەراپيا جانە حيرۋرگيا بولىمشەلەرى ناۋقاستارىنىڭ كوپباعدارلى ستاتسيونارلىق ەم قابىلداۋىنا دەيىن مەديتسينالىق جاردەمنىڭ تولىق كەشەنىن ۇسىنۋ مۇمكىندىگى, ونىڭ ىشىندە جوعارى تەحنولوگيالىق دياگنوستيكا مەن كوپباعدارلى ەمدىك شارالار. سونداي-اق, پاتسيەنتتەر كەزەكشىلىگىنىڭ جوقتىعى مەن ۇسىنىلاتىن مەديتسينالىق قىزمەتتەردىڭ (1400 ءتۇرى) كەڭ سپەكترى اسا ماڭىزدى فاكتورلاردىڭ ءبىرى بولىپ تابىلادى. ۇستىندەگى اق حالاتىنىڭ ءتۇسى مەن اقجارما پەيىلى قاتار ۇندەسكەن راحات وسەربايقىزىنىڭ اينالاسىنا شۋاق شاشا قارايتىن مەيىرىمدى كوزدەرى مەن قاراپايىمدىلىعى اكتسياعا كەلۋشىلەردىڭ ەرەكشە ىقىلاسىن تۋعىزدى. ادامعا ەڭ باستى قاجەتتىسى – جىلى ءسوز, جارقىن ءجۇز, شىنايى ءىس, ت.ب. وسىنىڭ ءبارى سول اۋرۋحانا قىزمەتكەرلەرىنىڭ بويىنان تابىلعانداي كورىندى. ارقايسىسىنىڭ جۇزىنەن: «بىزگە كەلىڭىزدەر, بىزدەن سۇراڭىزدار, كوڭىلدەرىڭىزدەن شىعۋعا تىرىسامىز!» دەگەندەي, ايرىقشا ءىلتيپات بىلدىرەدى. ءبىر قىزىعى, ءىس-شارا بارىسىندا ءبىر توپ دارىگەر-مەدبيكەلەر ادامداردى سالاماتتى ءومىر سالتىنا ۇندەيتىن فلەش-موب وتكىزدى. اكتسيا بارىسىندا كەلۋشىلەرگە بىلىكتى ماماندار تاراپىنان تەگىن كومەك كورسەتىلدى جانە اقىل-كەڭەستەر بەرىلدى. تاڭەرتەڭمەن تەگىن قىزمەت كورسەتىلەتىندىگىن ەستىگەن ۇلكەن-كىشىسى, جاسى مەن جاسامىسى بار قابىلداۋعا كەلگەن «باقىتتى استانالىقتاردىڭ» قاراسى قويۋلانىپ ۇلگەرىپتى. ءيا, مۇنداي مۇمكىندىكتىڭ بولا بەرمەيتىنىن تۇسىنگەن ءاربىر ازامات ءبىرىنشى بايلىق – دەنساۋلىقتىڭ قادىرىن جوعارى باعالايتىنداردىڭ قاتارىنان بولسا كەرەك. اكتسيانىڭ نەگىزگى ماقساتى دا سول, ازاماتتارعا دەر كەزىندە دارىگەرلىك كومەك كورسەتۋ, قاۋىپتى دەرتتىڭ الدىن الۋ جانە حالىقتى سالاماتتى ءومىر سالتىن ۇستانۋعا شاقىرۋ, ولارعا دۇرىس باعىت-باعدار بەرۋ. راۋشان تاۋىرحانقىزى, جۋرناليست. استانا.
سۋرەت: mcudprk.kz
