ۇبت-عا تىركەلۋ ۇلتتىق تەستىلەۋ ورتالىعىنىڭ سايتىندا app.testcenter.kz جۇرگىزىلەدى. تەستىلەۋدىڭ ءوزى 10-15 تامىز ارالىعىندا وتەدى.
عىلىم جانە ءبىلىم مينيسترلىگىندەگىلەر تامىزداعى ۇبت شەكتى بالل جيناي الماعان تالاپكەرلەردىڭ تەستىلەۋدەن قايتا ءوتىپ, جوعارى وقۋ ورنىنا اقىلى نەگىزدە ءتۇسۋ مۇمكىندىگى بولۋى ءۇشىن وتكىزىلەتىنىن اتاپ ءوتتى. تىركەلۋ كەزىندە تەستىلەنۋشىلەر ەمتيحان وتكىزىلەتىن ورىندى, كۇندى جانە ۋاقىتتى وزدەرى تاڭدايدى.
نەگىزگى ۇبت-عا قاتىسقان تالاپكەرلەر بەيىندىك پاندەر كومبيناتسياسىن تامىز تەستىلەۋىندە وزگەرتە الادى.
تامىز ايىنداعى ۇبت-عا اعىمداعى جانە وتكەن جىلعى مەكتەپ جانە كوللەدج تۇلەكتەرى, قانداستار (قر ازاماتى بولىپ تابىلمايتىن ۇلتى قازاق ازاماتتار), شىعارماشىلىق ماماندىقتاردان باسقا ماماندىقتارعا, باسقا ماماندىقتاردان پەداگوگيكالىق باعىتتارعا اۋىسقىسى كەلەتىن ستۋدەنتتەر جانە جوعارى وقۋ ورىندارىنا شارتتى تۇردە قابىلدانعان ستۋدەنتتەر قاتىسا الادى. سونىمەن قاتار جوعارى وقۋ ورنىنا اقىلى نەگىزدە ءوز ماماندىعى بويىنشا وقۋدى جالعاستىرۋدى جوسپارلاپ وتىرعان كوللەدج تۇلەكتەرى وقۋعا اڭگىمەلەسۋ قورىتىندىسى بويىنشا قابىلدانادى. بۇل رەتتە وقۋعا قابىلداۋدى وقۋ ورىندارىنىڭ قابىلداۋ كوميسسيالارى جۇزەگە اسىرادى.
بارلىق بەس ۇبت قورىتىندىسى بويىنشا شەكتى بالل جيناي الماعان تالاپكەرلەرگە جوو-عا شارتتى تۇردە اقىلى نەگىزدە وقۋعا ءتۇسۋ مۇمكىندىگى بەرىلەدى. ارى قاراي ولار 2025 جىلى قاڭتار, ناۋرىز, نەگىزگى جانە تامىز ۇبت-سىنا قاتىسىپ, جوعارى وقۋ ورنىندا وقۋىن جالعاستىرۋ ءۇشىن قاجەتتى شەكتى بالىن جيناي الادى.
