كاسىپكەر كەلىنشەك 2016 جىلدان بەرى كەبىس-ءماسىنى ويۋلاپ, ءتۇرلى تاسپەن اشەكەيلەپ تىگىپ, ساتىلىمعا شىعارا باستاعان. بۇعان دەيىن مۇنداي اياقكيىمدەر وتاندىق نارىقتا بولماعان. العاش دەپ ايتۋ سەبەبىمىز دە سول.
«سول جىلى ءۇشىنشى بالاممەن دەكرەتتىك دەمالىستا وتىرعان كەزىمدە «قانداي جۇمىسپەن اينالىسسام ەكەن؟» دەپ ويلاندىم. جولداسىمنىڭ جالاقىسى كۇنكورىسكە جەتە قويمايتىنى انىق. ءسويتىپ جۇرگەنىمدە Instagram جەلىسىنەن وزبەكستانداعى جارمەڭكەدە اشەكەيلى كەبىستەردىڭ تۇرعانىن كورىپ, «وسىلاردى نەگە وزىمىزدە تىكپەسكە؟» دەگەن وي كەلدى. وعان ۇلكەن قارجىنىڭ دا قاجەتى جوق ەدى. كوپ ۇزاماي بالانىڭ جاسقا تولعانعا دەيىن ءتۇسىپ تۇراتىن جاردەماقىسىنىڭ 20 مىڭ تەڭگەسىنە بازاردان 3 كەبىس ساتىپ الدىم. ونىڭ سىرتىن ويۋلاپ, اشەكەيلەپ تىگىپ, دايىن ءونىمدى ءوز Instagram پاراقشاما جاريالاپ, تاپسىرىس قابىلدايتىنىمدى حابارلادىم. ودان كەيىن ماسىلەردى دە بازاردان ساتىپ الىپ كەلىپ, سىرتىن ءدال سولاي ساندەپ ساتا باستادىم», دەيدى.
راحيما تىگىنشىلىك, ديزاينەرلىك ونەردى ەش جەردەن مەڭگەرمەپتى. بۇل كاسىپتى باستار ساتتە ءوز تۇيسىگىنە عانا سەنىم ارتقان.
«اۋلەتتە اتام ەتىكشى بولعان. مۇنداي ىسمەرلىك سول كىسىدەن دارۋى ابدەن مۇمكىن. بۇگىندە ءماسىنى ارناۋلى تسەح ارقىلى تەك بىلعارىدان تىكتىرەمىز. قازىر وسى ءونىمنىڭ جازدا كيەتىن ءجۇنسىز ءتۇرى, قىستا كيەتىن قوي جۇنىمەن جانە جاساندى جۇنمەن استارلانعان تۇرلەرى بار. سونداي-اق قونىشى ۇزىن جانە قىسقا, تابانى شەگەلەنگەن جانە جۇمساق دەگەن سياقتى بىرنەشە ءتۇرى بار. ساپاسىنا قاراي باعاسى دا ءارتۇرلى. ال سىرتىنا ادەمى تاسىن, ويۋىن قويىپ, جۇبايىم ەكەۋمىز ۇيدەن ساندەيمىز. ەڭ العاشىندا ءبىر كۇندە ءبىر ءماسىنى اۋرە ەتەتىنبىز. قازىر ءبىر ساعاتتا تىگەتىن بولدىق. قولىمىز ابدەن جاتتىققان», دەيدى راحيما.
وتباسىلىق كاسىپ ارقىلى تىگىن ونەرىن قوسىمشا تابىس كوزىنە اينالدىرعان ەرلى-زايىپتى «Qurym masi» برەندىن جان-جاققا تانىتىپ وتىر. ايتا كەتەتىن ءبىر جايت, كەيىپكەرىمىز كاسىبىن كەڭ كولەمدە دامىتۋ ءۇشىن مەملەكەتتەن قارجىلاي قولداۋ الماپتى.
«جاز مەزگىلىندە ءماسى كوپ سۇرانىسقا يە ەمەس, سوندىقتان كۇنىنە 1-2 دانا عانا تىگەمىز. ايىنا 300 مىڭداي پايدا تۇسەدى. تاپسىرىس كوپ تۇسەتىن ۋاقىت – كۇز بەن قىستىڭ العاشقى ايلارى. ول ۋاقىتتا كۇنىنە 10 ماسىدەن كوپ تىگەمىز. ەڭ ارزانى – جازدىق ماسىلەر. كەبىسسىز, قاراپايىم ءتۇرى – 12 مىڭ, ال كەبىسىمەن, ويۋلانعان ءتۇرى – 18 مىڭ تەڭگە. ەڭ قىمباتى – قويدىڭ جۇنىمەن استارلانعان جانە تابانى شەگەلەنگەن ءتۇرى. نەگىزىنەن جۇرت ونى جەلتوقساندا, جاڭا جىلدا ۇيدەگى ۇلكەندەرىنە سىيلىق رەتىندە الادى. سودان سوڭ 8 ناۋرىز, كورىسۋ, ناۋرىز مەرەكەلەرى قارساڭىندا جاقسى وتەدى. مۇنداي ۋاقىتتا ايىنا 2-3 ميلليون تەڭگە تازا پايدا تۇسىرۋگە بولادى. ال كەبىس-ءماسىنىڭ ديزاينى تۇتىنۋشى سۇرانىسىنا بايلانىستى تىگىلەدى», دەيدى شەبەر كەلىنشەك.
ۇلتتىق ناقىشتاعى اياقكيىمگە تاپسىرىس ەلدىڭ ءار وڭىرىنەن تۇسەدى. ءتىپتى شەتەلدەن, مىسالى, اقش, قىتاي, رەسەيگە الىپ كەتكەن وتانداستارىمىز دا بولعان. شەبەردىڭ كەبىس-ماسىلەرى بىرقاتار ءسان ءۇيىنىڭ ساۋدا نۇكتەلەرىنە دە قويىلعان. ولار شەبەردەن ءوز قۇنىنا الىپ, ۇستىنەن ءسال اقى قوسىپ ساتاتىن كورىنەدى.
كاسىپكەردىڭ ەندى ءبىر ماقساتى بار, ول – ۇلتتىق ناقىشتا كەبىس پەن ءماسىنى ساندەپ تىگۋدەن شاكىرت تاربيەلەۋ. بار بىلگەنىن ۇيرەتەم دەگەن راحيما مۇنداي ۇلتتىق كاسىپتىڭ ءار وڭىردە دامۋىن شىن قالايتىنىن دا ايتىپ وتىر.
