ازاتتىعىمىزدىڭ 23 جىلىندا كوز الدىمىزدا بولعان ءتۇبىرلى وزگەرىستەردى, ءتىپتى, تىلمەن جەتكىزۋ قيىن-اق. مىنە, وسى تاۋەلسىزدىك تۋىندىسىنىڭ ەشبىر جان تالاسا قويمايتىن العاشقى اۆتورى – نۇرسۇلتان نازارباەۆ. تاۋەلسىزدىكتىڭ العاشقى جىلدارىنداعى ءبىز باستان كەشكەن قيىندىقتاردى كىم ۇمىتا الار؟ ارينە, «باس-باسىنا بي بولعان وڭكەي قيقىمداردىڭ» دا تابىلماي قالعاندىعىن جاسىرۋعا بولمايدى. باسقاسىن ايتپاعاندا, وسى تاۋەلسىزدىگىمىزگە كۇمانمەن قاراعان, ىلگەرى جىلجىعان كوشىمىزدىڭ ءبىر جەردە اۋىپ قالماي, دىتتەگەن جەرىنە امان-ەسەن باراتىندىعىنا دا تولىق سەنىمدى بولماعان مىسىقتىلەۋلىلەردىڭ دە ارامىزدا جۇرگەندىگىن ەلەمەي كەتۋگە بولار ما؟! مىنە, قيراندىدان جاڭا مەملەكەتتىڭ قابىرعاسىن قالاۋ, قالاپ قانا قويماي, الەمدىك وركەنيەتتەن ويىپ تۇرىپ ءوز ورنىن يەمدەنۋ دەگەن ۇلى ميسسيا بارىمىزدەن بۇرىن ەلباسى نۇرسۇلتان نازارباەۆتىڭ موينىنا ءتۇسىپ ەدى عوي. ەلوردامىزدا قازاقستان پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ قولداۋىمەن وتكەن جىلى «قازاقستاننىڭ ىسكەر ايەلدەر قاۋىمداستىعى» ۇيىمداستىرعان ايەلدەردىڭ ءىىى ەۋرازيالىق سامميتىنە قاتىسۋ قۋانىشىنا بولەندىم. جاس تاۋەلسىز مەملەكەتىمىزدە باسقا تالاي جەتىستىكپەن بىرگە كاسىپكەر ايەلدەردىڭ دە ىقپالى ارتىپ كەلە جاتقانىنا ايقىن كوز جەتكىزدىم. ايەل-انالاردىڭ, ارينە, قولىنان كەلمەيتىن تىرلىك جوق. ۇزدىكتەردەن ۇيرەنىپ, تىڭ جوسپاردى العا قويعانعا نە جەتسىن. بالانى دا تاربيەلەپ, كاسىپتى دە دوڭگەلەتكەن نازىك جاندىلار قانشاما. ەلىمىزدىڭ ايماقتارىنان, شەتەلدەردەن كەلگەن ارىپتەستەرمەن ديدارلاسۋلاردان وسىنداي وردالى وي ءتۇيدىم. الىستى بولجاي بىلەتىن كورەگەن ساياساتكەر, ەلى سۇيگەن ەلباسىنىڭ بارلىق بۋىن وكىلدەرىنە سياقتى, نازىك جاندىلارعا دا ولشەۋسىز قامقورلىعىن سەزىنىپ كەلەمىز. وسىلايشا ەڭبەك ادامدارىنا جىگەر, سەرپىلىس سىيلاۋى دا وتە ورىندى. «جالپىعا ورتاق ەڭبەك قوعامىنا قاراي 20 قادام» باعدارلامالىق ماقالاسىنىڭ ءتۇپ توركىنى دە ەلدى ەسەلى ەڭبەككە جۇمىلدىرۋ ەدى. ال, ەلباسىمىزدىڭ باستاماسىمەن جۇزەگە اسىرىلىپ جاتقان شاعىن جانە ورتا كاسىپكەرلىكتى جەتىلدىرۋ جولىنداعى باياندى باعدارلامالاردىڭ ناتيجەسىندە تالاي جاننىڭ شارۋاسى شالقىپ, كاسىپتەرى ورگە باسقانىنا بارشامىز كۋامىز. مۇنى تۇپتەپ كەلگەندە, حالىقتىڭ ءال-اۋقاتىنىڭ ارتۋى, ورتاق وتانىمىزدىڭ الەۋمەتتىك-ەكونوميكالىق نىعايۋى دەپ ءتۇسىنگەنىمىز ابزال.
جۇبان ەلىنىڭ حالقى تالاي ۇلت پەن ۇلىستى ورتاق شاڭىراق اياسىندا بەرەكە-بىرلىكتە توپتاستىرىپ, جاس مەملەكەتتى دامۋدىڭ داڭعىل جولىنا تۇسىرگەن ەلباسىمىزدىڭ سارابدال ساياساتى مەن باتىل باستامالارىن ءاردايىم قولداپ كەلەدى, كەلەر كۇندەرى دە قولدايتىن بولادى. ويتكەنى, اۋدان جۇرتشىلىعى مىزعىماس تىرلىكتىڭ, بەيبىت كۇننىڭ باعاسىن ءبىر كىسىدەي سەزىنەدى. دەسەك تە, اۋدان, ءوڭىر, كۇللى قازاق ەلى تۇرماق, ەلباسىمىزدىڭ ۇلىلىعىن الەم ەلدەرى مەن تاريح الدەقاشان-اق مويىنداعان.
«تاۋەلسىزدىك تاريحتىڭ ماڭگىگە ءبولىپ بەرگەن ەنشىسى ەمەس, حالىقتىڭ مامىراجاي ءومىر سۇرۋىنە بەرىلگەن كەپىلدىك تە ەمەس, اڭعال بولماعانىمىز دا ابزال», – دەگەن-ءدى ەلباسى. اق جۇمىرتقا, سارى ۋىز تاۋەلسىزدىگىمىزدى ابايلاپ الديلەيىك, سىندىرىپ الساق, ەندى قايتىپ كەلەر مە؟ ەندىگى مىندەتىمىز – ەلباسى ساياساتى مەن ەل بىرلىگىن ناسيحاتتاۋ, جاس ۇرپاققا جاراستىقتىڭ, بىرلىكتىڭ جولىن مەڭزەپ, ماڭداي تەرمەن باقىتقا جەتۋگە ءجون سىلتەۋ.
«قازاقتان-2050» باعدارلاماسىمەن قۋاتتانىپ, ۇلى بولاشاققا قاراي تاۋەلسىز قازاقستان كەمەسى ءجۇزىپ بارادى. پالۋباسىندا جارقىن ءجۇزدى قازاقستان جۇرتى. ال شتۋرۆالىندا – الەم تانىعان قايراتكەر, كەمەڭگەر ساياساتكەر.
داريعا سۇلەيمەنوۆا, كاسىپكەر.
باتىس قازاقستان وبلىسى, اقجايىق اۋدانى.
