فوتو: senate.parlam.kz
ب.قانيەۆ وبلىستىڭ تۇراقتى دامۋىن قامتاماسىز ەتۋ جانە تۇرعىنداردىڭ ءومىر ءسۇرۋ ساپاسىن ارتتىرۋدا بيلىكتىڭ بارلىق دەڭگەيلەرى اراسىنداعى ۇيلەستىرىلگەن ءىس-قيمىلدىڭ ماڭىزدىلىعىن اتاپ ءوتتى. سەناتور كەزدەسۋلەر بارىسىندا ينفراقۇرىلىم مەن تۇرعىن ءۇي-كوممۋنالدىق شارۋاشىلىقتى جاقسارتۋ, سونداي-اق شاعىن جانە ورتا بيزنەستى قولداۋدىڭ مەملەكەتتىك باعدارلامالارىن ىسكە اسىرۋ ماسەلەلەرىنە باسا نازار اۋداردى.
اقتوبە وبلىسىنىڭ اكىمىمەن كەزدەسۋ كەزىندە اعىمداعى ىستەردىڭ جاي-كۇيى جانە سۋ تاسقىنىنىڭ سالدارىن جويۋ جونىندە قابىلدانىپ جاتقان شارالار تالقىلاندى. قورعانىس قۇرىلىستارىن نىعايتۋ, زالال كەلگەن نىسانداردى قايتا قالپىنا كەلتىرۋ جانە زارداپ شەككەن ازاماتتارعا كومەك كورسەتۋ جوسپارى تۋرالى دا ءسوز بولدى. وسى ماقساتتارعا بولىنگەن رەسۋرستاردى ۋاقتىلى جانە ءتيىمدى ءبولۋ قاجەتتىگى اتاپ ءوتىلدى. جىلىتۋ ماۋسىمىنا دايىندىق ماسەلەسى دە قوزعالدى. وتىنمەن ۇزدىكسىز جابدىقتاۋدى قامتاماسىز ەتۋ جانە جىلۋ ەنەرگەتيكاسى وبەكتىلەرىن كۇتىپ-باپتاۋ جۇمىستارىن جۇرگىزۋ شارالارى قارالدى.
ب.قانيەۆ وبلىستىڭ مۇعالجار جانە تەمىر اۋداندارىندا دا بولدى. دەپۋتات مۇعالجار اۋدانىنداعى قاندىاعاش قالاسىندا 600 ورىندىق ەكى جاڭا مەكتەپتىڭ, سونداي-اق شۇبارقۇدىق اۋلىنداعى مۇراجاي مەن مۇراعاتتىڭ جاڭا عيماراتىنىڭ سالىنۋ بارىسىمەن تانىستى. تەمىر اۋدانىنىڭ ورتالىعىنداعى بىرقاتار كوشەگە اسفالت توسەۋ جۇمىستارىنا كۋا بولدى. سەناتور مەردىگەر كومپانيالاردىڭ وكىلدەرىنە قۇرىلىس جۇمىستارىنىڭ قارقىنىن جەدەلدەتۋ تۋرالى ۇسىنىس ايتتى.
