«ەگەمەن قازاقستان» گازەتىنىڭ ءتىلشى قوسىنىنا جاسى كەلگەن قارت انا بىرنەشە رەت تەلەفون سوقتى.
ارتىنان ءوزى دە كەلدى. سەكسەنگە تولعان قاريا ەكەن. اتى-ءجونىم – قاماريا دۇيسەنوۆا, دەپ تانىستىردى ءوزىن. ءاپ دەگەندە, ول كىسىنىڭ ايتايىن دەگەن ارىزىنىڭ تۇپكى ءمانىن ۇعا الماعاندىقتان, كەينىرەك تاعى ءبىر كەزدەسىپ سويلەسۋدى ۇيعارعان ەدىك. سول كەلىسىم بويىنشا زەينەتكەر كەشە بىزگە تاعى دا حابارلاسىپ, قابىرعاسىنا قارا تاستاي باتىپ جۇرگەن جايتتى اڭگىمەلەپ بەردى. 2005 جىلدىڭ 17 مامىرى كۇنى بالام ماحمۇت دۇيسەنوۆ ورال قالاسىنان ءبىر ءۇي ساتىپ الىپ ەدى. ول ونى 2006 جىلى ماعان سىي رەتىندە اۋداردى. سودان بەرى وسى ءۇيدىڭ اۋلا-شارباعىن زاڭداستىرا الماي كەلەمىن. ونىڭ قۇجاتتىق رەتتەلۋىن كۇتەمىن دەپ جۇيكەم ابدەن جۇقارىپ ءبىتتى. بۇل ءوزى ءبىر اۋلانىڭ ىشىندە ەكى پاتەر ورنالاسقان ءۇي. بار تۇسىنبەستىك ءدال وسى ارادان تۋىنداپ وتىر. ياعني, مەنىڭ ءۇيىم قالاداعى ا.سكوروبوگاتوۆ كوشەسى № 42 ءۇيدىڭ اۋلاسىندا №2 بولسا, كورشىم وتەگەن ەرمەكوۆتىڭ ءۇيى № 1 پاتەر بولىپ ەسەپتەلەدى. ال وسى №1 پاتەردىڭ تەحنيكالىق پاسپورتىنىڭ تۇپنۇسقاسى جوق. ءسويتىپ, اينالىپ كەلگەندە, ونىڭ كەسىرى ماعان ءتيىپ وتىر. ولاي بولسا, شارباقتىڭ قۇجاتى نەگە مەنىڭ اتىما جازىلمادى؟ مۇنداي جاعدايدا بۇل شارباق قالايشا ورتاق اۋلا بولماق؟! وسى ساۋالداردى العا تارتىپ, بارماعان جەرىم, باسپاعان تاۋىم جوق. الايدا, ونىڭ بارىنەن ەشقانداي ناتيجە شىقپادى. ورال قالاسى اكىمدىگىنىڭ تۇرعىن ءۇي كوممۋنالدىق شارۋاشىلىعى ءبولىمىنەن بىلگەنىم: ادىلەت دەپارتامەنتىنە مەملەكەتتىك تىركەۋدەن ءوتۋى ءۇشىن كورشىم وتەگەن ەرمەكوۆتىڭ تەحنيكالىق پاسپورتىنىڭ ءتۇپنۇسقاسى مىندەتتى تۇردە بولۋى كەرەك ەكەن. ال ونىڭ جوقتىعىنا مەنىڭ قانداي كىنام بار؟! – دەپ تاڭدانىسىن جاسىرا المايدى اجەي. سونداي-اق, قاماريا دۇيسەنوۆا ءۇي قۇجاتىنىڭ اكتىسى ەكىگە ءبولىنىپ كەتكەنىن قىنجىلا ايتىپ بەردى. ءتىپتى, وزگەسىن ايتپاعاندا, مەنىڭ ءۇيىمنىڭ قۇجاتىنىڭ ەكىگە بولىنگەن نۇسقاسىنىڭ ءبىرى كورشىم وتەگەن ەرمەكوۆتىڭ قولىندا ءجۇر. سوندا مەن نە ىستەۋىم كەرەك, دەپ شاراسىزدىق تانىتادى قاماريا اپاي. ايتەۋىر, ءۇيىمنىڭ قۇجاتتارى كوميۋتەردە تۇرعان سوڭ ونىڭ دۇرىستىعىنا ەشكىم كۇمان كەلتىرە المايتىن شىعار دەگەن ءۇمىتتىڭ جەتەگىندە ءالى ءجۇرىپ كەلەمىن. ايتسە دە, كارى قويدىڭ جاسىنداي جاسىم قالسا دا شىندىققا كوز جەتكىزە الاتىن ءتۇرىم جوق. مەنىڭ ءۇيىمنىڭ قۇجاتتارىنىڭ ءبارى دە دۇرىس. تەك قۇجاتتىڭ ەكىگە ءبولىنىپ كەتكەنى قاتتى قينايدى. وسى جاعدايدىڭ ورىن العانىنا دا التى جىل تولىپ وتىر.
تەمىر قۇسايىن, «ەگەمەن قازاقستان».
باتىس قازاقستان وبلىسى.
سۋرەت:eldorado.ru
