وبلىس اكىمدىگى جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ مۇرىندىق بولۋىمەن, ارداگەرلەر كەڭەسىنىڭ قولداۋ كورسەتۋىمەن جامبىلدىق ونەر ۇجىمدارى دا بۇل بايقاۋدا باق سىناۋ مۇمكىندىگىنە يە بولدى. وسىلايشا, «عۇمىرداريا» ۇلت اسپاپتار ءانسامبلى باستاپ, «اۋليەتا» ونەر ۇجىمى قوشتاپ, ايىر قالپاقتى اعايىنداردىڭ ەلىندەگى ونەر مەرەكەسىندە باق سىنادى.
ونەرپازداردىڭ شىعارماشىلىق مۇمكىندىكتەرىن اشىپ, ءوز ەلىنىڭ مادەنيەتىن حالىقارالىق دەڭگەيدە تانىتىپ, رۋحىن كوتەرۋ ماقساتىندا وتكىزىلگەن اۋقىمدى ءىس-شارادا تۇركيا, رۋمىنيا, ءۇندىستان, قىرعىز رەسپۋبليكاسى, قازاقستان سىندى مەملەكەتتەردەن باس-اياعى 18 توپ ونەر كورسەتتى.
بايقاۋ شارتى بويىنشا دوداعا جاسى 35-تەن جوعارى ونەرپازدار قاتىسۋعا ءتيىس بولسا, جامبىلدىق ونەرلى ارداگەرلەر ونەرىمەن عانا ەمەس, جاسىمەن دە وزگەلەرىنەن وق بويى وزىق تۇردى. بەلسەندى ومىرمەن بىرگە ونەرىن ورىستەتىپ جۇرگەن قاريالارىمىز اسپاپتىق ورىنداۋ, حورەوگرافيا, ۆوكالدىق ونەر, كوركەمسوز وقۋ سىندى بىرنەشە اتالىم بويىنشا سىنعا ءتۇستى.
جامبىلدىق ونەرپازدار اتالعان بولىمدەردىڭ بارلىعىنا دەرلىك ۇلكەن دايىندىقپەن كەلىپ, جەڭىس تۇعىرىنان كورىنۋگە تىرىستى. ءومىر مەن ونەرىن ۇشتاستىرا بىلگەن ونەگەلى ارداگەرلەرىمىز ءا دەگەننەن-اق جۇرتتىڭ ىستىق ىقىلاسىنان بولەك, قازىلاردىڭ نازارىن وزدەرىنە اۋداردى. ۇلى ابايدىڭ «كوزىمنىڭ قاراسى» ءانىن ەكى تىلدە ورىنداعان قاريالاردان قۇرالعان تورتتىك جۇلدەلى ءى ورىندى يەلەنىپ, رۋمىنيا مەملەكەتىندە وتەتىن ءىرى بايقاۋعا جولداما ۇتىپ السا, «التىن جاس» بيشىلەر توبىنىڭ ورىنداۋىنداعى بي كوپشىلىكتىڭ كوڭىلىنەن شىقتى. ۇجىمعا ەكىنشى ورىن بۇيىردى.
تارازدان بارعان سىدىقنازار قارجاۋباي «شالقىمالى», «دۇنيە-اي» اندەرىمەن تىڭدارمان قاۋىمدى ءتانتى ەتسە, امانقۇل ىسقاقوۆ جەكە بي ورىنداۋىندا قازاقتىڭ ۇلتتىق ءبيى «قاراجورعانى» بيلەپ, وزبەك ۇلتىنىڭ ء«اندىجان پولكاسىن» ورىنداۋدا شەبەرلىك تانىتتى.
ۇيىمداستىرۋشى تاراپتىڭ تىلەگىنە سايكەس بايقاۋعا قاتىسۋشىلاردىڭ ساحنالىق شەبەرلىگى دە نازاردان تىس قالماعانىن ايتا كەتكەن ءلازىم. «عۇمىرداريا» ۇلتتىق اسپاپتىق ءانسامبلى مەن «اۋليەاتا» ارداگەرلەر ءانسامبلىنىڭ ونەرى مەن ساحنالىق وبرازدارى جوعارى باعالانىپ جۇلدەلى ورىنداردان كورىندى.
پوەزيا اتالىمى بويىنشا وتكەن بايقاۋ دا كوپتىڭ كوڭىلىنەن شىقتى. سونداي-اق مارات بايداليەۆ, حانىمكۇل بەسىنباي, زاۋرە جۇماباەۆا باستاعان ونەرپازدار كوركەمسوز وقۋدىڭ ۇزدىك ۇلگىسىن كورسەتىپ, قوشەمەتكە بولەندى.
حالىقارالىق بايقاۋ سوڭىندا جۇلدەلى ورىنداردان كورىنگەن قاتىسۋشىلار الداعى ۋاقىتتا تۇركيا, رۋمىنيا ەلدەرىندە وتەتىن ونەر دودالارىنا جولداما السا, باسقا ونەرپازدار العىس حاتتارمەن ماراپاتتالدى. بايقاۋ بارىسىندا «بەلسەندى ۇزاق ءومىر» ورتالىعىنىڭ مۇشەلەرى بەلسەندىلىك تانىتقانىن دا ايتا كەتكەن ءجون.
جامبىل وبلىسى
