تابيعاتى تامىلجىعان, ساۋىر-سايقان تاۋىنىڭ بوكتەرىندە قونىس تەپكەن «بايتەرەك» مادەني-سپورتتىق ساۋىقتىرۋ ورتالىعىنا كەلگەن كەزدە ءبىزدى ديرەكتور اناربەك دۇتباەۆ قارسى الدى. ءوز ىسىنە مىعىم, جاس بولسا دا ىسكەرلىگىمەن ەسىمى اۋىزعا ىلىنە باستاعان اناربەك جاقىپبەك ۇلى بىردەن اتقارىپ جاتقان جۇمىستارىمەن تانىستىرا باستادى.
– بۇل مەكەمە شىعىس وڭىرىندە ءبىرىنشى بولىپ اشىلدى. قۇرىلىستى نەبارى ءبىر جىلدا تاجىريبەلى مامان, «زايسان قۇرىلىس» مەكەمەسىنىڭ باسشىسى بولات نۇراسىلدىڭ جىگىتتەرى سالىپ بەردى. ولارعا, سول كەزدەگى باستاما كوتەرىپ, كەرەمەت ورتالىقتىڭ اشىلۋىنا قامقورلىق جاساعان سەرىك زينابەك ۇلىنا العىسىمىز ەرەكشە. «بايتەرەك» ورتالىعىنا مەكتەپتەگى دارىندى بالالار, كوپ بالالى وتباسىنداعى شاكىرتتەر, تۇرمىسى ناشار جانداردىڭ بالالارى كەلىپ, 12 كۇن بويى تازا اۋادا دەمالادى, كوڭىلدەرىن كوتەرىپ, ءتۇرلى سپورت جارىستارىن وتكىزەدى. وتكەن جىلى اۋداننىڭ 420 بالاسى, سونداي-اق باسقا وڭىرلەردەن 100 بالا كەلىپ اۋناپ-قۋناپ قايتتى. اۋداننىڭ وقۋشىلارى بيۋدجەت ەسەبىنەن دەمالسا, باسقا جاقتان كەلگەندەر نەبارى 12 مىڭ تەڭگەدەن تولەدى. اقىلى قىزمەت كورسەتىپ, قارجى تابۋ ماسەلەسى دە شەشىمىن تاپقان, ءتورت ماۋسىم بويى وبلىس تۇرعىندارى دا كەلىپ, دەنساۋلىقتارىن تۇزەپ قايتادى, – دەدى ورتالىق باسشىسى اناربەك جاقىپبەك ۇلى.
اناربەك مەملەكەتتىك قىزمەتتە ىسىلعان, مەكتەپتە ۇستازدىق قۇرعان, ديرەكتور قىزمەتىندە دە مول تاجىريبە جيناعان ازامات ەكەن. ول بالالاردىڭ پسيحولوگياسىن جەتىك بىلەدى, ولارمەن اڭگىمەلەسىپ, بارلىق جاعدايدى جاسايتىن كورىنەدى. ورتالىقتا قازىر 13 ءۇي, ونىڭ 8-ءى جاتاقحانا, اسحانا, ۆولەيبول, باسكەتبول, بادمينتون, فۋتبول الاڭدارى بار. تابيعاتى تامىلجىعان بەستەرەك قورىقشاسىندا اتپەن سەرۋەندەۋگە, قاردا سىرعانايتىن شانامەن دەمالۋعا جاعداي جاسالعان. مۇندا سپورت جارىستارى تۇراقتى ءوتىپ تۇرادى. ماسەلەن, وتكەن جىلدىڭ جازىندا قىتايدىڭ جەمەنەي اۋدانىنان 17 وقۋشى وسى جەردە ءۇش كۇن دەمالعان كەزدە «بايتەرەكتىڭ» بالالارىمەن فۋتبول, ۆولەيبولدان جارىسىپتى. ال كەرىسىنشە زايساننىڭ بالالارى جەمەنەيگە بارعاندا, قارسىلاستارىن ۇتىپ كەتىپتى.
ورتالىقتىڭ زايسان قالاسىندا 18 ورىندىق قوناقۇيى, بالالاردىڭ ويىن الاڭدارى بار. قوسىمشا قىزمەتتەن تۇسكەن قارجىعا قاجەتتى زاتتاردى ساتىپ الامىز دەيدى ديرەكتور. دەمالىس ورتالىعى ماڭىندا جابايى الما, المۇرت, قويبۇلدىرگەن, تاڭقۋراي, نەشە ءتۇرلى شيپالى وسىمدىكتەر كوپ بولعاندىقتان, مەكتەپ وقۋشىلارى ولاردى جيناۋعا قولعابىس جاسايتىن كورىنەدى. دەمالىس ورتالىعىنىڭ ديرەكتورى اناربەك دۇتباەۆ بەس مەملەكەت اراسىندا وتكەن ەكونوميكالىق كورسەتكىشى ءۇشىن «ەكونوميكا ماقتانىشى» دەگەن وردەنمەن ماراپاتتالىپتى. وسى مەكەمەنىڭ باس ەسەپشىسى الماش دونباەۆاعا «كاسىبي سالاداعى جەتىستىگى ءۇشىن» مەدالى, ال فەلدشەر الماس سەيىتحانوۆقا ۇزدىك سەرتيفيكات تابىس ەتىلدى.
– 2015 جىلى قازاقستان, ۋكراينا, بەلارۋس, رەسەي جانە ازەربايجان سياقتى بەس مەملەكەت اراسىندا جۇرگىزىلگەن ەكونوميكالىق رەيتينگتە جاقسى ناتيجە كورسەتكەنى ءۇشىن «بايتەرەك» ورتالىعى «2015 جىلدىڭ سالا كوشباسشىسى» دەگەن سەرتيفيكاتقا يە بولدى. اۋدان اكىمى الماس وڭداقانوۆ قۋانىشتى حاباردى ەستىگەن كەزدە ۇجىمدى ارنايى كەلىپ قۇتتىقتاپ, تابىس تىلەدى, – دەپ اڭگىمەگە ارالاستى اۋداندىق ءماسليحاتتىڭ حاتشىسى داۋلەت ىدىرىشەۆ.
دەمەك, ءباسى بيىك «بايتەرەكتىڭ» الداعى ۋاقىتتا دا بولاشاق ۇرپاققا ادال قىزمەت ەتە بەرەتىنى ءسوزسىز.
وڭداسىن ەلۋباي, جۋرناليست. شىعىس قازاقستان وبلىسى, زايسان اۋدانى. سۋرەتتە: ورتالىقتىڭ قىزمەتكەرلەرى.
