سۋرەتتى تۇسىرگەن – اقادىل رىسماحان
دەرەككە جۇگىنسەك, اسا اۋىلىندا 13 مىڭنان استام حالىق تۇرادى. جەرگىلىكتى جۇرت وتىز جىل بويى التى جولاقتى تەمىرجولدى توتەسىنەن باسىپ ءوتىپ جۇرگەن. «ايتا-ايتا التايدى, جامال اپا قارتايدى» دەۋگە شاق قالعان بۇقارانىڭ تىلەگى اقىرى ورىندالدى. ەندى اسالىقتار تەمىرجولدىڭ ارعى بەتىنە الاڭسىز قاتىنايدى.
وبلىس اكىمدىگى ءباسپاسوز قىزمەتى كەلتىرگەن دەرەككە جۇگىنسەك, كوپىر قۇرىلىسىن جۇرگىزگەندەر بارلىق قاۋىپسىزدىك شاراسىن نازارعا العان. مۇندا جۇرگىنشىلەر جولاعى قاراستىرىلعان. كوپىردىڭ بيىكتىگى 6 مەتردى قۇراسا, ۇزىندىعى 41 مەتر ەكەن. ءبىر سوزبەن ايتقاندا بارلىق جۇمىس ستاندارتقا ساي اتقارىلعان.
ءوڭىر باسشىسى ەربول قاراشوكەەۆ قوماقتى قاراجاتقا سالىنعان كوپىردى كۇتىپ ۇستاۋدىڭ ماڭىزى زور ەكەنىن ايتىپ وتىر. سونداي-اق ول قاۋىپسىزدىك شارالارىن قاتاڭ قاداعالاۋ قاجەت دەپ ەسەپتەيدى. بۇل جۇمىستى جامبىل اۋدانى اكىمدىگى نازارعا الماق.
«بالالار قاۋىپسىزدىگى نازاردان تىس قالماۋعا ءتيىس. اۋىل تۇرعىندارى ۇزاق جىل بويى كوتەرگەن ماسەلە وڭ شەشىم تاۋىپ, اسپالى كوپىردىڭ قۇرىلىسى جۇرگىزىلدى. اۋدان ورتالىعىن مەكەندەگەن جەرگىلىكتى حالىق ەندى ءارى-بەرى الاڭسىز قاتىنايتىن بولدى. وسى كوپىردى كۇتىپ ۇستاۋدىڭ ماڭىزى زور», دەيدى ءوڭىر باسشىسى.
جەرگىلىكتى حالىق بۇل قۋانىشتى ۇزاق جىل بويى كۇتكەنىن ايتىپ وتىر. ۋادەنىڭ ۇدەسىنەن شىعىپ, كوپىردى مەجەلى مەرزىمدە پايدالانۋعا بەرگەن جەرگىلىكتى اتقارۋشى بيلىككە دەگەن ريزاشىلىقتارىن جەتكىزگەندەردىڭ قاراسى قالىڭ.
«وسى ءبىر وزەكتى ماسەلە اسالىقتاردى ۇزاق جىل بويى تولعاندىرعانى جاسىرىن ەمەس. جەرگىلىكتى جۇرت اسپالى كوپىردىڭ قاجەتتىگىن ايتۋدان جالىققان جوق. ءتۇپتىڭ تۇبىندە بيلىك ءبىزدىڭ ءۇنىمىزدى ەستىگەنىنە بەك قۋانىشتىمىز. مىنە, ەندى كوپتەن كۇتكەن ارمانىمىز اقيقاتقا اينالىپ, رياسىز قۋانىپ وتىرعان جايىمىز بار. ۋادەدە تۇرىپ, كوپىردى پايدالانۋعا بەرگەنى ءۇشىن باسشىلارعا ايتار العىسىمىز شەكسىز», دەيدى اسا اۋىلىنىڭ تۇرعىنى, ارداگەر ءابدىتالىپ وماروۆ.
وبلىس اكىمدىگىنىڭ ءباسپاسوز قىزمەتى كەلتىرگەن دەرەككە سۇيەنسەك, اسپالى كوپىردىڭ قۇرىلىسىن جۇرگىزگەن كەزدە جەرگىلىكتى اتقارۋشى بيلىك مۇمكىندىگى شەكتەۋلى ازاماتتار مەن قاريالاردىڭ تالاپ-تىلەگىن ەسكەرىپتى. ۇلكەندەردىڭ وتىنىشىنە سايكەس, كوپىردىڭ ەكى جاعىنا جەدەل ساتى ورنالاستىرىلعان. بۇل جەدەلساتىنى دەنساۋلىعىندا اقاۋى بار ازاماتتار پايدالانىپ, جولدىڭ ارعى بەتىنە وتە الادى.
جامبىل وبلىسى,
جامبىل اۋدانى
