بۇگىندە ءبىر ءتاۋىرى, قادام اتتاعان سايىن انتالاعان دۇكەن. قاي-قايسىسىنا باس سۇقساڭ دا قالاعانىڭ تابىلا كەتىپ جاتادى. ولارعا وسى جولعى بۇيىمتاي قورجىن تولتىرۋ ەمەس, جەرگىلىكتى ونىمدەردىڭ ءوتىمىن بايقاستاۋ بولاتىن. شىندىعىن ايتقاندا, بۇعان دەيىنگىدەي وزىمىزدىكى مە, وزگەنىكى مە كىرگەن بەتتە سورەلەردەن مەنمۇندالاعانىنا قول سوزۋعا ۇمتىلماي, ەلىمىزدە دايىندالعاندارىن ىزدەستىردىك. ول وڭاي شارۋا ەمەس ەكەن. قاپتاعان تاۋارلاردىڭ ىشىنەن باسقاسىن بىلاي قويعاندا, قاراعاندىدا شىعارىلاتىندارىن تابۋ قيىن بولدى. ال «قازاقستاندا جاسالعان» اكتسياسى بويىنشا سونداي جارناما بىردەن كوزگە ۇرارلىق تۇستاردا جيناقتالۋعا تيىستىلەرىن كورەمىز بە دەگەن ءۇمىتىمىز دە ءۇزىلىپ قالدى. مۇنداي مۇيىستەر مۇلدەم جوق بولىپ شىقتى.
كوپ رەتتە ايماعىمىزدىڭ ازىق-ت ۇلىگىن ساتىپ العىمىز كەلەدى. قاراعاندى كونفەتىنىڭ, بالقاش بالىعىنىڭ, قارقارالى قول مايىنىڭ, توپار كارتوبىنىڭ, كوكسۋ قيارىنىڭ الىس-جاقىننان اكەلىنەتىندەردەن دامدىلىك, قۇنارلىق ساپاسى جاعىنان ارتىپ تۇسپەسە, ەش كەمدىگى جوعىن بىلەمىز. باعاسى بوسا-بولماسىن ءتيىمدى. اڭسار اۋسا نە امال بار, سورەلەردىڭ قۋىستاۋ بولىكتەرىنەن, ەلەۋسىزدەۋ بۇرىشتاردان ازەر تاۋىپ الىپ جۇرەمىز, دەيدى تۇتىنۋشىلار. قازاقستاندىق ونىمدەردى كورنەكتى ورىنداردا جارقىراتىپ ساتۋ بىلاي تۇرسىن, جۇرت اياعى استە باسىلمايتىن دۇكەندەردە ونىڭ بار-جوعى دا بەلگىسىز كورىندى. شاحتينسكىدە جاسالاتىن كىر جۋ قۇرالدارى دا كوزگە تۇسپەدى. كەلۋشىلەر ادەتتەگىدەي شەتەلدىك تۇرلەرىنە ۇمتىلادى ەكەن. قاراعاندىنىڭ وزىندەگى مارگارين زاۋىتىنىڭ مايونەز ونىمدەرى از بولماسا دا رەسەيدىڭ «ريچچوسى» الىستان قىزىقتىرماي قويمايتىنداي تۇستاردان كوز تارتسا, قىزىلوردانىڭ جۇقا جاپسىرماعا كەپتەلگەن كۇرىشى ءنوۆوسىبىردىڭ ادەمى قاپتالعان ونىمىنە قاراعاندا ەلەرلىكتەي ەمەستىگى كوڭىل ءتۇسىردى. مولىنان قويىلعان جەرگىلىكتى ەت پەن ءسۇت, ۇن مەن نان ونىمدەرىنىڭ عانا وتىمدىلىگى بايقالدى. وبلىسىمىزدا كەيىنگى كەزدە كورشى ەلدەردەن جەتكىزىلەتىن ازىق-ت ۇلىك ۇلعايىپ وتىر. ورامىنا, قاپتاماسىنا قاراساڭ, ءبارى ادەمى-اق. سوندىقتان, تۇتىنۋشىلار قىزىعۋشىلىعىن تۋدىراتىن ءتارىزدى. ءبىزدىڭ وندىرۋشىلەر دە وسى جاعىن ۇيلەستىرۋى كەرەك. جالپى العاندا, تاۋارلاردىڭ قاي ءتۇرى بولماسىن, ماسەلەن, قۇرىلىس ماتەريالدارى, جىلىتۋ جابدىقتارى, تىگىن بۇيىمدارى جەتكىلىكسىز ەمەس. سولار ءار دۇكەندە ارناۋلى بولىمدەرگە ىرىكتەلىپ قويىلىپ ساتىلۋى ۇيىمداستىرىلسا, نازار اۋدارتپاي قويماس ەدى, دەگەن تۇتىنۋشىلار پىكىرى ساۋدا ورىندارىن ويلانتۋعا ءتيىس.
ايقىن نەسىپباي, «ەگەمەن قازاقستان».
قاراعاندى.
