بىرنەشە كۇن بۇرىن كونە شاھاردىڭ جاڭا جولدارىمەن قاتىنايتىن 15 اۆتوبۋس پايدالانۋعا بەرىلدى. جاڭا جول دەپ بەكەر ايتىپ وتىرعان جوقپىز. ءبىر جىلدىڭ ىشىندە وبلىس ورتالىعىنداعى ونداعان كوشەگە جاڭا اسفالت توسەلدى. بۇل – ۇلكەن جۇمىس. اسىرەسە جاڭادان بوي كوتەرگەن « ۇلى دالا» شاعىن اۋدانى مەن تالاي جىلدان بەرى تۇرعىنداردىڭ باس اۋرۋىنا اينالعان «بۋرىل» تۇرعىن الابىنداعى ءبىراز كوشەنىڭ جولى جوندەلگەنى كوڭىل قۋانتتى.
سۋ جاڭا قوعامدىق كولىكتەردى تابىستاۋ راسىمىنە تاراز قالاسىنىڭ اكىمى باقىتجان ورىنبەكوۆ ارنايى قاتىستى. قالاىشىلىك باعىتتار بويىنشا قاتىنايتىن اۆتوبۋستار «اۋليەاتاترانسپاسس» جشس جۇرگىزۋشىلەرىنە بۇيىرعانىن ايتا كەتكەن ءجون. ەسكى كولىكتى جاڭاعا اۋىستىرعان ولار تۇرعىنداردى تاسىمالداۋ ءۇشىن زاماناۋي اۆتوبۋستىڭ بۇيىرعانىنا قۋانىشتى ەكەنىن جەتكىزدى.
«اۋليەاتاترانسپاسس» جشس باسشىسى راشيد ءپىرمانوۆتىڭ ايتۋىنشا, تاراز قالاسىنا جەتكىزىلگەن «Isuzu» ماركالى قوعامدىق كولىكتەر اۋىلى ارالاس, قويى قورالاس جاتقان وزبەكستان ەلىندە جاسالعان ەكەن. اۆتوبۋستىڭ ۇزىندىعى 9 مەتردى قۇراسا, سىيىمدىلىعى – 70 ادام. سونداي-اق قوعامدىق كولىكتەردە پاندۋس, بىرنەشە بەينەكامەرا بار. ءبىر سوزبەن ايتقاندا, تۇرعىندار ءۇشىن بارلىق جاعداي قاراستىرىلعان.
رەسمي دەرەككە جۇگىنسەك, تاراز قالاسىنا جەتكىزىلگەن اۆتوبۋستاردىڭ 10-ى №29 باعىتتا قاتىنايتىن ەسكى قوعامدىق كولىكتەردى الماستىرسا, قالعان بەسەۋى №12 باعىتتا قاتىنايدى. بۇل ءوز كەزەگىندە №12 باعىتتاعى اۆتوبۋستاردىڭ ءجۇرۋ جيىلىگىن ارتتىرادى. تۇرعىندار قوعامدىق كولىكتى بۇرىنعىداي سارىلا كۇتىپ تۇرمايدى. قوسىمشا بەرىلگەن قوعامدىق كولىكتەر ارقىلى №12 باعىتتاعى اۆتوبۋستاردىڭ ءجۇرۋ ينتەرۆالى 12 مينۋتتان 8 مينۋتقا دەيىن قىسقارادى.
شاھار تىزگىنىن قولعا العالى بەرى باقىتجان ورىنبەكوۆ وبلىس ورتالىعىنداعى جولداردى جونگە كەلتىرۋمەن قاتار, قوعامدىق كولىكتەردى جاڭالاۋعا باسىمدىق بەرىپ وتىر. قالا اكىمىنىڭ ايتۋىنشا, بۇل باعىتتاعى جۇمىستار ىلكى ساتكە دە توقتاماق ەمەس.
ب.ورىنبەكوۆ جولاۋشىلار تاسىمالىن جانداندىرۋ, تۇرعىنداردى قوعامدىق كولىكپەن تولىقتاي قامتۋ جۇمىستارى قاي كەزدە دە ماڭىزدىلىعىن جويمايتىنىنا بەك سەنىمدى. ويتكەنى ءدال وسى ماسەلەنى رەتىمەن شەشۋ ءۇشىن 2023–2025 جىلدارعا ارنالعان ارنايى ءىس-شارالار جوسپارى بار. سول جوسپارعا سايكەس قالاعا ءار جىل سايىن 70 جاڭا قوعامدىق كولىك جەتكىزىلەدى. ايتكەنمەن, وسى جىلدىڭ العاشقى جارتىسىنىڭ وزىندە وبلىس ورتالىعىنا 80 جاڭا اۆتوبۋس كەلگەنىن ەسكەرسەك, جوسپار ارتىعىمەن ورىندالدى دەۋگە تولىق نەگىز بار.
قالالىق اكىمدىكتىڭ ءباسپاوز قىزمەتى كەلتىرگەن دەرەككە جۇگىنسەك, بىرقاتار باعىتتى جاڭا اۆتوبۋستارمەن قامتۋ جۇمىسى جىل سوڭىنا دەيىن جالعاسا بەرمەك. ناقتىراق ايتساق, وسى جىلدىڭ اياعىنا دەيىن تاعى دا 50 اۆتوبۋس اكەلۋ جوسپارلانعان.
تاراز
