كەشە پرەمەر-ءمينيستردىڭ ءبىرىنشى ورىنباسارى باقىتجان ساعىنتاەۆ ۇلتتىق قوردان بولىنگەن قارجىلاردى يگەرۋ ماسەلەسى بويىنشا كەڭەس وتكىزدى, دەپ حابارلادى پرەمەر-ءمينيستردىڭ ءباسپاسوز قىزمەتى.
مەملەكەت باسشىسىنىڭ تاپسىرماسى بويىنشا, قازاقستاننىڭ دامۋ بانكى (قدب) مەن «دامۋ» كاسىپكەرلىكتى دامىتۋ قورىنا ۇلتتىق قوردان وڭدەۋ ونەركاسىبى سالاسىندا جۇمىس ىستەيتىن كاسىپكەرلىك سۋبەكتىلەرىنە قولداۋ كورسەتۋ ءۇشىن قارجى ءبولىندى. قدب جەلىسى بويىنشا ينۆەستيتسيالىق جوبالاردى ۇزاق مەرزىمدى جەڭىلدىكتى نەسيەلەۋ كەلەسى شارتتاردا جۇزەگە اسىرىلادى: نومينالدى سىياقى ستاۆكاسى – جىلدىق 6 پايىزدان ارتىق ەمەس, نەسيەلەۋ مەرزىمى – 10 جىلعا دەيىن, نەگىزگى بورىشتى وتەۋ بويىنشا جەڭىلدىكتى مەرزىم – 24 اي, ءبىر زاەمشىنى قارجىلاندىرۋ شەگى – 200 ملن. تەڭگەدەن 5 ملرد. تەڭگەگە دەيىن. 2014 جىلدىڭ جەلتوقسانىندا قدب 50 ملرد. تەڭگە مولشەرىندە ءبىرىنشى ترانشتى ءبولدى, ۇستىمىزدەگى جىلدىڭ ناۋرىزىندا بانك تاعى دا 50 ملرد. تەڭگە الدى. 4 ماۋسىمعا قاراستى جالپى سوماسى 46 ملرد. 442,3 ملن. تەڭگە بولاتىن ءىرى كاسىپكەرلىك سۋبەكتىلەرىنىڭ 39 جوباسىنا قولداۋ كورسەتىلدى. شاعىن جانە ورتا كاسىپكەرلىك سۋبەكتىلەرى «دامۋ» قورى ارقىلى كەلەسى شارتتار بويىنشا جەڭىلدىكتى نەسيەلەۋگە يە بولادى: نومينالدى سىياقى ستاۆكاسى – جىلدىق 6 پايىزدان ارتىق ەمەس, نەسيەلىك جەلى بويىنشا قولجەتىمدىلىك مەرزىمى – ءبىر جىلعا دەيىن, ءبىر زاەمشىعا شەكتەۋدىڭ ەڭ جوعارعى شەگى – 1 850 ملن.تەڭگە. وتكەن جىلى قورعا بولىنگەن 50 ملرد. تەڭگە مەن ناۋرىز ايىندا بولىنگەن 50 ملرد. تەڭگەگە وڭدەۋ ونەركاسىبى مەن قىزمەت كورسەتۋ سالاسىنداعى شوب سۋبەكتىلەرىنىڭ جالپى سوماسى 80 750 ملن. تەڭگە بولاتىن 425 جوباسى قولداۋ تاپتى. كەڭەس قورىتىندىسى بويىنشا «بايتەرەك» ۇلتتىق باسقارۋشى حولدينگىنە, «دامۋ» قورىنا جانە قدب-عا بانكتەرمەن بىرلەسە وتىرىپ, ۇلتتىق قور قارجىلارىن يگەرۋ بويىنشا جۇمىستاردىڭ بەلسەندىلىگىن ارتتىرۋ تاپسىرىلدى.
