سوناۋ 1998 جىلى ىرگەسى قالانعان انسامبل ەلدىگىمىزدى اسپاپ تىلىندە ايگىلەپ, رۋحىمىزدى بيىكتەتەر ۇلتتىق مۋزىكاسىمەن دارالانىپ كەلەدى. ءانسامبلدىڭ نەگىزى ەجەلگى جانە زاماناۋي اسپاپتاردان قۇرالعان. اتاپ ايتساق, قۇرامىندا شەرتەر, دومبىرا, دومبىرا-كونتراباس, ساز-سىرناي, سىبىزعى, سىرناي, جەتىگەن, ادىرنا, دابىل, داۋىلپاز, ساز قوڭىراۋ, اساتاياق, تۇياقتاس, پريما-قوبىز, قوبىز, شاڭ قوبىز سىندى اسپاپتار بار. ۇجىمنىڭ رەپەرتۋارىنا قازاق حالىقتىق, حالىقتىق-كاسىبي جانە اكادەميالىق مۋزىكالار كىرگەن.
«نەگىزگى ماقساتىمىز – قازاقتىڭ ۇلتتىق ونەرىن, ونىڭ ىشىندە قاسيەتتى كۇي, حالىق جانە حالىق كومپوزيتورلار اندەرىن ناسيحاتتاۋ. سونداي-اق وسكەلەڭ جاستاردى, بولاشاق ۇرپاقتى بابا مۇراسىمەن, ءبىرى جاڭارىپ, ءبىرى ۇمىتىلا باستاعان كونە اسپاپتارمەن تانىستىرۋ – باستى مۇراتىمىز. ونەرپازدارىمىز 21 ۇلتتىق اسپاپتا ويناپ, ءان ورىندايدى. جەتىگەن, ساز سىرناي (ۋىلدەك, تاستاۋىق, ۇسكىرىك, قۇسسايراۋىق, شىڭىراۋ), قوبىز (نار قوبىز), سىبىزعى, ادىرنا, دومبىرا (شىڭكىلدەك, ءۇش شەكتى دومبىرا, باربىت), ءمۇيىز سىرناي, كەرنەي, تاعى باسقا اسپاپتاردى قولدانىپ, بۇلاردى زاماناۋي ىرعاقتارمەن ۇشتاستىرىپ, كونە سارىنداردى بۇزباي, جاڭا ارانجيروۆكالارمەن, جاڭا شىعارمالارمەن رەپەرتۋاردى تولىقتىرىپ وتىرامىز. سولايشا جاڭا بۋىن كومپوزيتورلاردى دا دارىپتەيمىز», دەيدى ءانسامبلدىڭ كوركەمدىك جەتەكشىسى, مادەنيەت سالاسىنىڭ ۇزدىگى توعجان جاحين.
انسامبل گاسترولدىك ساپارمەن رەسەي, تۇرىكمەنستان, ۇلىبريتانيا, بەلگيا, نيدەرلاند, فرانتسيا, قىتاي, تۇركيا سىندى 12 ەلدە ونەر كورسەتىپ, كوپتەگەن رەسپۋبليكالىق جانە حالىقارالىق بايقاۋلاردىڭ لاۋرەاتى اتانىپ ۇلگەرگەن. ونىڭ ىشىندە فرانتسيانىڭ ديجون قالاسىندا حالىقارالىق شىعارماشىلىق فەستيۆالدان التىن مەدال يەلەنسە, تمد-عا قاتىسۋشى مەملەكەتتەردىڭ حالىقارالىق ۇلتتىق ونەر فەستيۆالى, بەيجىڭدە وتكەن الەم حالىقتارىنىڭ حالىقارالىق بي جانە فولكلورلىق مۋزىكا فەستيۆالىندە, گەرمانياداعى حالىقارالىق فولكلور فەستيۆالىندە ونەر كورسەتىپ, ەلىمىزدىڭ داڭقىن اسىرعان.
«الداعى ۋاقىتتا كوشپەندىلەر ويىندارىنا قاتىسىپ, قىركۇيەك ايىندا «تۇركى الەمى» اتتى جاڭا باعدارلاما قويماقپىز. سونىمەن بىرگە قازان ايىندا الماتى قالاسىنا «تۇعىرلى ەل» باعدارلاماسىمەن گاسترولدىك ساپارعا شىعىپ, قاراشا ايىندا «كوڭىل ىرعاعى» اتتى ۇرلەمەلى وركەسترمەن كونتسەرت ۇيىمداستىرۋ جوسپاردا بار. جەلتوقسان ايىندا «دالا اڭىزى» اتتى بالەتتىڭ تۇساۋكەسەرىن وتكىزىپ, «قوڭىر ءۇندى امانات» اتتى كۇي كەشىن جاساۋ الداعى كۇننىڭ ەنشىسىنە كىرىپ وتىر», دەيدى توعجان سەرىك ۇلى.
ايتا كەتەيىك, 2022 جىلى توعجان جاحين ۇلتتىق فولكلورلىق اسپاپتاردى ناسيحاتتايتىن بالالار مەن جاسوسپىرىمدەرگە ارنالعان «ۇلت اسپاپتارى الەمىنە ساياحات» ينتەراكتيۆتى جوباسىن جاساعان بولاتىن. قازىرگى ۋاقىتتا جوبا ەلوردا مەكتەپتەرىندە جۇزەگە اسىرىلىپ, جاس بۋىندى ءتول ونەرگە باۋلۋعا ۇلكەن ىقپال ەتىپ وتىر. سونداي-اق قازاق حالىق شىعارماشىلىعىن بەلسەندى ناسيحاتتاپ جانە جوعارى ورىنداۋشىلىق مادەنيەتى ءۇشىن انسامبل «استانالىق مەتسەناتتار كلۋبى» كورپوراتيۆتىك قورىنىڭ «كەرەمەت» سىيلىعىمەن ماراپاتتالعان.
