ەلباسى الەمدىك جانە ءداستۇرلى دىندەر ليدەرلەرى V سەزىنىڭ جالپى وتىرىسىنا قاتىستى

استانا. 11 ماۋسىم. مەملەكەت باسشىسى الەمدىك جانە ءداستۇرلى دىندەر ليدەرلەرى V سەزىنىڭ جالپى وتىرىسىنا قاتىستى. بۇل تۋرالى akorda.kz حابارلادى. قازاقستان پرەزيدەنتى وتىرىسقا يوردانيا كورولى ءىى ابداللانىڭ قاتىسىپ وتىرعانىنا, ول باستاماشىلىق ەتكەن «اممان جولداۋى» مەن الەمدىك جانە ءداستۇرلى دىندەر ليدەرلەرى سەزىنىڭ ۇندەستىگىنە, بۇل باستامالاردىڭ وركەنيەتتەر مەن كونفەسسيالار اراسىنداعى سىندارلى ديالوگتى دامىتۋ ءۇشىن قاجەتتى تۇعىرناما قىزمەتىن اتقاراتىنىنا نازار اۋداردى. نۇرسۇلتان نازارباەۆ جۇمىسى اياقتالۋعا تاياعان سەزدىڭ دەلەگاتتارى قوناقجاي قازاق جەرىنە تاعى دا جينالۋ ارقىلى باستى ماقساتقا قول جەتكىزگەنىن اتاپ ءوتتى. «دىندەر, حالىقتار جانە مەملەكەتتەر اراسىنداعى تاتۋلىق پەن كەلىسىمنىڭ اسا ماڭىزدى ەكەندىگىن ءتۇسىنۋ ءۇشىن ءبىر-بىرىمىزگە تاعى ءبىر قادام جاقىنداي تۇستىك. دىندەردىڭ ءوزارا ىقپالداستىعى مەن ولاردىڭ جاھاندىق دامۋ جولىنداعى ءرولى تۋرالى اشىق سۇحبات جالعاسىن تاپتى. الەمنىڭ تۇراقتىلىعى مەن قاۋىپسىزدىگى جولىنداعى ىنتىماقتاستىققا دەگەن ورتاق مۇددەلەستىك بار ەكەنى اڭعارىلدى. ءومىردىڭ وزەكتى ماسەلەلەرى جونىندە سەزگە قاتىسۋشىلاردىڭ بارلىعىنىڭ ورتاق نەمەسە ۇقساس ۇستانىمدارى كورىنىس تاپقان دەكلاراتسيا ماقۇلدانىپ, قابىلداندى. قازاقستاننىڭ ەلورداسىندا ەكى كۇن بويى ءتۇرلى تىلدە, ءتۇرلى ءداستۇر بويىنشا بەيبىتشىلىك, كەلىسىم, ادىلەتتىلىك, كەشىرىمدىلىك جانە جاقىنىڭا دەگەن سۇيىسپەنشىلىك تۋرالى ورتاق تىلەك-دۇعا جاسالدى», – دەدى مەملەكەت باسشىسى. قازاقستان پرەزيدەنتى سەزگە قاتىسۋشىلاردىڭ بارىنە جەمىستى جۇمىستارى ءۇشىن العىس ايتتى. «قۇدايعا جاساعان قۇلشىلىقتارى ارقىلى قازاقستاننىڭ ءوسىپ-وركەندەۋىنە نيەتتەستىك ءبىلدىرىپ, ەلىمىزگە باق-بەرەكە تىلەگەنى ءۇشىن ءتۇرلى ءدىننىڭ بارشا قىزمەتشىلەرىنە العىس ايتامىن. سەزدىڭ بارلىق زايىرلى قوناقتارىنا – ساياساتكەرلەرگە, قوعام قايراتكەرلەرىنە, ساراپشىلار مەن جۋرناليستەرگە ءىس-شارانى تابىستى وتكىزۋگە, ءبىزدىڭ يدەيالارىمىزدى ىلگەرىلەتۋگە قوسقان باعا جەتپەس ۇلەستەرى ءۇشىن شىن جۇرەكتەن ريزاشىلىق بىلدىرەمىن. دۇنيەدە سەنىم مەن اقىلدى ۇشتاستىراتىن اقيقاتتان ارتىق ەشتەڭە جوق. الەمدىك جانە ءداستۇرلى دىندەر ليدەرلەرىنىڭ سەزدەرى رۋحاني تۇلعالار مەن ساياساتكەرلەردىڭ سۇحباتى فورماتىندا ءوتىپ كەلەدى. وسىلايشا ءبىز ادامدار اراسىنداعى تاتۋلىق پەن كەلىسىم ماسەلەلەرىنە قاتىستى ءىس-قيمىلدىڭ ىزگى سيپاتى ار-ۇجدان مەن رۋحاني قۋات ارقىلى ارتا تۇسكەنىن قالايمىز. بارشا قاتىسۋشىلاردى سەزدىڭ يگى ءارى بەيبىتسۇيگىش احۋالىن ءوز پىكىرلەستەرىنە, سەرىكتەستەرىنە جەتكىزۋگە شاقىرامىن», – دەدى نۇرسۇلتان نازارباەۆ. مەملەكەت باسشىسى الەمدىك جانە ءداستۇرلى دىندەر ليدەرلەرىنىڭ V سەزى جاھاندىق ديالوگتىڭ وزەكتىلىگىن, ونىڭ قاجەتتىلىگى ارتا تۇسكەنىن تاعى دا ايقىن كورسەتىپ بەرگەنىن ايتتى. «ءسوز بەن ءتىل, ياعني, تىلدەسۋ مەن ديالوگ – ادام بالاسىنا, ادامزاتقا بەرىلگەن قۇدايدىڭ تەڭدەسسىز سىيى. ءبىزدىڭ پارىزىمىز – ونىڭ بىتىمگەرشىلىك جانە جاسامپاز قۋاتىن تولىعىمەن پايدالانۋ. بۇگىنگى بەسىنشى سەزدە جالپىعا ورتاق تاتۋلىق پەن مەيىرىم, ادىلەتتىلىك پەن رۋحاني ۇيلەسىم داۋىرىنە قاراي تاعى ءبىر قادام جاسالدى. ءبىز جاھاندى كۇمان-كۇدىك جايلاعان كەزەڭدە تەك ءبىر-بىرىمىزبەن تىلدەسۋ ارقىلى عانا ءۇمىتتى, بولاشاققا دەگەن سەنىمدى وياتۋعا بولاتىنىن دالەلدەدىك», – دەدى قازاقستان پرەزيدەنتى. بۇدان بولەك, نۇرسۇلتان نازارباەۆ سەزدىڭ قىزمەتىنە قاتىستى ۇسىنىستارىن ايتتى. «قازىردىڭ وزىندە سەزىمىزدىڭ باي تاريحى قالىپتاسىپ ۇلگەردى. ءبىز بەتپە-بەت ديالوگ ورناتۋ جونىندە ەلەۋلى تاجىريبە جيناقتادىق, سۇحباتتاسۋ مەن ءوزارا ءتۇسىنىسۋ داستۇرلەرىن ورنىقتىردىق. دىندەر مەن وركەنيەتتەردىڭ وزگە دە ءوزارا ىقپالداسۋ ۇيىمدارىمەن بايلانىس جولعا قويىلىپ كەلەدى. سوندىقتان مەن استاناداعى وسىناۋ عيماراتتا بەيبىتشىلىك جانە كەلىسىم مۇراجايىن اشۋدى ۇسىنامىن. سەزىمىزدىڭ تاريحىنا دەگەن مۇنداي يگى كوزقاراس, ادامزاتتىڭ دامۋ پروبلەمالارى جونىندەگى بىرلەسكەن شەشىمدەر تاجىريبەسىن جيناقتاپ, قورىتۋ دىندەر مەن حالىقتاردىڭ تاتۋلىعى مەن ءوزارا تۇسىنىستىگىن نىعايتۋ ءۇشىن اسا ماڭىزدى بولماق. بەيبىتشىلىك جانە كەلىسىم مۇراجايى سونداي-اق, دىندەر مەن مادەنيەتتەر ديالوگى تاريحىن زەرتتەيتىن سەزد جانىنداعى عىلىمي مەكەمە بولادى», – دەدى مەملەكەت باسشىسى. قازاقستان پرەزيدەنتى دىندەر مەن مادەنيەتتەر ديالوگىن ىلگەرىلەتۋشى تۇلعالاردى ماراپاتتاۋدىڭ دا ماڭىزدىلىعىنا توقتالدى. وسى ورايدا مەملەكەت باسشىسى «رۋحاني تاتۋلىق پەن كەلىسىمدى دامىتۋعا جانە نىعايتۋعا قوسقان ۇلەسى ءۇشىن» اتتى سىيلىق تاعايىنداۋدى ۇسىنىپ, ونى ءدىندارلار كەڭەسىنىڭ شەشىمى بويىنشا بەرۋگە, سەزدىڭ جالپى وتىرىسىندا تاپسىرۋعا بولاتىنىن ايتتى. نۇرسۇلتان نازارباەۆ سەزدىڭ ەكى كۇندىك جۇمىسى الەمگە دامۋدىڭ ەڭ قولايسىز ستسەناريلەرىنە جول بەرمەۋگە بولادى دەگەن ءۇمىت سىيلاعانىنا, ادامزات دانالىعى مەن جاۋاپكەرشىلىگىنە دەگەن سەنىم ۇيالاتقانىنا نازار اۋداردى. وتىرىس بارىسىندا يوردانيا كورولى ءىى ابداللا, بۇۇ وركەنيەتتەرى اليانسىنىڭ وكىلى ن.ءال-ناسەر, مينسك جانە زاسلاۆسك ءميتروپوليتى, بۇكىل بەلارۋس ەكزارح پاتريارحى پاۆەل, ەقىۇ باس ديرەكتورى ل.زانەر, بەدفورد ەپيسكوپى, اعىلشىن شىركەۋىنىڭ وكىلى ر.اتكينسون, «دجيندجيا حونچە» سيونيستىك حرامدار قاۋىمداستىعىنىڭ باسقارۋشى ديرەكتورى ت.تەراي, يسەسكو باس ديرەكتورى ا.ات-تۋەيدجري, دۇنيەجۇزىلىك ليۋتەران فەدەراتسياسىنىڭ پرەزيدەنتى م.يۋنان ءسوز سويلەدى. وتىرىس قورىتىندىسى بويىنشا الەمدىك جانە ءداستۇرلى دىندەر ليدەرلەرىنىڭ V سەزىنىڭ دەكلاراتسياسى جاريالاندى. ەلامان قوڭىر. دەرەك, سۋرەت: akorda.kz.