تۇركىستان قالالىق پروكۋراتۋراسى اليمەنتكە قاتىستى اكتسيا وتكىزدى

استانا. 11 ماۋسىم. وڭتۇستىك قازاقستان وبلىسى, تۇركىستان قالالىق پروكۋراتۋراسى «بالاڭدى ەسىڭە ال – اليمەنت تولە!» اتتى اكتسياسىن وتكىزدى. بۇل تۋرالى وبلىستىق پروكۋراتۋرانىڭ ءباسپاسوز قىزمەتى حابارلادى. اۋماقتىق سوت ورىنداۋشىلار ءبولىمى-فيليالىندا 2015 جىلدىڭ 5 ايىندا اليمەنت ءوندىرۋ تۋرالى جالپى 1 687 اتقارۋ قۇجاتتارى تىركەلدى. ونىڭ ىشىندە 48 قۇجاتقا قاتىستى شەشىم شىقسا, 1 639-ى ورىندالۋ ۇستىندە. قالا پروكۋراتۋراسىمەن اۋماقتىق سوت ورىنداۋشىلار بولىمىندە 6 تەكسەرىس جۇرگىزىلىپ, ناتيجەسىمەن 6 زاڭ بۇزۋشىلىقتاردى جويۋ تۋرالى ۇسىنىس ەنگىزىلدى. سونداي-اق, 1 تارتىپتىك ءىس ءوندىرىسى قوزعالىپ, 1 سوت ورىنداۋشىسى تارتىپتىك جاۋاپكەرشىلىككە تارتىلدى. سونىمەن قاتار, تۇركىستان قالالىق پروكۋراتۋراسى ۇيىمداستىرعان «بالاڭدى ەسىڭە ال – اليمەنت تولە!» شاراسى اياسىندا ارنايى بيلبوردتارعا اليمەنت ءوندىرۋ تۋرالى باننەرلەر ءىلىندى. ودان بولەك, اليمەنت جونىندە بەينەروليك ءتۇسىرىلىپ تەلەارنادان كۇنىنە 5 رەت كورسەتىلۋدە. تۇركىستان قالاسىندا ورنالاسقان «قۋانىش» ورتالىق بازارىنداعى حابارلاندىرۋ تاقتالارىنا سوت ۇيعارىمىمەن اليمەنت تولەۋدەن جالتارىپ جۇرگەن بورىشكەرلەردىڭ سۋرەتتەرى ءىلىنىپ, ولاردى ىزدەۋ شارالارى جۇرگىزىلۋدە. تۇركىستان اۋماقتىق سوت ورىنداۋشىلارىمەن 86 بورىشكەرگە قازاقستان رەسپۋبليكاسىنان شىعۋىنا ۋاقىتشا شەكتەۋلەر قويىلدى. سونداي-اق, قالا پروكۋراتۋراسى تۇركىستان اۋماقتىق سوت ورىنداۋشىلار بولىمىنە تۇركىستان قالالىق سوتىنا زاڭنىڭ 34-بابى 1-ءبولىمىنىڭ 3-تارماعىنا سايكەس اليمەنتتەر ءوندىرىپ الۋ تۋرالى اتقارۋشىلىق قۇجاتتار بويىنشا بەرەشەك جينالىپ قالعان جاعدايدا بورىشكەرگە ليتسەنزيالار, رۇقساتتار جانە ارنايى قۇقىقتار بەرۋگە ۋاقىتشا تىيىم سالۋ تۋرالى ۇسىنىس جولدانىپ, تۇركىستان قالالىق سوتىنىڭ ۇيعارىمىمەن قالالىق سالىق باسقارماسىنا, تۇركىستان قالالىق ادىلەت باسقارماسىنا, تۇركىستان اۋدانارالىق ەمتيحان قابىلداۋ جانە تىركەۋ جۇمىسى بولىمىنە جانە باسقا دا ءتيىستى مەكەمەلەرگە جولداندى. اليمەنت تولەۋدەن جالتارىپ جۇرگەن بورىشكەرگە قاتىستى قالا پروكۋراتۋراسىنىڭ باستاماسىمەن بەينەروليك ءتۇسىرىلىپ, جەرگىلىكتى تەلەارنادان كورسەتىلدى. بۇدان بولەك, اليمەنت ءوندىرۋ ماقساتىندا رەيدتتىك شارالار جۇرگىزىلىپ, ناتيجەسىندە 2 بورىشكەر اكىمشىلىك قۇقىق بۇزۋشىلىق تۋرالى كودەكستىڭ 669-بابى بويىنشا اكىمشىلىك جاۋاپكەرشىلىككە تارتىلدى. تالعات رايىمبەك. دەرەك: وڭتۇستىك قازاقستان وبلىستىق پروكۋراتۋرانىڭ ءباسپاسوز قىزمەتى. سۋرەت: oko.prokuror.kz.