شىعىس وڭىرىنە «شينحان بانك قازاقستان» جەتەكشىسى كەلدى

وسكەمەن. 11 ماۋسىم. شىعىس قازاقستان وبلىسىنىڭ اكىمى دانيال احمەتوۆ «شينحان بانك قازاقستان» اكتسيونەرلىك قوعامى باسقارما توراعاسى چوي مەنگ كيۋمەن كەزدەستى. بۇل تۋرالى egemen.kz ءتىلشىسى حابارلادى. وبلىس اكىمدىگى ينۆەستورلارعا نەگىزىنەن ءوڭىردىڭ ءىرى ەكى قالاسىنا ارنالعان بىرقاتار ينۆەستيتسيالىق جانە كونتسەسسيالىق جوبالاردى ۇسىنىپ وتىر. ونىڭ ىشىندە وسكەمەن مەن سەمەي قالالارىندا ينۆەستيتسيا تارتۋ ارقىلى بالاباقشا, دەنساۋلىق ساقتاۋ مەكەمەلەرى, مۋنيتسيپالدى اۆتوپارك قۇرۋ جانە كوشەلەردى ەلەكتر ەنەرگياسىن ۇنەمدەيتىن شامدارمەن جاڭالاۋ سىندى جوبالار بار. سونداي-اق, كۇرشىم اۋدانىنداعى بۇقتىرما سۋ قويماسىمەن وتەتىن كوپىر وتكەلىنىڭ قۇرىلىسى دا ءسوز بولدى. ءوڭىر باسشىسى قازاقستان رەسپۋبليكاسىنىڭ «ينۆەستيتسيالار تۋرالى» زاڭىنا سايكەس ينۆەستيتسيالىق باسىم جوبالاردىڭ تيىمدىلىكتەرى جونىندە اڭگىمەلەدى. «شينحان بانك قازاقستان» اق – قارجى قىزمەتى نارىعىندا ۇسىنىلاتىن بانك وپەراتسيالارىنىڭ بارلىق تۇرلەرىن جۇزەگە اسىراتىن امبەباپ بانكتەردىڭ ءبىرى. ونىڭ اكتسيونەرى – الەمدەگى ەڭ ءىرى بانكتەردىڭ ساناتىنا ەنەتىن كورەيا رەسپۋبليكاسىنداعى Shinhan Bank ەكەنىن دە ايتا كەتكەن ءلازىم. دۋمان اناش. دەرەك: ەgemen.kz. سۋرەت: شىعىس قازاقستان وبلىسى اكىمدىگىنىڭ ءباسپاسوز قىزمەتى.