ورالدا 6 جىل جالعان ديپلوممەن جۇمىس ىستەگەن مامان ۇستالدى

ورال. 11 ماۋسىم. باتىس قازاقستان وبلىسىنىڭ ورتالىعى – ورال قالاسىنداعى سۋ سپورتى بويىنشا بالالار مەن جاسوسپىرىمدەر سپورت مەكتەبى ديرەكتورىنىڭ ورىنباسارى رايگۇل ەلەسوۆانىڭ قازاق سپورت جانە تۋريزم اكادەمياسىنىڭ بىتىرگەنى جونىندەگى ديپلومى جالعان بولىپ شىقتى. بۇل تۋرالى egemen.kz حابارلادى. وسى دەرەككە بايلانىستى ورال قالالىق ىشكى ىستەر باسقارماسى ءتيىستى تەرگەۋ جۇرگىزۋدە. باتىس قازاقستان وبلىستىق دەنە تاربيەسى جانە سپورت باسقارماسىنىڭ باستىعى ازامات بەكەت ونىڭ جالعان ديپلوممەن قىزمەتكە بۇدان 6 جىل بۇرىن الىنعانىن ايتتى. ياعني, ازامات بەكەت باسقارماعا باسشى بولىپ كەلگەن كەزگە دەيىن قابىلدانعان. الايدا ول رايگۇل ەلەسوۆانىڭ جالعان ديپلوممەن جالاقى الىپ جۇرگەنىنە دەر كەزىندە باقىلاۋ جاساي الماعانىنا وكىنىشىن بىلدىرۋدە. سۋ سپورتى بويىنشا بالالار مەن جاسوسپىرىمدەر مەكتەبىندە بۇدان باسقا دا زاڭسىزدىقتار مەن كەلەڭسىزدىكتەر كەزدەسكەن. ونى وسى مەكتەپتىڭ وقۋشىلارى عانا ەمەس وزگە تۇلعالار دا پايدالانىپ كەلگەن. باسسەيندى ءتيىستى مەديتسينالىق قۇجاتى جوق ادامدار جەكە مۇددەلەرى ءۇشىن جالعا الىپ وتىرعان. ەڭ سوراقىسى, سۋ باسسەينى وقۋ-ۇيرەنۋ ۋاقىتى كەزىندە جالعا الىنعان. الايدا بۇل دەرەكتى ازامات بەكەت جوققا شىعاردى. «باسسەيندەگى جولاقتاردى وزگە تۇلعالار تەك ساباقتان تىس كەزدە عانا پايدالاندى», – دەيدى ول. كورسەتىلگەن دەرەكتەر ويىنشا ورال قالالىق پروكۋراتۋراسى ونى قالپىنا كەلتىرۋ جونىندە نارازىلىق ەنگىزدى. تەمىر قۇسايىن. دەرەك: egemen.kz. سۋرەت: lady.ru.