مۋزەي ىشىندەگى جادىگەرلەردىڭ ءبىرى – قولادان جاسالعان ەر ادام ءمۇسىنى. ايرىقشا ستيلدە جاسالعان قۇندىلىق كوزگە وتتاي باسىلادى. ماماندار ونى بۋددا ءمۇسىنى دەپ تە ايتىپ جاتادى. دەرەككە جۇگىنسەك, جادىگەر 50 جىلدان استام ۋاقىت بۇرىن بۇرىنعى كوك بازار اۋماعىنان تابىلعان كورىنەدى.
«بىلىكتى مامانداردىڭ ايتۋىنشا, مۇسىندەگى ەر ادام موڭعول ناسىلدەس كورىنەدى. باجايلاپ قاراعان كىسى ونىڭ كوزى مەن مۇرنىن, اۋزى مەن قۇلاعىن شەبەرلەر بەدەرلەپ جاساعانىن بىردەن اڭعارادى. ۇستىندەگى شاپاننىڭ قۋىس جاعى زيگزاگ رەلەفىمەن جيەكتەلگەنىن بايقاۋ قيىن ەمەس. كەۋدە تۇسىنداعى ساقيناعا ۇقساس بەدەرلى القانى ماماندار ىقىلىم زاماننىڭ بەلگىلى ءبىر بەينەسى دەپ تە جاتادى.
قولادان قۇيىلىپ جاسالعان مۇسىنگە مۋزەيگە كەلۋشىلەر ۇزاق قاراپ جاتادى. ونىڭ بەلبەۋى, ۇستىندەگى كيىمى, القاسى, اياق كيىمىندەگى ەرەكشەلىكتەر تۋرالى سۇرايتىن ساۋاتتى ازاماتتار از ەمەس. ءبىر سوزبەن ايتقاندا, ەر ادام مۇسىنىنە قىزىعۋشىلار كوپ», دەيدى وبلىستىق تاريحي-ولكەتانۋ مۋزەيىنىڭ قىزمەتكەرى لاۋرا بايتۇرسىنوۆا.
مامان كەلتىرگەن دەرەككە جۇگىنسەك, قولادان جاسالعان ءمۇسىن 1972 جىلى تابىلعان كورىنەدى. سودان بەرى وبلىستىق-تاريحي ولكەتانۋ مۋزەيىندە ساقتاۋلى تۇر. ەلۋ جىل بۇرىن قولعا تۇسكەن ءمۇسىن ءالى كۇنگە دەيىن ايتارلىقتاي بۇلىنە قويماعان.
«قانداي شەبەردىڭ قولىنان شىقسا دا, ءمۇسىننىڭ وتە ساپالى جاسالعانىن بايقاۋ قيىن ەمەس. جارتى عاسىردان استام ۋاقىت بۇرىن تابىلسا دا ءالى كۇنگە دەيىن باستاپقى ساپاسى ساقتالعان. وسىعان قاراپ-اق ءمۇسىندى جاساعان شەبەردىڭ شىن مانىندە كاسىپقوي مامان ەكەنىن اڭعارۋعا بولادى», دەيدى ل.بايتۇرسىنوۆا.
تاراز
