جامبىل اۋدانىندا دا ىزدەنىسكە قۇمار ءبىلىم الۋشىلار از ەمەس. ولار ءتۇرلى يننوۆاتسيالىق جوبالار ازىرلەپ, جاڭاشىلدىققا جانى قۇمار ەكەنىن بايقاتتى. اسىرەسە يۋري گاگارين اتىنداعى مەكتەپ-ليتسەيىنىڭ وقۋشىلارى سۋ تاپشىلىعىنا قارسى كۇرەسكە بەلدى بەكەم بۋىپ كىرىسكەن سەكىلدى.
سەگىزىنشى سىنىپ وقۋشىلارى ءسابينا جارقىنبەك پەن مارالبەك اسەمبەكتى اۋىلداعى اعىن سۋدىڭ تاپشىلىعى ايتارلىقتاي الاڭداتقان كورىنەدى. ولار قۇرعاقشىلىق كەزىندە دە اۋىل شارۋاشىلىعىنىڭ وركەندەۋىنە سۇبەلى ۇلەس قوساتىن يننوۆاتسيالىق جوبا ويلاپ تاپتى. تىڭ جوبانى وندىرىسكە قوسقىسى كەلەتىن جاسوسپىرىمدەر قولعا العان ءىسى ناتيجە بەرسە, باسقا دا جوبالارعا دەن قويۋعا نيەتتى.
«سوڭعى جىلدارى ورىن العان قۇرعاقشىلىق كىمدى دە بولسىن, تولعاندىرماي قويمايدى. اعىن سۋدىڭ تاپشىلىعىمەن كۇرەسەتىن كەز كەلىپ جەتتى. ءبىز ويلاپ تاپقان جوبا سالانى قۇرعاقشىلىقتان قۇتقارۋعا باعىتتالعانىن ايتا كەتكەن ءلازىم. اۋىل شارۋاشىلىعىنا اڭسارى اۋعان فەرمەرلەر مەن كاسىپكەرلەر تاراپىنان قىزىعۋشىلىق تۋادى دەگەن ءۇمىتىمىز باسىم.
وسىمدىكتى گيدروپونيكالىق جولمەن ءوسىرۋ – ەلىمىزدىڭ سۋ تاپشىلىعى بايقالاتىن ايماقتارىنداعى فەرمەرلەر ءۇشىن ءتيىمدى شەشىم. وسىنى قاپەردەن شىعارماعان ءجون. سونداي-اق مالعا ارنالعان جەمشوپتى ازىرلەۋگە بار بولعانى جەتى كۇن جەتكىلىكتى ەكەنىن اتاپ وتكىمىز كەلەدى. بۇل ءوز كەزەگىندە مال بورداقىلاۋمەن اينالىساتىن كاسىپكەرلەر ءۇشىن ءتيىمدى ەكەنى ءسوزسىز. سوندىقتان دا ولار ءبىزدىڭ جوباعا قولداۋ بىلدىرەدى دەگەن ويدامىز», دەيدى جاڭاشىلدىققا بەت بۇرعان تالانتتى جاستار.
جاڭا جوبانى جەتىلدىرۋگە كىرىسكەن وقۋشىلاردىڭ جەتەكشىسى انار ايتەكوۆا يننوۆاتسيالىق جوبانىڭ كەلەشەگى بار ەكەنىنە سەنىمى زور. ونىڭ ايتۋىنشا, يننوۆاتسيالىق جوبا تەك قۇرعاقشىلىق ماسەلەسىن شەشىپ قويماي, ەكولوگيالىق ماسەلەلەردىڭ دە وڭ شەشىم تابۋىنا ىقپال ەتەدى ەكەن.
تەرەڭ ىزدەنىسكە كىرىسكەن وقۋشىلار وزدەرى قولعا العان جوبانىڭ تيىمدىلىگىن كەز كەلگەن جەردە دالەلدەۋگە ءازىر. ولار وزدەرى قولعا العان ءىستىڭ ناتيجەلى بولعانىن قالايدى.
جامبىل وبلىسى
