مۇنايلى وڭىردەگى ەلدى مەكەندەردى تاسقىن سۋدان قورعاۋعا قورعانىس مينيسترلىگى 30212, 5571, 6655, 82796 اسكەري بولىمدەرىنىڭ, توتەنشە جاعدايلار مينيسترلىگىنە قاراستى 52859 اسكەري ءبولىمى جانە ۇلتتىق ۇلاننىڭ ساربازدارى كومەككە جەتكەن. ماڭعىستاۋ, اقتوبە, تۇركىستان, الماتى, قىزىلوردا وبلىستىق, شىمكەنت قالالىق توتەنشە جاعدايلار دەپارتامەنتىنىڭ قىزمەتكەرلەرى دە جاردەمدەسكەن.
جىلىويلىقتار تولاسسىز تاسقىنمەن الىسىپ جاتقان تۇستا اسارعا ۇلەس قوسقانداردىڭ ءبىرى – تىنىشتىقباي تۇرتاەۆ. ول اسكەريلەرمەن بىرگە جەم بويىنداعى التى بوگەتتى جارىپ, سۋ اعىسىن كاسپي تەڭىزىنە قاراي باعىتتاعان. ءسويتىپ ءتىلسىز جاۋدىڭ قارقىنىن باسەڭدەتكەن. بۇگىندە بۇل ەڭبەگى ەلەنىپ, «ەل قورعانى» مەدالىمەن ماراپاتتالدى.
– اماناتتى ارقالاپ, جەرىم دەپ جەگىلىپ, ەلىم دەپ ەمىرەنىپ ءوتۋ – وتاننىڭ ۇلاندارىنا ارتقان ۇلى مىندەتى. مىنە, وسى قاعيدانى ۇستانىپ, ەلىم ءۇشىن ايانباي ەڭبەك ەتىپ كەلەمىن. اتىراۋ وبلىسى قۇلسارى قالاسىندا سۋ تاسقىنى كەزىندە كەمەرىنەن اسقان وڭىردەگى وزەننىڭ اعىسىن بۇرۋعا قول ۇشىن سوزدىق. توپىراق تولتىرىلعان قاپتاردى دايىنداۋ جانە توسەۋ جۇمىستارىنا قاتىسىپ, مەيلىنشە سۋدان امان قالعان شاعىن اۋدانداردى ساقتاپ قالۋعا اتسالىستىق. سول سىن ساعاتتا ورتادا ءجۇرىپ, اتا-بابامىزدان جالعاسىپ كەلە جاتقان ۇلتتىق قۇندىلىعىمىز – بىرلىك پەن ىنتىماقتىڭ ناعىز ۇلگىسىن كوردىك. ودان ارقايسىمىز رۋحتانىپ, جىگەرلەنىپ, بىرلىك پەن تالاپتى ەڭبەككە سالعاننىڭ ناتيجەسىندە اساۋ تولقىندى اۋىزدىقتاي الدىق, – دەيدى 41433 اسكەري ءبولىمىنىڭ روتا ستارشيناسى.
«ەل قورعانى» مەدالى ەرلىگىمەن ەرەكشەلەنگەندەرگە 2017 جىلدان باستاپ بەرىلەدى. ناگرادا ەكى دارەجەدەن تۇرادى. ياعني ءى دارەجەلى مەدالىمەن قازاقستان رەسپۋبليكاسىنىڭ قورعانىس قابىلەتىن, اسكەري قاۋىپسىزدىگىن نىعايتۋعا ەلەۋلى ۇلەس قوسقان قارۋلى كۇشتەرىنىڭ وفيتسەرلەر قۇرامى مەن ازاماتتارى ماراپاتتالادى. ال ءىى دارەجەلى مەدالىمەن قازاقستان رەسپۋبليكاسى قارۋلى كۇشتەرىنىڭ سەرجانتتار جانە ساربازدار قۇرامدارىنىڭ اسكەري قىزمەتشىلەرى ماراپاتتالادى. بۇل قۇرمەتكە توتەنشە جاعدايداعى تاباندى ءىس-قيمىلى ءۇشىن قۋانىش ەرعاليەۆ تە يە بولدى. باتىس قازاقستان وبلىسىنىڭ بوكەي وردا اۋدانىنا قاراستى سايقىن اۋىلىنىڭ تۋماسى العاش اسكەري قىزمەتكە قالاي كەلگەنىن ەسكە الىپ, جاستاردى وتان الدىنداعى بورىشىن وتەۋگە شاقىردى.
– جوعارى وقۋ ورنىنا گرانتقا تۇسە المادىم. ويلانباستان, 2005 جىلى اسكەري بورىشىمدى وتەۋگە اتتاندىم. سودان 2007 جىلعا دەيىن الماتى وبلىسىنداعى قاپشاعاي قالاسىنداعى اسكەري بولىمدە ازاماتتىق مىندەتىمدى اتقاردىم. «ارمانسىز ادام – قاناتسىز قۇسپەن تەڭ» دەگەن ءسوز بار ەمەس پە؟ سول سەكىلدى اسكەري ادام بولۋدى بالا كەزىمنەن ارماندادىم. مەكتەپتە وقىپ جۇرگەندە دەسانتتىق شابۋىلدارعا قاتىستى ءتۇرلى فيلمدەردى ءجيى كورەتىنمىن. ءارى ەلگە قىزمەت ەتۋدى كوپ ارماندايتىنمىن. ۇيدەگى ۇلكەندەر دە «اتاڭنىڭ بالاسى بولما, ادامنىڭ بالاسى بول» دەپ ءجيى ايتاتىن. سودان ارمانىم ماقساتىما اينالدى. كەيىن اسكەري قىزمەتتە قالدىم. مىنە, 20 جىلعا جۋىق ۋاقىت ءوتتى, قازىر ءومىرىمدى اسكەري فورماسىز ەلەستەتە المايمىن. جالپى, بۇل اسكەري سالا كەز كەلگەن ادامدى ءتارتىپ پەن توزىمدىلىككە, باتىلدىققا, شىنشىلدىققا, ءارى سپورتقا جاقىن بولۋعا ۇيرەتەدى. ەر ادام قانداي جاعداي بولسىن, وتان الدىنداعى بورىشىن اقتاۋعا مىندەتتى, – دەيدى قۋانىش ەرعاليەۆ.
راسىمەن, تەپسە تەمىر ۇزەتىن, دەنى ساۋ جىگىتتەر وتان الدىنداعى بورىشىن وتەۋگە مىندەتتى. اسكەرگە بارۋعا ق ۇلىقسىز جاستاردىڭ ارەكەتىنەن پرەزيدەنت قاسىم-جومارت توقاەۆ تا حاباردار. سول سەبەپتى جاۋاپتىلارعا ناسيحات جۇمىستارىن كۇشەيتۋدى تاپسىرعان-دى. قازىر اسكەرگە بارعان جاستارعا بىرقاتار جەڭىلدىك قاراستىرىلادى. سونىڭ ءبىرى – اسكەري بورىشىن وتەپ كەلگەن ازاماتتار جوعارى وقۋ ورنىنا جەڭىلدىكپەن تۇسەدى. سونداي-اق مەرزىمدى اسكەري قىزمەتتەگى ساربازدار نەسيەسىن تولەۋ مىندەتىنەن ۋاقىتشا بوساتىلادى. ولار وزدەرى قالاسا, ارميا قاتارىنان ناقتى ماماندىق تا الىپ شىعادى.
