دوڭگەلەك ۇستەلدى جۇرگىزگەن KazNARU باسقارما توراعاسى-رەكتور, ۇلتتىق عىلىم اكادەمياسىنىڭ پرەزيدەنتى اقىلبەك كۇرىشباەۆ رەسپۋبليكاداعى سۋ قورىن ساقتاۋدىڭ ماڭىزىن اتاپ وتە كەلىپ, «سۋ رەسۋرستارى جانە سۋدى پايدالانۋ» كافەدراسىندا ۇزاق جىلدار ابىرويلى ەڭبەك ەتكەن عالىمنىڭ سۋ شارۋاشىلىعى سالاسىن دامىتۋداعى ەرەن ەڭبەگىنە توقتالدى. مەرەيتويىمەن قۇتتىقتاپ, سىي-سياپات كورسەتتى.
«ناريمان قىپشاقباي ۇلىنىڭ ەلىمىزدىڭ سۋ شارۋاشىلىعىن دامىتۋعا قوسقان زور ۇلەسىن ۇنەمى ىقىلاسپەن ايتىپ جۇرەمىز. ويتكەنى قايراتكەر ەڭبەك جولىن قاراپايىم مامان بولىپ باستاپ, مەليوراتسيا جانە سۋ شارۋاشىلىعى مينيسترلىگىنىڭ باسشىلىعىنا دەيىنگى ناتيجەلى جۇمىستارى ءالى كۇنگە دەيىن اۋىل شارۋاشىلىعىنىڭ دامۋىنا پايداسىن تيگىزىپ وتىر. تاۋەلسىزدىك جىلدارىندا سۋ كودەكسىنىڭ جوباسىن ازىرلەۋگە جەتەكشىلىك ەتىپ, ورتالىق ازيا مەملەكەتتەرى, رەسەي جانە قىتاي اراسىنداعى ترانسشەكارالىق وزەندەردىڭ سۋىن پايدالانۋ جونىندەگى حالىقارالىق ۇيىمدى قۇرۋعا ۇلكەن ۇلەس قوستى. سونىمەن قاتار حالىقارالىق ارالدى قۇتقارۋ قورىن قۇرۋعا بەلسەندىلىكپەن اتسالىسىپ, سۋ قاۋىپسىزدىگىن ساقتاۋ, سۋ نىساندارىن قورعاۋ ماسەلەلەرىندە بارلىق ارىپتەسىنە ۇلگى كورسەتىپ كەلەدى. توقساننىڭ تورىنە شىققان ناريمان قىپشاقباي ۇلىن بارشا عالىم ارىپتەستەرىنىڭ اتىنان زور دەنساۋلىق, قاجىرلى كۇش-قايرات تىلەيمىز!», دەدى رەكتور.
«جەر مەن سۋ – قازاقستاننىڭ ەڭ ۇلكەن بايلىعى. سوندىقتان تابيعات بايلىعىن كوزدىڭ قاراشىعىنداي ساقتاۋعا ءتيىسپىز. مەنىڭ سۋ سالاسىنىڭ ينجەنەرلىگىن تاڭداۋىم دا جايدان-جاي ەمەس. حالقىمىزدىڭ جاقسى ءومىر ءسۇرۋىن قامتاماسىز ەتە وتىرىپ, وسى تابيعاتتىڭ بەرگەن سىيىن رەسۋرسقا ءتيىمدى اينالدىرا وتىرىپ, كوزدىڭ قاراشىعىنداي ساقتاۋعا مىندەتتى ەكەنىمىزدى ەستە ۇستاۋىمىز قاجەت», دەدى ناريمان قىپشاقباي ۇلى.
دوڭگەلەك ۇستەل بارىسىندا «Water HUB» حالىقارالىق زەرتتەۋ ورتالىعىنىڭ ديرەكتورى ا.ريابتسەۆ, گەوگرافيا ينستيتۋتىنىڭ ديرەكتورى ا.مەدەۋ, ۋ.احمەتسافين اتىنداعى گيدروگەولوگيا ينستيتۋتىنىڭ ديرەكتورى م.ابسەمەتوۆ, حالىقارالىق ارالدى قۇتقارۋ قورىنىڭ قازاقستانداعى اتقارۋشى ديرەكتسياسىنىڭ ديرەكتورى س.مۇقاتاەۆ, د.قوناەۆ اتىنداعى ۇاك فيليالىنىڭ ديرەكتورى م.ارىستانوۆ, «كازگيپروۆودحوز» پك ديرەكتورى ر.فايزۋلدين جانە تاعى دا باسقا ازاماتتار عالىمدى مەرەيتويىمەن قۇتتىقتاپ, ەلىمىزدەگى سۋ سالاسىندا تۋىنداپ وتىرعان وزەكتى ماسەلەلەر مەن ولاردى شەشۋ جولدارىن تالقىلادى.
الماتى
