جىل باسىندا وتكەن ۇكىمەت وتىرىسىندا دەنساۋلىق ساقتاۋ ءمينيسترى اقمارال ءالنازاروۆا 2024 جىلى قاناتقاقتى جوبا اياسىندا 655 نىساندى پايدالانۋعا بەرۋ جوسپارلانىپ وتىرعانىن ايتقان بولاتىن. مينيستر جوبا اياسىنداعى جۇمىستار ەلىمىزدىڭ بارلىق قيىرىندا جوسپارعا سايكەس اتقارىلاتىنىن تىلگە تيەك ەتكەن ەدى. ۇلتتىق جوبا شەڭبەرىندە جامبىل وبلىسىندا قانداي جۇمىس قولعا الىنىپ جاتىر؟
وبلىس اكىمدىگى دەنساۋلىق ساقتاۋ باسقارماسىنىڭ باسشىسى جانار وسپانوۆا كەلتىرگەن دەرەككە جۇگىنسەك, وتكەن جىلى مەديتسينا سالاسىن دامىتۋعا قازىنادان 14 ميلليارد تەڭگە قاراستىرىلعان. جالپى العاندا 24 نىساننىڭ قۇرىلىس جۇمىسى جۇرگىزىلسە, ونىڭ 10-ى «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى اياسىندا ىسكە اسقان.
قاناتقاقتى جوبا اياسىنداعى جۇمىستار بيىل دا ساتىمەن جالعاسىپ جاتىر. وڭىردە ۇزىن سانى 26 دەنساۋلىق ساقتاۋ نىسانىنىڭ قۇرىلىس جۇمىسى قولعا الىنعان بولسا, ونىڭ 20-سى «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسىنا ەنگەن. ءبىر سوزبەن ايتقاندا, شالعايدا جاتقان بىرقاتار اۋىلداعى امبۋلاتوريا ماسەلەسى وسى جىلى ۇلتتىق جوبا اياسىندا شەشىمىن تاباتىن كورىنەدى.
وڭىردە جوسپارداعى نىسانداردىڭ العاشقىسى پايدالانۋعا بەرىلدى. وبلىس ورتالىعىنا تاياۋ ماڭداعى شايقورىق اۋىلىنىڭ 6 مىڭعا جۋىق حالقى ىلگەرىدە توز-توزى شىققان ەسكى عيماراتقا تاۋەلدى بولعان ەدى. ول از دەسەڭىز, دياگنوستيكا مەن تالداۋ جاساۋ ءۇشىن جەرگىلىكتى حالىق 25 شاقىرىم قاشىقتىقتى ارتقا تاستاپ, اۋدان ورتالىعى اسا اۋىلىنا سابىلاتىن. اۋىلدىقتاردى الاڭداتقان وزەكتى ماسەلە ۇلتتىق جوبا اياسىندا شەشىمىن تاۋىپ وتىر.
جاقىندا شايقورىقتاعى جاڭا امبۋلاتورياعا ۇكىمەت باسشىسى ولجاس بەكتەنوۆ ات باسىن بۇرىپ, جوبا اياسىندا قولعا الىنعان جۇمىستاردى زەردەلەدى. ەلدى مەكەن تۇرعىندارى سارىلا كۇتكەن سۋ جاڭا ەمدەۋ مەكەمەسىندە ارنايى زەرتحانا, ۋدز, ەكگ جانە باسقا دا اسا قاجەتتى قۇرىلعىلار بار. ءبىر سوزبەن ايتقاندا, اۋىلداعى اعايىن ارمانداعان امبۋلاتوريادا نەگىزگى قۇرىلعىلار جەتكىلىكتى.
جالپى العاندا, پرەزيدەنت باستاماسىمەن قولعا الىنعان «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسىنىڭ جەرگىلىكتى حالىق ءۇشىن دە, بيلىك ءۇشىن دە پايداسى زور. ماسەلەن, جوبا اياسىندا اتقارىلعان جۇمىس ناتيجەسىندە توزىعى جەتكەن مەديتسينالىق عيماراتتاردىڭ قاراسى ازايادى. بۇل كورسەتكىش كۇنى بۇگىنگە دەيىن
40,3 پايىزدى قۇراعان بولسا, وسى جىلى قۇرىلىسى اياقتالاتىن نىساندار ەسەبىنەن كورسەتكىش 36,5 پايىزعا دەيىن تومەندەمەك.
قالاي دەسەك تە كەيىنگى جىلدارى ءوڭىر مەديتسيناسىن وركەندەتۋگە ايرىقشا باسىمدىق بەرىلىپ وتىر. ناقتىراق ايتار بولساق, 4,5 ميلليارد تەڭگە قاراجاتقا 125 بىرلىك مەديتسينالىق قۇرال جابدىق پەن 30 سانيتارلىق اۆتوكولىك ساتىپ الىندى. سونداي-اق جەرگىلىكتى بيلىك دارىگەرلەردىڭ تاپشىلىعىن جويۋ, اق حالاتتى ابزال جانداردىڭ بىلىكتىلىگىن ارتتىرۋعا دا ايرىقشا دەن قويعان.
جامبىل وبلىسى
