«BNK Financial Group Inc.» كومپانياسىنىڭ قۇرىلىمىنا كىرەتىن «BNK Finance Kazakhstan» ميكروقارجى ۇيىمى ەكىنشى دەڭگەيلى بانككە اينالۋعا رۇقسات الدى دەپ حابارلادى قارجى نارىعىن رەتتەۋ جانە دامىتۋ اگەنتتىگى (قنردا). بۇل تۋرالى كورەيا رەسپۋبليكاسىنىڭ پرەزيدەنتى يۋن سوك ءيولدىڭ ەلىمىزگە مەملەكەتتىك ساپارى اياسىندا ۇيىمداستىرىلعان قازاقستان – كورەيا بيزنەس-فورۋمىندا ءمالىم بولدى. قنردا, قارجى قىزمەتتەرى جونىندەگى كوميسسيا (FSC) جانە كورەيا رەسپۋبليكاسىنىڭ قارجىلىق قاداعالاۋ قىزمەتى (FSS) اراسىندا «بانكتىك قاداعالاۋ سالاسىنداعى ءوزارا تۇسىنىستىك» تۋرالى مەموراندۋمعا قول قويىلدى.
«قۇجات (مەموراندۋم) ينۆەستيتسيالاردىڭ قاۋىپسىزدىگىن قامتاماسىز ەتەدى. ءبىزدىڭ ەلدە جۇمىس ىستەيتىن كورەيانىڭ «BNK Finance Kazakhstan» ميكروقارجى ۇيىمىن ەكىنشى دەڭگەيلى بانككە اينالدىرۋ تۋرالى شەشىمدى قولدايمىن», دەدى قاسىم-جومارت توقاەۆ.
«BNK Financial Group Inc.» – وڭتۇستىك كورەيانىڭ 129 ملرد دوللارلىق اكتيۆتەرى مەن ۇلتتىق «AAA» رەيتينگى بار ەڭ ءىرى قارجى توبى. توپ قۇرىلىمىنا «ا2» حالىقارالىق رەيتينگىنە ساي 300-دەن استام فيليالى بار 2 بانك كىرەدى. «BNK Finance Kazakhstan» 2021 جىلعى ساۋىردەن باستاپ قنردا ليتسەنزياسىنا يە. مقۇ-نىڭ تىكەلەي اكتسيونەرى – 6,7 ملرد دوللار مولشەرىندە اكتيۆى بار «BNK Capital» بولىپ سانالادى. ءۇش جىل ىشىندە مقۇ اكتيۆى 5 ەسە ۇلعايىپ, 20,3 ملرد تەڭگەنى قۇراعان. نەسيە پورتفەلى 6 ەسە ارتىپ, 18,8 ملرد تەڭگەگە جەتكەن.
«ميكروقارجى ۇيىمىنىڭ ەكىنشى دەڭگەيلى بانككە اينالۋى قازاقستاندا العاش رەت بولىپ وتىر. مۇنداي اۋىسۋدى جۇزەگە اسىرۋعا مۇمكىندىك بەرەتىن ءتيىستى زاڭنامالىق بازانى ءبىز وتكەن جىلى قابىلدادىق. قارجى رەتتەۋشىسى رەتىندە وسىنداي ءبىرىنشى رۇقساتتى بەردىك جانە بۇل حالىقارالىق قارجى كونگلومەراتىن بىلدىرەتىن شەتەلدىك بانك ەكەندىگى قۋانتادى. بۇل – بۇكىل نارىق ءۇشىن ماڭىزدى وقيعا. ۇدەرىستىڭ باستى ەرەكشەلىگى – ميكروقارجى ۇيىمى ءوز قىزمەتىن توقتاتپايدى. بانكتىك ليتسەنزيا العانعا دەيىنگى كەزەڭدە دە ميكروقارجى ۇيىمى وپەراتسيالارىن ستاندارتتى رەجىمدە جالعاستىرادى», دەيدى اگەنتتىك توراعاسى ءمادينا ابىلقاسىموۆا.
ايتۋىنشا, «BNK Finance Kazakhstan»-نىڭ جاڭا ءرولى مەن مارتەبەسى بانك سەكتورىنداعى باسەكەلەستىكتى كۇشەيتەدى.
«جاڭا بانكتىڭ پايدا بولۋىنان ءبىرىنشى كەزەكتە كليەنتتەر, قارجىلىق قىزمەتتەردى تۇتىنۋشىلار ۇتادى. شەتەلدىك بانك حالىقارالىق توپتىڭ ۇزدىك كورپوراتيۆتىك ستاندارتتارىنا سايكەس قارجىلىق قىزمەت كورسەتەدى. جاڭا ويىنشىنىڭ جوسپارى وراسان. شەتەلدىك بانك شاعىن جانە ورتا بيزنەسكە نەسيە بەرۋدى, كورپوراتيۆتىك كرەديتتەۋدى, ساۋدا-ساتتىقتى قارجىلاندىرۋدى, قارجى ليزينگىن, جوبالىق قارجىلاندىرۋدى جانە بولشەك بيزنەستى قارجىلاندىرۋدى جوسپارلاپ وتىر», دەدى ءمادينا ابىلقاسىموۆا.
«Tengenomika» تەلەگرام ارناسىنىڭ حابارلاۋىنشا, بيىلدىڭ وزىندە ەكىنشى دەڭگەيلى بانكتەر كلۋبىنا ءتورت جاڭا قارجى ۇيىمى قوسىلۋى مۇمكىن.
«اكتيۆتەر مەن نەسيە پورتفەلىنىڭ ەلەۋلى ۇلەسىن بىرنەشە ءىرى بانك الىپ جاتقان ەلىمىزدىڭ بانك سەكتورى جوعارى شوعىرلانعان دەپ بەكەر ايتىلمايدى. سول سەبەپتى, پرەزيدەنتتىڭ باسەكەنى ارتتىرۋ ءۇشىن شەتەلدىك بانكتەردى شاقىرۋى وتە قيسىندى بولدى. «سبەردىڭ» بۇرىنعى ەنشىلەس بانكى, قازىرگى «Bereke Bank» قاتارلىق «Lesha Bank»-كە ساتىلىپ, شەتەلدىك اكتسيونەرگە يە بولدى. «KMF» پەن «Solva» دا بيىل بانككە اينالۋدى كوزدەپ وتىر. وسىلايشا, جىل سوڭىنا دەيىن سەكتور جاڭا قاتىسۋشىلارمەن تولىعۋى مۇمكىن. بۇل قارجى قىزمەتىن تۇتىنۋشىلار ءۇشىن ءپوزيتيۆتى جاڭالىق», دەپ جازادى كانال اۆتورلارى.
اسەم جاناتوۆا,
ل.ن.گۋميلەۆ اتىنداعى ەۇۋ-دىڭ 2-كۋرس ستۋدەنتى
