بۇل كۇنى قالا جۇرتشىلىعى «بايقوڭىر» اۋدانىنىڭ «اتاتۇرىك» ساياباعىندا «ۇلتتىق ويىن – ۇلت قازىناسى» دەگەن اتاۋمەن وتكەن كوڭىلدى دودانى تاماشالادى. اكەلەر مەن بالالار توبە كورسەتكەن سايىستا 10 توپ, ياعني 10 وتباسى باق سىناستى. قازاقتىڭ ءتول ويىندارىن تانىتۋمەن شەكتەلمەي, وتباسى ينستيتۋتىن نىعايتۋ ماقساتىندا ۇيىمداستىرىلعان سايىستىڭ ءجونى بولەك. ويتكەنى مۇندا اكە ءرولىنىڭ ماڭىزدىلىعىن كورسەتۋ, وتباسى قۇندىلىقتارىن دارىپتەۋ, اكە مەن بالا اراسىنداعى قارىم-قاتىناستى نىعايتۋ سەكىلدى ەڭ نەگىزى ماقسات-مۇرات بار.
سايىستا اكەلەر مەن بالالار «ارقان تارتۋ», «بەس تاس», «اسىق اتۋ», «توعىزقۇمالاق», «لاڭگى تەبۋ» سەكىلدى ويىنداردا سىنعا ءتۇسىپ, كىم مىقتىنى انىقتادى. الاماننىڭ باستى جۇلدەسى كوپتىڭ ىشىنەن دارالانعان ايدار شوناەۆ پەن بالاسى تاڭاتقان نۇريسلام جۇبىنا بۇيىردى.
ء«بىز بايقوڭىر اۋدانىنداعى №4 مەكتەپ گيمنازياسىنان كەلدىك. ءوزىم سول مەكتەپتە دەنە شىنىقتىرۋ ءپانىنىڭ مۇعالىمىمىن. ال ۇلىم تاڭاتقان وسى ءبىلىم ورداسىنىڭ وقۋشىسى. بۇگىن ەكەۋمىز مەكتەبىمىزدىڭ نامىسىن ءساتتى قورعادىق. باسقا قاتىسۋشىلار دا اقتىق ساتكە دەيىن لايىقتى باسەكەلەستى. ءبىرى لاڭگى تەبۋدەن ۇزدىك بولسا, ەكىنشىسى ارقان تارتۋعا كەلگەندە الدىنا قارا سالدىرمادى. باستىسى, جارىس وتە تارتىستى ءوتتى. ۇلىم ەكەۋمىز ءدان ريزامىز. ارينە, وسىنداي ۇلتتىق سپورتتى دامىتۋعا, ناسيحاتتاۋعا باعىتتالعان سايىستاردىڭ كوبىرەك ۇيىمداستىرىلعانىن قولدايمىن», دەيدى ايدار شوناەۆ.
اكەلەر كۇنى قارساڭىندا ەلىمىزدىڭ بىرنەشە وڭىرىندە ءداستۇرلى وتباسىلىق قۇندىلىقتاردى اسپەتتەپ, «ۇلگىلى وتباسى» يدەياسىن ناسيحاتتاۋ ماقساتىندا ءتۇرلى ءىس-شارا ۇيىمداستىرىلدى. «وتان – وتباسىنان باستالادى». ال وتباسىندا انانىڭ ورنى قانداي بولسا, اكەنىڭ دە ورنى سودان كەم ەمەس. قارا شاڭىراقتىڭ يەسى – اكەلەر. انالار كۇنىمەن قاتار اكەلەر كۇنىن دە اتاپ ءوتۋدىڭ ارتىقشىلىعى وسىندا.
