«سىرقاتتانعان ءاربىر جان ەت جاقىنىم»
ادەتتە, مەديتسينا قىزمەتكەرلەرى كۇنى دەسەك, بىردەن باس دارىگەر, تانىمال حيرۋرگتەر ەسكە تۇسەدى. بارلىق ماراپات-ماداق, ىزگى تىلەكتەر سولارعا عانا ايتىلاتىنداي كورىنەدى دە تۇرادى. الايدا دارىگەردىڭ سەنىمدى سەرىگى, ادال كومەكشىسى – مەيىرگەرلەردىڭ دە ەڭبەگىن ەسكەرمەسكە بولمايدى. وسى تۇستا ءبىز ۇلتتىق گوسپيتالدىڭ مەيىرگەرى ايگۇل ايتبەكقىزىنىڭ اعىنان جارىلىپ ايتقان ءبىر ۇزىك سىرىن ۇسىنۋدى ءجون كوردىك.
«بالا كەزدە ءتۇرلى ماماندىققا قىزىعىپ, انانى-مىنانى ارماندايسىڭ. ءبىر قىزىعى, اق حالات كيىپ, ادامدارعا كومەكتەسۋگە بالا شاعىمنان قىزىقتىم. كەيىن, ول ارمان ومىرلىك ماقساتىما اينالدى. مەديتسينالىق كوللەدجگە وقۋعا ءتۇستىم. 1989 جىلى مەديتسينالىق كوللەدجدەن سوڭ سول زاماندا «سوۆمين» ورتالىق اۋرۋحاناسى دەپ اتالاتىن ەمدەۋ ورنىنا جولداما الدىم. بيىل مۇندا جۇمىس ىستەپ جۇرگەنىمە 35 جىل تولادى ەكەن. جۇمىس بارىسىندا باسشىلىق مەنى شيراسىن دەگەن بولۋى كەرەك, بىردەن ءحالى اۋىر ناۋقاستار جاتاتىن جانساقتاۋ بولىمىنە جىبەردى. اجالمەن بەتپە-بەت كەلگەن ناۋقاستاردىڭ جاعدايىن جاساي ءجۇرىپ, ارىپتەستەرىمنەن ۇيرەنگەنىم ۇشان-تەڭىز. ەڭ العاش بىزگە اسا قامقور بولعان ادام ەم-شارا بولمەسىندەگى تاجىريبەلى مامان گ.د.كوۆالەنكو ەدى. ول كىسىمەن ءالى كۇنگە دەيىن ارىپتەستىك قارىم-قاتىناسىمىز ۇزىلگەن جوق. قازاقتىڭ بەتكە ۇستار ازاماتتارى ە.سەركەباەۆ, ءا.دىنىشەۆ, ن.تىلەنديەۆ, ر.باعلانوۆا سىندى تالاي تۇلعانى ەمدەۋگە ارالاسىپ, العىستارىن العان ساتتەردى ەشقاشان ۇمىتپايمىن», دەپ وتكەن شاقتى ەسكە الادى ا.ايتبەكقىزى.
جىلدار جىلجىپ, جانساقتاۋ بولىمىندە شىڭدالعان ايگۇلدى باسشىلىق 2-كارديولوگيالىق بولىمگە اعا مەيىرگەرلىك قىزمەتكە جىبەرگەن. ءوز ءىسىن جەتىك بىلەتىن مامان وندا تابان اۋدارماي 10 جىل ەڭبەك ەتىپتى. بولىمدە ءتۇرلى جاستاعى ناۋقاستارعا قارايلاپ جۇرگەن ايگۇل ايتبەكقىزى «سىرقاتتانعان ءاربىر جان ەت جاقىنىم» دەگەن ۇستانىمدى تۋ ەتكەن مەيىربان جان. 2012 جىلى ۇجىم باسشىلىعىنىڭ شەشىمىمەن ايگۇل كلينيكاداعى مەيىرگەرلەرگە جەتەكشى بولىپ تاعايىندالدى. ول اعا مەيىرگەر قىزمەتىن اتقارعالى ءۇش مارتە ۇلتتىق اككرەديتاتسيادان «وتە جاقسى» دەگەن باعامەن ءوتىپ, ءۇش رەت حالىقارالىق «التىن ستاندارت» JCI بەلگىسىن العان. ءبىر اۋرۋحانادا 35 جىل تابان اۋدارماي جۇمىس ىستەپ, كوپتىڭ باتاسىن العان جانى جايساڭ مەيىرگەرگە تولايىم تابىس تىلەيمىز.
«كەيدە پسيحولوگ بولىپ كەتەسىڭ»
ءاربىر سالانىڭ ۇستىنى – بىلىكتى ماماندار دەپ بىلەمىز. كەيىپكەرىمىز كۇلسىمحان ايتجانقىزى 1985 جىلى الماتى قالاسىنداعى قالالىق مەديتسينا كوللەدجىن ءتامامداپ, ەڭبەك جولىن №1 قالالىق بالالار اۋرۋحاناسىندا وپەراتسيالىق مەيىرگەر بولىپ باستاعان. سوندا بىلىكتى دە بىلگىر مامانداردان تاجىريبە جيىپ, اجەپتاۋىر ىسىلىپ قالعان مامان 1995 جىلى №7 قالالىق كلينيكالىق اۋرۋحاناسىنا شاقىرىلادى. نەيروحيرۋرگيالىق وپەراتسيا مەيىرگەرى بولىپ جۇمىس ىستەي ءجۇرىپ, قيىندىعى مول ماماندىقتىڭ قىر-سىرىن مەڭگەرگەن كۇلسىمحان ايتجانقىزى «سوۆمين» اۋرۋحاناسىنا جۇمىسقا شاقىرىلادى.
ءوز ءىسىنىڭ بىلگىرى كۇلسىمحان ايتجانقىزى سالادا 39 جىل ەڭبەك ەتسە, سونىڭ ىشىندە قازىرگى ۇلتتىق گوسپيتالدە 26 جىلى ءوتىپتى. كۇلسىمحان مۇراتوۆا جۇمىس بارىسىندا وپەراتسيالىق مەيىرگەرگە توزىمدىلىك, سابىرلىق, شىنشىلدىق سەكىلدى قاسيەتتەردىڭ اۋاداي قاجەت ەكەنىنە كوز جەتكىزگەنىن ايتادى. «كەيدە پسيحولوگ تە بولىپ كەتەسىڭ. ناۋقاس ادامنىڭ كوڭىلىن اۋلاپ, جىلى سوزىڭمەن دەمەۋ وعان كۇش بەرەتىنىن بايقايسىڭ. وپەراتسيا الدىندا بويىن ۇرەي بيلەگەن ادامعا كەرەكتى ءسوز تاۋىپ ايتۋدىڭ ءوزى تاپقىرلىقتى تالاپ ەتەدى», دەدى مامان ءبىر سوزىندە.
ءيا, وپەراتسيالىق مەيىرگەر – دارىگەردىڭ ءبىرىنشى كومەكشىسى عانا ەمەس, حيرۋرگيالىق توپتىڭ مۇشەلەرىن بايلانىستىراتىن نەگىزگى تۇلعا. ول وپەراتسيا بارىسىندا حيرۋرگكە كەرەكتى قۇرالداردى دارىگەردىڭ قاس-قاباعىن باعىپ, الدىن-الا ءبىلىپ تۇرۋى كەرەك. حيرۋرگيالىق توپتىڭ جۇمىسى تەپە-تەڭدىكتى, سەنىمدىلىكتى ءارى جوسپارلى وپەراتسيادان شۇعىل وپەراتسياعا اۋىسۋ جىلدامدىعىن تالاپ ەتەدى. ناۋقاستىڭ وپەراتسيادان كەيىنگى ايتقان العىسى مەن جىلى لەبىزى دارىگەرلەردى, مەيىرگەرلەردى قاناتتاندىرىپ قانا قويماي, ءبىلىمىن جەتىلدىرۋگە مىندەتتەيدى. ويتكەنى ءومىر مەن ءولىمنىڭ اراسىندا جاتقان ناۋقاستى اياققا تۇرعىزىپ, ءۇمىت سىيلاۋ – زور باقىت. سول باقىتتى كۇندەر بار قيىندىقتى ۇمىتتىرادى.
الماتى
