سۋرەتتى تۇسىرگەن – جەڭىس ىسقاباي
جوعارى وقۋ ورنى مەن وڭىردەگى حيميا ءوندىرىسىنىڭ لوكوموتيۆى سانالاتىن «قازفوسفات» جشس جانە د.مەندەلەەۆ اتىنداعى رەسەي حيميا-تەحنولوگيا ۋنيۆەرسيتەتى بىرلەسىپ قولعا العان جوبانىڭ العاشقى تۇلەكتەرى كاسىبي مامانداردان ءدارىس الىپ, ءبىلىمىن جەتىلدىردى.
ال بىرەر كۇن بۇرىن م.ح.دۋلاتي اتىنداعى تاراز وڭىرلىك ۋنيۆەرسيتەتىندە «مەندەلەەۆ سىنىبى» جوباسىنىڭ 10-11 سىنىپ بىتىرۋشىلەرىنە سەرتيفيكات تابىستاۋ ءراسىمى سالتاناتتى تۇردە ۇيىمداستىرىلدى. ءىس-شاراعا د.مەندەلەەۆ اتىنداعى رحتۋ, «قازفوسفات» جشس قىزمەتكەرلەرى, قالا مەكتەپتەرىندەگى حيميا ءپانىنىڭ مۇعالىمدەرى, دۋلاتي ۋنيۆەرسيتەتىنىڭ وقىتۋشىلارى مەن ستۋدەنتتەرى قاتىستى.
بىلتىرعى قازان مەن بيىلعى مامىر ايى ارالىعىندا تارازدىق 22 وقۋشىعا د.مەندەلەەۆ اتىنداعى رەسەي حيميا-تەحنولوگيالىق ۋنيۆەرسيتەتى مەن دۋلاتي ۋنيۆەرسيتەتىنىڭ وقىتۋشىلارى ءدارىس بەردى. كاسىبي مامانداردىڭ ءتالىمىن العان ءبىلىم الۋشىلار جوبا اياسىندا وقۋىن ءتامامداپ, حيميا-ماتەماتيكا باعىتىندا ءبىلىمىن ۇشتادى.
م.ح.دۋلاتي ۋنيۆەرسيتەتىنىڭ باسقارما مۇشەسى – ستراتەگيالىق دامۋ جانە ينتەرناتسيونالداندىرۋ جونىندەگى پرورەكتور شولپان ەسىموۆانىڭ ايتۋىنشا, حيميا ونەركاسىبىندە ناقتى جوبالاردى جۇزەگە اسىرۋ ءۇشىن ءتۇرلى بىلىكتىلىگى بار 15 مىڭنان استام قىزمەتكەر قاجەت. ونىڭ ىشىندە 3 مىڭنان استام جوعارى ءبىلىمدى, 2 مىڭنان استام ورتا تەحنيكالىق ءبىلىمى بار جانە كاسىپتىك ءبىلىمى بار جۇمىسشىلار كەرەك ەكەنى انىقتالعان.
«قازفوسفات» جشس ءوندىرىسىنىڭ ارتۋىنا بايلانىستى بۇگىنگى تاڭدا 4000-عا جۋىق مامان قاجەتتىلىگى تۋىنداپ وتىر. ال وڭىرلىك ۋنيۆەرسيتەتكە حيميا ونەركاسىبى ءۇشىن مامانداردى دايارلاۋ مىندەتى جۇكتەلگەن.
ءىس-شاراعا بەينەبايلانىس ارقىلى قوسىلعان د.مەندەلەەۆ اتىنداعى رەسەي حيميا-تەحنولوگيالىق ۋنيۆەرسيتەتى رەكتورىنىڭ مىندەتىن اتقارۋشى يليا ۆوروتىنتسەۆ تۇلەكتەردى قۇتتىقتاپ, جىلى لەبىزىن جەتكىزدى. سونداي-اق ول «مەندەلەەۆ سىنىبى» جوباسى ءارى قاراي جالعاسىن تاباتىنىن ايتتى.
«قازفوسفات» جشس پەرسونالمەن جۇمىس دەپارتامەنتىنىڭ ديرەكتورى قايرات بولاتوۆ تۇلەكتەردى جوبانى ءساتتى اياقتاۋىمەن قۇتتىقتادى. حيميا سالاسى ماماندارىن مەكتەپ تابالدىرىعىنان باستاپ دايارلاۋ ءتيىمدى باستاما ەكەنىن ايتقان ول وقۋشىلاردى ءارى قاراي ىزدەنۋگە, تەرەڭ ءبىلىم الۋعا شاقىردى. ق.بولاتوۆتىڭ ايتۋىنشا, «قازفوسفات» جشس-نا قاراستى زاۋىتتارعا بىلىكتى كادرلار قاجەت. ول ماماندار «مەندەلەەۆ سىنىبى» تۇلەكتەرى اراسىنان شىقسا قۇبا-قۇپ.
ءىس-شارا بارىسىندا ماماندار قولىنان سەرتيفيكات العان وقۋشىلار بولاشاقتا حيميا سالاسىنىڭ بىلىكتى مامانى اتانۋعا نيەتتى ەكەنىن جەتكىزدى.
تاراز
