ەكى كۇنگە سوزىلعان بىلىمدىلەر بايگەسىندە «ەرۋديت» كومانداسى جەڭىسكە جەتتى. ينتەللەكتۋالدى سايىستىڭ فينالدىق كەزەڭىنە وبلىس اكىمىنىڭ ورىنباسارى بەيسەنباي تاجىباەۆ, مادەنيەت جانە اقپارات مينيسترلىگى جاستار جانە وتباسى ىستەرى كوميتەتى توراعاسىنىڭ ورىنباسارى ءبىرجان ءالىمجانوۆ قاتىسىپ, جەڭىمپاز اتانعان جاستاردى ماراپاتتادى. «ناعىز بىلىمگە قۇشتار, ۇنەمى ىزدەنىس جولىندا جۇرەتىن جاستاردىڭ باسىن بىرىكتىرەتىن رەسپۋبليكالىق دەڭگەيدەگى ينتەللەكتۋالدى سايىستاردىڭ ءبىزدىڭ وڭىرىمىزدە ءوتىپ جاتقاندىعى كوڭىل قۋانتادى. «بىلەكتى ءبىردى جىعار, ءبىلىمدى مىڭدى جىعار» دەگەندەي, سايىسقا قاتىسىپ ءوز باقتارىن سىناعان بارلىق كومانداعا العىس ايتامىن», دەدى وبلىس اكىمىنىڭ ورىنباسارى.
دارىندى جاستاردى قولداۋ, ولاردىڭ تانىمدىق قىزىعۋشىلىقتارىن وياتۋ ارقىلى ءبىلىم دەڭگەيىن كوتەرۋ, سونداي-اق ينتەللەكتۋالدى ورتانى قالىپتاستىرۋ, جاستار اراسىندا شەشەندىك مادەنيەتتى, تولەرانتتىلىق تارتىپپەن ازاماتتىق تانىمدى دامىتۋ ماقساتىنداعى بۇل سايىسقا 100-گە جۋىق كوماندا ءوتىنىم بەرگەن. ونىڭ ىشىندە تۇركىستان وبلىسىنان بولەك, استانا, الماتى, شىمكەنت قالالارى مەن جامبىل, پاۆلودار جانە قىزىلوردا وبلىستارىنان دا كوماندالار بار. جالپى, 72 كوماندا اراسىنان شيرەك فينالعا 12 كوماندا شىقتى. ولاردىڭ تورتەۋى فينالدىق كەزەڭنىڭ جولداماسىن ساراپقا سالىپ, ناتيجەسىندە, ءبىرىنشى ورىندى سايرام اۋدانىنىڭ «ەرۋديت» كومانداسى جەڭىپ الدى. ال ەكىنشى ورىندى جامبىل وبلىسىنان كەلگەن «Chicago bulls» كومانداسى السا, ءۇشىنشى ورىن بايدىبەكتىك «BBC» كومانداسىنا بۇيىردى. جەڭىمپاز كومانداعا 1000 000 تەڭگە, II ورىنعا 500 000 تەڭگە جانە III ورىن يەگەرلەرىنە 300 000 تەڭگە قارجىلاي سىيلىق تابىس ەتىلدى. سونداي-اق سايىسقا قاتىسقان كوماندالار اراسىندا «ۇزدىك ۇجىم», «ۇزدىك بىلىمگەر», «ۇزدىك توپ باسشى», «ۇزدىك جاۋاپ», «ۇزدىك كيىم ۇلگىسى» اتالىمدارى بويىنشا ۇزدىكتەر دە ماراپاتتالدى.
تۇركىستان
