ۆەلوشەرۋگە پوليتسيا دەپارتامەنتىنىڭ قىزمەتكەرلەرى, قالالىق اكىمدىكتىڭ, سپورت سەكتسيالارىنىڭ, ۇەۇ جاستار قوزعالىستارىنىڭ وكىلدەرى, سونىمەن قاتار ءوز بەتىمەن نيەت بىلدىرگەندەر – بارلىعى 700-دەن استام ادام قاتىستى.
ۆەلوشەرۋ تۇران داڭعىلىنىڭ بويىنداعى «قازاقستان كۇنى» مونۋمەنتىنەن باستاۋ الىپ, قورعالجىن تاس جولىندا جالعاسىپ, تۇران داڭعىلى بويىنداعى دەمالىس ساياباعىندا اياقتالدى. جارىس بارىسىندا ۆەلوشاباندوزدارعا پوليتسيانىڭ پاترۋلدىك كولىكتەرى مەن ەسكورد ۆزۆودى ىلەسىپ ءجۇردى. استانا قالالىق پوليتسيا دەپارتامەنتىنىڭ باستىعى, پوليتسيا گەنەرال-مايورى مارات تولەباەۆتىڭ جەتەكشىلىگىمەن قاتىسۋشىلار ون شاقىرىمدى باعىندىردى.
سپورتتىق شارا – وسكەلەڭ ۇرپاق اراسىندا ەسىرتكى قىلمىسىمەن كۇرەسۋ, سونداي-اق جاستاردىڭ ەسىرتكىگە اۋەس بولماي, پسيحواكتيۆتى زاتتاردى قولدانباي, بوس ۋاقىتىن دۇرىس پايدالانۋىن, بۇقارالىق سپورتتى كەڭىنەن ناسيحاتتاۋ مەن دامىتۋ ماقساتىندا وتكىزىلدى.
«ۆەلوشەرۋ ەڭ الدىمەن ناشاقورلىق ماسەلەسىنە قوعامنىڭ نازارىن اۋدارۋعا باعىتتالعان. بۇل – بۇكىل قوعام ءۇشىن پروبلەما جانە ونىمەن ءبارىمىز بىرگە, جۇمىلا كۇرەسۋىمىز قاجەت», دەدى پوليتسيا دەپارتامەنتىنىڭ باسشىسى.
جىل باسىنان بەرى پوليتسيا قىزمەتكەرلەرى زاڭسىز ەسىرتكى اينالىمىنان جالپى سالماعى 60 كگ-دان استام ەسىرتكى زاتىن تاركىلەدى. مۇنداي ءىس-شارالار وسكەلەڭ ۇرپاقتىڭ بويىندا ناشاقورلىققا توزبەۋشىلىكتى قالىپتاستىرۋ, سونداي-اق ولاردى وسى زياندى تاۋەلدىلىكتەن قورعاۋعا باعىتتالعان.
ۆەلوشەرۋدىڭ بارلىق قاتىسۋشىسى بەلگىلەنگەن قاشىقتىقتان سۇرىنبەي ءوتتى, ال ولاردىڭ دوستارى مەن ارىپتەستەرى مارە سىزىعىندا كۇتىپ تۇردى.
