مىسالى, تۇلكىباستىق تۇلەكتەر تاعى دا ءبىر وتباسىن قۋانىشقا بولەدى. يگى ءداستۇردى جالعاعان اباي اتىنداعى ءبىلىم وشاعى مەن ب.سادىقوۆ جانە م.لومونوسوۆ مەكتەبىنىڭ 20 جىل بۇرىن تۇلەپ ۇشقان تۇلەكتەرى بىرىگىپ, مۇقتاج وتباسىنا اۋدان ورتالىعىنان 5 بولمەلى باسپانانى, قورا-جايىمەن قوسا سىيلادى. ورتادان 10 ملن تەڭگەدەن استام قاراجات جيناپ, سونىڭ 9 ملن تەڭگەسىنە ءۇي العان تۇلەكتەر ونى تولىق جوندەۋدەن وتكىزىپ, ءىشىن قاجەتتى جيھاز-تەحنيكالارمەن جابدىقتاپ بەرىپ وتىر. ساۋاپتى ءىستى ۇران قىلعان تۇلكىباستىقتار باسپانا كىلتىن سول ءۇيدىڭ اۋلاسىندا قۇدايى اس بەرىپ, ابدۋلاەۆتار وتباسىنا تابىس ەتتى. جاس وتباسى وسى كەزگە دەيىن جالدامالى پاتەردە تۇرىپ كەلگەن. شارا سوڭىندا مۇقتاج جانعا كومەك بەرۋ, قايىرىمدىلىق جاساۋ – اتا-بابامىزدان بىزگە مۇرا بولىپ قالعان اسىل قاسيەت دەپ ساناعان 2004 جىلعى مەكتەپ تۇلەكتەرى ءداستۇر بويىنشا ەستافەتانى 2005 جىلعى تۇلەكتەرگە تابىستادى. ايتا كەتەلىك, وسىدان 7 جىل بۇرىن تۇلكىباس اۋدانى اباي اتىنداعى مەكتەپ-ليتسەيىنىڭ مەكتەپتى بىتىرگەندەرىنە 20 جىل تولعان تۇلەكتەرى تۇرعىن ۇيگە قول جەتكىزە الماي جۇرگەن كوپبالالى وتباسىنا ءۇي سىيلاعان بولاتىن. وسىلايشا, كوپشىلىككە ۇلگى بولارلىقتاي يگى ىستەر ءوز جالعاسىن تابۋدا.
سوزاق اۋدانى, سوزاق اۋىلىنداعى الىشەر ناۋاي اتىنداعى ءبىلىم ورداسىنان 2004 جىلى قانات قاعىپ, ۇلكەن ومىرگە قادام باسقان تۇلەكتەر دە كوپبالالى وتباسىنا تۇرعىن ءۇي سىيلادى. تاعىلىمدى شاراعا قاتىسقان اۋدان اكىمى مۇحيت تۇرىسبەكوۆ يگى ىسكە ۇيىتقى بولعان تۇلەكتەردى العىس حاتپەن ماراپاتتادى. سوزاق اۋىلىنان بەرىلگەن جاڭا باسپانا 5 بولمەلى. ىشكى بولمەلەرى قاجەتتى تۇرمىستىق جابدىقتارمەن قامتىلعان. سۋ, جىلۋ سىندى كوممۋنالدىق قىزمەتتەرى جۇرگىزىلگەن. جەر ۋچاسكەسى – 15 سوتىق. ءۇيدىڭ اۋماعىنا قوسالقى شارۋاشىلىقتى دامىتۋ مەن باۋ-باقشا وسىرۋگە مۇمكىندىك بار. ال سوزاق اۋىلىنداعى سوزاق مەكتەپ-گيمنازياسىن بىتىرگەنىنە 20 جىل بولعان تۇلەكتەر سوزاق-شولاققورعان باعىتىنداعى جول بويىنا اۋىلعا كورىك بەرەر اسەم قاقپا تۇرعىزدى. جاڭادان تۇرعىزىلعان ساۋلەتتى قاقپانىڭ بيىكتىگى – 6,5, ەنى – 13 مەتر. اۋىلدىڭ اتى جازىلعان جازۋ مەن قاقپا اۋماعىنا تۇنگى جارىقشامدار ورناتىلعان. وتكەن جىلى تۇلەكتەر تۇرعىزعان رامىزدەر اللەياسىنا قاراما-قارسى سالىنعان قاقپانىڭ ءسانى مەن ساۋلەتى كەلىسىپ, اۋىلدىڭ اجارىن اشا تۇسكەن. كەنتاۋ قالاسىنا قاراستى حانتاعى اۋلىنداعى №6 ا.س.پۋشكين اتىنداعى جالپى ورتا مەكتەبىنىڭ وسىدان 20 جىل بۇرىنعى تۇلەكتەرى ءبىلىم ورداسىنا سپورت الاڭىن تارتۋ ەتتى. ودان بولەك, مەكتەپتىڭ ىشىنە رامىزدەر الاڭىن جاساپ بەرگەن. ال ورداباسى اۋدانىنىڭ ورتالىعى تەمىرلاندا ش.ءۋاليحانوۆ, ا.يمانوۆ جانە ق.بەكتاەۆ مەكتەپتەرىنىڭ 2004 جىلعى تۇلەكتەرى مۇقتاج وتباسىنا باسپانا سىيلادى. باسپاناعا مۇقتاجداردى تاڭداۋ ءۇشىن «يگىلىك» قوعامدىق قورى 8 وتباسىن ۇسىنعان. ولاردىڭ ارقايسىسى – تاعدىردىڭ سىناعىنا تۇسكەندەر. سولاردىڭ اراسىنان كوپبالالى زاميرا تاسبولاتوۆا كوپشىلىك داۋىسپەن تاڭدالىپ الىنعان. بۇل وتباسى وسى ۋاقىتقا دەيىن تار بولمەنى جالداپ تۇرىپ كەلگەن.
ايتا كەتەلىك, بۇل شارا «20 جىلدىق تۇلەكتەردەن 1 قونىس» جوباسى اياسىندا جۇزەگە اسىپ وتىر. ءتورت جىل بۇرىن باستاۋ العان جوبا اياسىندا اۋداندا ءتورت وتباسىنا باسپانا تارتۋ ەتىلگەن.
تۇركىستان وبلىسى
