جالپى, سارىاعاش اۋدانى اۋماعىندا جىل باسىنان بەرى 73 سەنبىلىك وتكىزىلگەن. سەنبىلىك بارىسىندا 500 كوشە, 161 شاقىرىم اياقجول, 200 شاقىرىم ارىق-اتىزدار, 103 شاقىرىم يرريگاتسيا جۇيەلەرى تازالاندى. سونىمەن قاتار 37 ايالداما, 34 ساياباق پەن سكۆەرلەر, 47 سپورت الاڭشاسى سىرلانىپ, رەتتەلدى. سەنبىلىكتەرگە 20 000 ادام قاتىسىپ, 343 تەحنيكا جۇمىلدىرىلدى. ناتيجەسىندە, 676 توننا كۇل-قوقىس ارنايى ورىندارعا تاسىمالداندى. سونداي-اق تابيعي رەسۋرستار جانە تابيعات پايدالانۋدى رەتتەۋ باسقارماسىنا قاراستى «جاسىل ايماق» كمم تاراپىنان بەرىلگەن 31 700 ءتۇپ ۇزاق جىلدىق اعاش كوشەتى قالا جانە 13 اۋىلدىق وكرۋگ اۋماقتارىنا, دەمەۋشىلەر ەسەبىنەن سارىاعاش قالاسى جانە قاپلانبەك اۋىلدىق وكرۋگىندە 4 200 اعاش جانە گۇل كوشەتتەرى ەگىلدى.
ء«بىز «تازا قازاقستان» ەكولوگيالىق اكتسياسىن جالعاستىرامىز جانە اپتا سايىن پىسىقتاپ وتىرامىز. وبلىس اۋماعى تازا بولسا, قوعام دا, قوعامنىڭ ويى دا تازارادى. قوعام بولىپ كىرىسكەندە عانا ايماق تازارىپ, اجارى اشىلادى», دەدى وبلىس اكىمى دارحان ساتىبالدى تازالىق جۇمىستارى سارالانعان ماجىلىستە. ال جيىنعا قاتىسقان پرەزيدەنت اكىمشىلىگىنىڭ مەملەكەتتىك ينسپەكتورى ەرلان يسابەكوۆ بۇل باستامانىڭ ءاربىر وڭىردە ساپالى ءوتۋى تۇراقتى باقىلاۋدا ەكەنىن ايتتى. «تۇركىستان وبلىسىندا اكتسيا اياسىندا كوپتەگەن جۇمىس اتقارىلدى. مەملەكەت باسشىسى بۇل باستامانى تۇراقتى نەگىزدە جالعاستىرۋدى تاپسىردى. وسىعان بايلانىستى اكىمدىكتەر حالىقتىڭ ەكولوگيالىق مادەنيەتىن دامىتۋدىڭ 2024–2029 جىلدارعا ارنالعان وڭىرلىك جوسپارلارىن ازىرلەۋى قاجەت. قازىرگى قولدانىستاعى اباتتاندىرۋ قاعيداسى ءتيىستى دەڭگەيدە ازىرلەنبەگەن, سوندىقتان ورىندالۋى اقساپ تۇر. بۇدان بولەك, قاعيدادا اۋماقتاردى كۇتىپ ۇستاۋعا جانە تازالاۋعا بايلانىستى كوپتەگەن ماسەلە ەسكەرىلمەگەن. بۇل ورايدا, پرەزيدەنت اكىمشىلىگى تاراپىنان ونەركاسىپ جانە قۇرىلىس مينيسترلىگىنە اباتتاندىرۋ ەرەجەسىنە وزگەرىستەر ەنگىزۋ جونىندە ناقتى تاپسىرما بەرىلدى. جاڭا قاعيدادا مەنشىك يەلەرىنىڭ جەكە جانە ىرگەلەس اۋماقتاردى كۇتىپ-ۇستاۋى, ەلدى مەكەندەردىڭ جانە عيماراتتاردىڭ سىرتقى ارحيتەكتۋرالىق كەلبەتىن جاقسارتۋ ماسەلەلەرى قاراستىرىلۋدا. سونداي-اق قىس مەزگىلىندە اۋماقتاردى جيناۋ, قاردى, مۇزدى جانە قوقىستى جيناۋدىڭ ناقتى مەرزىمدەرى مەن ادىستەرى كورسەتىلەدى. بۇل جۇمىستاردى اتقارۋدا تۇرعىندار مەن بيزنەس وكىلدەرىنىڭ قاتىسۋىنا باسىمدىق بەرىلەدى», دەدى ەرلان يسابەكوۆ.
تۇركىستان وبلىسىندا تازالىق ناۋقانى اياسىندا 1 408 ءىس-شارا وتكىزىلگەن. وعان 2 156 مەملەكەتتىك ورگان, 3 204 بيزنەس وكىلى, 74 مىڭعا جۋىق تۇرعىن اتسالىسقان. سونداي-اق وڭىردە پوليتسيا دەپارتامەنتى قۇرىلىمدارىمەن وبلىس اۋماعىن اباتتاندىرۋ قاعيدالارى مەن ورتاق پايدالانۋ ورىندارىن لاستاۋ فاكتىلەرىنىڭ انىقتاۋ باعىتىندا كەشەندى شارالار اتقارىلىپ كەلەدى. جىل باسىنان بەرى اكىمشىلىك كودەكسىنىڭ 505 بابى بويىنشا 3 597 ەسكەرتۋ جاسالىپ, 139 تۇلعاعا اكىمشىلىك ايىپپۇل, ال 10 614 تۇلعاعا قاتىستى اكىمشىلىك قۇقىق بۇزۋشىلىق تۋرالى حاتتامالار راسىمدەلىپ, 146 ملن تەڭگە ايىپپۇل سالىنعان. اكىمشىلىك كودەكسىنىڭ 630 بابى بويىنشا 2 920 تۇلعاعا قاتىستى اكىمشىلىك قۇقىق بۇزۋشىلىق تۋرالى حاتتامالار راسىمدەلىپ, 13 ملن تەڭگەدەن استام ايىپپۇل سالىنىپ وتىر. ەكولوگيا كودەكسى تالاپتارىنىڭ ساقتالۋىنا قاتىستى جۇرگىزىلگەن 115 تەكسەرۋ جۇمىستارىنىڭ ناتيجەسى بويىنشا 478 ەكولوگيالىق زاڭ بۇزۋشىلىق انىقتالىپ, 145 نۇسقاما بەرىلگەن, 462 جەكە جانە زاڭدى تۇلعالارعا اكىمشىلىك ايىپپۇل سالىنعان.
تۇركىستان وبلىسى
