كۇنى كەشە پارتيانىڭ 12 مىڭ مۇشەسى مەن «جاستار رۋحى» جاستار قاناتىنىڭ بەلسەندىلەرى كوشە تازالاۋعا شىقتى. اۋەلى پارتيا مۇشەلەرى وزەن جاعالاۋلارىن, ورمان القاپتارىن, وندىرىستىك ايماقتارمەن قوسا جول بويىنداعى اۋماقتاردى قامتيتىن 475 ۋچاسكەنى ايقىندادى. مىسالى, استانادا پارتيا مۇشەلەرى زاڭسىز قوقىس الاڭىنا اينالعان قاراۋسىز ۋچاسكەنى رەتكە كەلتىردى.
«Amanat» پارتياسىنىڭ اتقارۋشى حاتشىسى داۋلەت كارىبەكتىڭ ايتۋىنشا, «تازا بەيسەنبى» پارتيالىق جوباسى ەكولوگيالىق مادەنيەت پەن ازاماتتاردىڭ قورشاعان ورتاعا دەگەن سانالى كوزقاراسىن قالىپتاستىرۋدى كوزدەيدى.
«مەملەكەت باسشىسى قاسىم-جومارت توقاەۆ «تازا قازاقستان» جالپىۇلتتىق ناۋقانىن باستاي وتىرىپ, بۇل ءبىر رەتتىك اكتسيا ەمەس ەكەنىن ەرەكشە اتاپ ءوتتى. ءاربىر ءۇي, اۋلا, تۇرعىن ءۇي كەشەنى, ساياباق جانە باسقا دا نىساندار نازاردان تىس قالماۋعا ءتيىس. «Amanat» پارتياسىنىڭ مۇشەلەرى اتالعان ناۋقانعا العاشقى كۇننەن-اق بەلسەندى قاتىستى. «جاستار رۋحى» جاستار قاناتىنىڭ شامامەن 4 مىڭعا جۋىق ۆولونتەرى سۋ تاسقىنىنان زارداپ شەككەن جانداردىڭ باسپاناسىن رەتكە كەلتىرۋگە كومەكتەستى. ەندى ءار اپتا سايىن ەل اۋماعىندا ءتۇرلى ۋچاسكەلەردە قوقىس جيناۋ جۇمىسىن ۇيىمداستىرامىز. وسى ماقساتتا لاستانعان اۋماقتاردىڭ كارتاسى ازىرلەندى. ەل ازاماتتارى, وسكەلەڭ ۇرپاق تابيعي ءونىم تۇتىنىپ, تازا اۋامەن دەمالىپ, ساپالى سۋ ىشكەنىن قالاساق, ەكولوگيالىق سانا مەن مادەنيەتتى قازىردەن قالىپتاستىرۋىمىز كەرەك. ونى ەڭ الدىمەن وزىمىزدەن باستاعان ءجون. سوندىقتان قورشاعان ورتاعا بەيجاي قارامايتىن بارشا وتانداسىمىزدى «تازا بەيسەنبى» اكتسياسىنا ءۇن قوسۋعا شاقىرامىز», دەدى د.كارىبەك.
ءىس-شارا تەك قوقىس جيناۋمەن شەكتەلمەيدى. ءار ۋچاسكەگە ءماسليحات دەپۋتاتتارى, بەلسەندىلەر جانە باستاۋىش پارتيا ۇيىمدارىنىڭ باسشىلارى بەكىتىلەدى. ولار سول ۋچاسكەدە تۇراقتى تۇردە ءتارتىپ پەن تازالىقتى قامتاماسىز ەتۋمەن قاتار, قوقىس جاشىكتەرىن ورناتۋ, اۋماقتاردى كوگالداندىرۋ, جولدار مەن جاياۋ جۇرگىنشىلەر جولىن جوندەۋ سەكىلدى اباتتاندىرۋ جانە ينفراقۇرىلىمدى دامىتۋ ماسەلەلەرىن رەتتەيدى. بەيسەنبىدە قالا تازالىعىنا ارالاسۋعا شىققان تۇرعىنداردىڭ قاتارىندا ەلورداداعى باستاۋىش پارتيا ۇيىمىنىڭ بەلسەندىسى دينارا ماراتقىزى دا بولدى.
«تازا مەملەكەت – بۇل تەك ۇنەمى تازالاناتىن ەمەس, قوقىس تاستامايتىن, تازالىق ساقتايتىن ەل دەگەن ءسوز. بۇل مەنىڭ ەلىم, مەنىڭ قالام. مەن بالالارىم مەن نەمەرەلەرىمنىڭ تازا قورشاعان ورتادا ءوسىپ, تازا اۋامەن دەم الىپ, تازا سۋ ىشكەنىن قالايمىن», دەيدى د.ماراتقىزى.
وسى تۇستا «تازا قازاقستان» جالپىۇلتتىق اكتسياسى اياسىندا اماناتتىقتاردىڭ 5 باعىت بويىنشا جۇمىس باستاعانىن دا ايتا كەتكەنىمىز ءجون بولار. پارتيا مۇشەلەرى ءبىرىنشى كەزەكتە ەكولوگيا سالاسىنا قاتىستى زاڭ شىعارۋدى كوزدەيدى. ەكىنشىدەن, وڭىرلەردە لاستانعان اۋماقتاردىڭ كارتاسىن جاساي وتىرىپ, «تازا بەيسەنبى» ەكولوگيالىق اكتسياسىن ۇيىمداستىرۋدى قولعا الدى. بۇدان وزگە, الدا «استانا – الماتى» تاس جول بويىنداعى اۋماقتى تازارتۋعا ارنالعان «تازا قازاقستان» road-ەستافەتاسىن ۇيىمداستىرۋ, تاريحي, مادەني جانە تابيعي مۇرانى ۆانداليزمنەن قورعاۋعا ارنالعان قوعامدىق ناۋقان جانە جاسىل ۆولونتەرلىك – ەكولوگيالىق ۆولونتەرلەر قوزعالىسىن قۇرۋ مىندەتى تۇر.
ەستە بولسا, سۋ تاسقىنىنىڭ قاۋىپتى كەزەڭى اياقتالعاننان كەيىن «Amanat» پارتياسىنىڭ 4 مىڭعا جۋىق بەلسەندىسى مەن «جاستار رۋحى» جاستار قاناتىنىڭ ۆولونتەرلەرى قارعىن سۋدان زارداپ شەككەن تۇرعىنداردىڭ باسپاناسىن رەتكە كەلتىرۋگە كومەكتەسكەن ەدى. ال قازىر ەلىمىزدىڭ بارلىق وڭىرىندەگى بارشا پارتيالىقتار ساياباقتاردى, سكۆەرلەردى, اۋلالاردى تازارتىپ, تاريحي-مادەني جانە تابيعي ەسكەرتكىشتەردىڭ كورىگىن كەلتىرۋگە كىرىستى. اماناتتىقتار مۇنىمەن شەكتەلمەي, سەنبىلىككە شىعىپ, اعاش وتىرعىزۋعا جانە وزگە دە ءىس-شارالاردى تىندىرۋعا نيەتتى. نەگىزى «Amanat» پارتياسىنىڭ سايلاۋالدى باعدارلاماسىندا قامتىلعان ماڭىزدى باسىمدىقتىڭ ىشىندە ەكولوگيالىق ماسەلەلەردى شەشۋ جايى قامتىلعان. سايلاۋالدى ۋادەلەردى جۇيەلى ىسكە اسىرۋدى ويلاعان پارتيالىقتار بىلتىر مەملەكەتتىك ورمان قورى اۋماعىنا 302,7 ملن ءتۇپ اعاش ەگۋگە ۇلەس قوستى. سول سەكىلدى 39 ءىرى ونەركاسىپتىك كاسىپورىندا اۋانىڭ لاستاۋىن باقىلايتىن اۆتوماتتاندىرىلعان جۇيە ورناتۋعا سەپتەسكەن. مۇنىمەن شەكتەلمەي, پارتيا 2027 جىلعا قاراي سايلاۋالدى باعدارلاماسى اياسىندا تۇرمىستىق قاتتى قالدىقتاردى قايتا وڭدەۋ جانە كادەگە جاراتۋ ۇلەسىن 36%-عا دەيىن ۇلعايتۋدى كوزدەيدى. وسىعان قوسا جايىق وزەنىنىڭ ەكوجۇيەسىن قالپىنا كەلتىرۋ, بالقاش كولىنە تۇراقتى سۋ اعىنىن قامتاماسىز ەتۋ, اۋا ساپاسىنىڭ يندەكسىن ەنگىزۋ, لاستانعان ەلدى مەكەندە كاسىپورىننىڭ اۋانى لاستاۋ نورماتيۆتەرىن 40%-عا دەيىن تومەندەتۋ ماسەلەسى جوسپاردا تۇر ەكەن. جۇمىس ىستەپ تۇرعان 16 سۋ قويماسىن قايتا جاڭارتۋ جانە جاڭادان 14 سۋ قويماسىن سالۋ دا كۇن تارتىبىنەن تۇسپەيتىن شارۋا.
